1 Thes. 5 - Sumi Naga CL (Re-edited) Bible (BSI)

Ampeu Tsala

¹ Athiküzümiqo, atüqhüdo eno atusho ghenguno nongu lau kiumu ye akepu kühae.

² Kughengu Ampeu tsala ye putho lo küpkami lakhi toi ighini keu nongu ampi no tsaqüi ithi ani.

³ Timiqo no, “Iqüghai eno sükusho ani,” ipi ake lono totimi no apunu küsü ighive ketoi züleno pano shou kütsakungo ighi nani, eno panongu ye poka mlave nani.

⁴ Ikemu athiküzümiqo, nongu ye aküzü lo amoe, ikehu atsala huno küpkami toi nongu kichiqhi pekepu kumoe.

⁵ Kughengu nongu kümtsü aküvü tianuli, tsüküvü nuliqo ke. Ningu ye putho momu aküzü laumi kumoe.

⁶ Tishiaye ningu kütami toi zümoni, ikemu tsükhüi shi idathu ngoni.

⁷ Kughengu khunono zücheni keno putho lono zücheni, eno shokümzümi ye putho lono shomzü cheni.

⁸ Ikemu ningu ye tsüküvü laumi kehu, tsükhütsüvai shini, aküpülü eno kikimiye pesü amla küküzüpu shini, eno xakulupu lajupu no akütsükuqho shini.

⁹ Kughengu Alhou ye aloghu ghenguno aza po lono ningu iniveke kumoe, ikemu ni Mpeu Jisü Khristo vecheo xakulupu ithulu peniye ke,

¹⁰ Pa no ni ghenguno thivetsü kehu ningu no idathu aghina züaghi namu Pa gholo xülu peniye ke.

¹¹ Tighenguno nongu no shiake toi, lakhino lakhi shikumto eno shiqhe puku alo.

Kishekha Kükütsü eno Akighini

¹² Nino nongu qhüiniju ani, athiküzümiqo, khunono nongu gholo ime mlaitha, eno Ampeu je lono nongu kütsüshika cheni keno panongu gihulo,

¹³ eno pano kümla ghenguno kikimiye lono agigihu akiqheu tsülo. Nongu dolo külakishi lono xülo.

¹⁴ Athiküzümiqo, nino nongu hakite ani, akipichimi lomipi lo, amlo kulotimi shikumto lo, miqemlei kemi kuphulo, panongu kümtsü lau kutuu kulu shilo.

¹⁵ Khumu khuu lau alhoksa pesü alhoksa lochile pemoni ke jukutolo, ikemu alhokuthu lakhino lakhi lau eno kümtsü lau akivi kümla shinike phulo.

¹⁶ Alhokuthu alovilo,

¹⁷ tamono inikhu lo,

¹⁸ atüqhüdo kümtsü lo shikimthi tsülo, kughengu Ampeu Khristo Jisü gholo hi no nongu ghenguno Alhou pulou ke.

¹⁹ Aghungu Kimthe ghapinhe kevilo.

²⁰ Tungkuptsa jukünatha kevilo,

²¹ ikemu thokha pejulo; kiu no akivi keno mtotoi tsüqü lulo.

²² Alhoksa jeli kümtsü lono putosü lulo.

²³ Aloinokütsü Lhou ampi no nongu shikimthetsü peni, eno ni Mpeu Jisü Khristo ikighi lo nongu ghungu, angulho eno aphimpi kümtsü tukutiye kühano aghi peni.

²⁴ Khuu no nongu kulu keno Pa ye pükhükulupu; Pa no mtsüqheino tishi nani.

²⁵ Athiküzümiqo, ni ghenguno no inikhu tsülo.

²⁶ Akimthe kümma pesü kümtsü sasü petha shilo.

²⁷ Ampeu zülono I no nongu pelo yesü hipau pesü kümtsü lau phisü penike azah tsü ani.

²⁸ Ni Mpeu Jisü Khristow küpükini nongu gholo apeniu.