1 Tim. 1 - Sumi Naga CL (Re-edited) Bible (BSI)

Pethakütsü

¹ Khristo Jisüw apostol Paul no, ni Xakuluu Alhou zakütsü eno niw lajupu Khristo Jisü vecheo,

² Aküpülü lono I nu kuchou Timothy lau ye ani. Apu Alhou eno ni Mpeu Khristo Jisü launo ighi keu küpükini, kimiyekini eno aloinokeu tsü ani.

Kichile Kükütsümi

³ I no Macedonia lo wuche kelono o vilo Ephesus lo ngo aghilo pike, kughengu tishikeu vecheo o pelo timi khami no akülü kütau shika akeu lakha peniye,

⁴ eno küghakiche tsa ngo ashekuho küha keu laghaphi ghili lakha peniye ke, kughengu tipaqo ye aküpülü vecheo Alhou launo ighi keu jukükütsü kümlapu pekho ke kumono, avehu küghüzüpu xukutho cheni.

⁵ Ni yezah hipau kimji ye amlo kimthe ngo kiviküsa lotsü eno amlo tsüqhiyi keu küpülü lono ipeghi keu kikimiye hu hakutho niye ke.

⁶ Timi khami ye hipaqo lono ala vepimive no adou tsa küghakile keu küdau wuve ani.

⁷ Panongu ye ayezah shikükami shinishi ani kemu, pano ampi no pikeu eno pano no tsatsai shikumto akeqo vethalu amoe.

⁸ Nino ithi akeu no ayezah ye akiqi lono peitha aye akivi ke.

⁹ Hi vethalu no ayezah ye timi süchomi ghenguno mla püamoe ikemu ayezah heküxami eno hekibidemi, Alhou kümthami eno axine shiche kemi, mithemo kemi eno achineye thaigha chekemi, apuaza heqhi kemi, timi heqhi-buqhi kemi,

¹⁰ kipti toti dolo mithekumo, kiptimi no kiptimi sasü shupu kemi, timi kügha sawo aqüaxe shiche kemi, kimkimi, akimki shepe shikemi, eno kiu kiumu kuchou kükütsü nguno bidelau akemi ghenguno ayezah mla püani,

¹¹ ti ye akümghapu Lhou juküvü lono Atsakiviu khikhi I lau pichebe püani keno, tipau kiqi lono ke.

Khristo ye Axinemi Xalu niye Ighi

¹² Akümla hipau shipenike akumto I tsükeu, ni Mpeu Khristo Jisü shikimthi ani, kughengu pa no ni ye pükhükulupu kepi xatha no I pesü pa kümla lo süsüe,

¹³ kuchou lo püzüu ni ye achine pipütha che, paw timi shikighime eno akaghashi mjochile cheke. Ikemu I no paw kimiyekini ithulue kughengu ni ye kümtha kimini lono mlaitha püake,

¹⁴ eno Khristo Jisü gholo akeu küpülü ngo kikimiye vecheo, ni Mpeuw küpükini no I shou yeli qole ikughi ke.

¹⁵ Hi ye pükhübekulupu eno ikhikulupu tsae: Khristo Jisü no axinemi xalu nike ayeghi lo ighikeu gholo ni ye axinemi kümtsü nguno alhoksau ke.

¹⁶ Ikemu I no kimiyekini ithulu keu ye hi gheno ke, ni, axinemi kümtsü nguno alhoksau, vecheo Khristo Jisü no paw kupukülai keu kutuukulu piye, tishikeu lono pa pülülu keu lono lhokta küxü ithuluni kemi lau kichekipiye shi peniye ke.

¹⁷ Lhokta Kükau, thimoniküau, ithukümla, Alhou Pa likhi akeu, Pa lau agigihu eno ajuküvü alhokuthu apelo! Amen.

¹⁸ I nu Timothy, inahuu tungkuptsa no o miji no pi püakeu kiqi lono I no hipau za o tsüani, tishikeu lono o pelo akivishi aghüshi,

¹⁹ aküpülü tsüqüpe eno akükümsü mtsümishei peniye ke. Timi khami ye hipaqo milive keu lono pano küpülü shipüsavae.

²⁰ Timi tipaqo gholo Hymenaeus ngo Alexander pama ghike, I no pama pesü Satan küka lau phesüve tsüae, tishikeu lono Alhou thaigha pemo niye ke.