1 Tim. 2 - Sumi Naga CL (Re-edited) Bible (BSI)

Kümtsü Ghenguno Inikhulo

¹ Tishiaye kümtsü nguno atüghüshi, I no hakite akeu ye timi kümtsü ghenguno Alhou vilo khulo, akighini shilo, qhüiniju lo eno shikimthikütsü tsülo;

² kükami ngo akuchuqu lakhü lo akemi ghenguno inikhu tsülo, tishikeu lono ningu ye alaghi thokha lo iqünhei eno alokughuno, Alhou sükümsa eno gihuküzüpu küxü xülu nani.

³ Hi no aloe eno ni xakuluu Alhou pulou ke,

⁴ Pa ye timi kümtsü pelo xaluve eno kuchou ithi penishi ke.

⁵ Kughengu Alhou ye lakhi likhi eno Alhou ngo timi dolo alakishiu lakhi ani ke, ti ye timi, Khristo Jisü ke,

⁶ pa no pa ampi pesü kümtsü ghenguno xakipheme shi tsüve, tino atüqhüdo achipi lono ashepe shi tsüke.

⁷ Hi ghenguno I pesü akükütsüu eno apostolmi shi süsü ke (ni ye kuchou tsa piani thono miki amoe), ni ye aküpülü eno kuchou lono Jewkumomi shikükau ke.

⁸ Ikehu, ni ye kiptimi pelo axuide eno kütsala mono aqha kümtsü lo pano u kimthe peqhepe akighini shipeni shi;

⁹ titoi totimi pelo asa pilipu, ameshoyi momu mlapuchi eno amekusho phimini pepu penishi moe, ikemu kithikiyi eno ampi ghasülu no aghibiu phimini pepu penishi,

¹⁰ eno kiu no Alhou ithitoi kemi totimi ghenguno aghibiu keno, akümla kivi gholono tishi penishie.

¹¹ Totimi ye iqünhei eno thokha lo qhoqhü keu lono ithiküphalu masae.

¹² Ni ye totimi pelo kiptimi shika momu kiptimi shou kükagha peitha peni keu za tsü amoe; ikemu li ye iqünhei masae.

¹³ Kughengu Adam paghi lhoe eno tithiuno Eve lhoke.

¹⁴ Eno Adam pishiqhi ke kumoe, ikemu atotiu pishiqhive no ayezah hekuphou shiveke.

¹⁵ Ikeghi totimi no aghibiu lono aküpülü, kikimiye, eno akimtheshi xü aye, panongu ye atianuli punu keu vecheo xaluve nani.