1 Thes. 4 - Sumi Naga CL (Re-edited) Bible (BSI)

Alhou Lopu Küxü

¹ Ashekha shi athiküzümiqo, Ampeu Jisü je lono nino nongu qhüiniju eno hakite ani, nongu no ni launo kishi Alhou lopu shi xükepu keno ithuluve ketoi, ti ye nongu no itehi xüake toi, itaghi tinguno alau shi xülo.

² Kughengu Ampeu Jisü vecheo nino nongu kütsü shikave keu nongu no ithi ani.

³ Kughengu Alhou lopu ye hike: nongu shikimthe pe kipti-toti dolo mithekumo lono putosülu masae;

⁴ nongu lakhikhi no kishi akimthe eno agigihupu lono pa phimpi ghasü kepu keno ithi masae,

⁵ Jewkumomi khunono Alhou mtha keno pano toi ngosü kümla shikepu kumoe;

⁶ tishianguno hipa vehulo khunomu akumou lono pa thiküzümi pimimo nani, kughengu nino azüu no tsaqüi nongu kütüve ketoi hi kümtsü lo Ampeu no amkhülu nani.

⁷ Kughengu Alhou ye mithemo peniye ningu kuluke kumoe, ikemu akimthe shi peniye ke.

⁸ Tighenguno khuu no hi ikhilu moni keno, pa ye timi kumono Aghungu Kimthe nongu tsükeu Lhou ikhilu amoe.

⁹ Athiküzümi kimiye kileni keu vehu lo khunomu nongu lau ye akepu vehu kühae, kughengu lakhino lakhi kimiye kileni keu ye Alhou no nongu shikavae,

¹⁰ eno kuchou loye Macedonia qha kümtsü lo nongu no timi kümtsü lau tishi cheni. Ikemu athiküzümiqo, nongu pelo hipau alau shi apenike nino nongu hakite ani,

¹¹ eno nino nongu shikave ketoi iqüghai xüni keu, nongu luche lo amlo tsüno pütüta u no mla chuni keu no nongu kimji shilo,

¹² tishikeu lono nongu ye khuu shoumu mungube mono khalaumi zülo kithikiyi xülu nani.

Ampeu Ikighi

¹³ Athiküzümiqo, ningu ye nongu pelo kithimi vehu ithi mono apenishi amoe, tishianguno nongu pelo lajupu küha kemi toi amloiju pemo niye ke.

¹⁴ Kughengu nino Jisü ye thive eno xüchile thuve kepi pülü cheni kehu khunono thive akeno Jisü vecheo Alhou no Pa gholono panongu saghi nani kepi nino pülü cheni.

¹⁵ Kughengu Ampeu launo ighikeu tsa pesü nino nongu lau hi sheshu ani, ike ningu khunoqo Ampeu ikighi tsala lo thimono xü aghini keno, ningu ye thive keqo züiqeve nike kumoe.

¹⁶ Kughengu Ampeu ampi no kungugha lono iqighi nani, tile azakütsü ghügha anani, kungumi atou sütsa chilu nani, Alhou fuko igha nani, eno Khristo laumi shi thive kemi paghino ithughi nani.

¹⁷ Tileno ningu xüakemi ye amülhü lono Ampeu sasü kushoni ke panongu gholono kümtsa khüngküsü lo sünhe saikuve nani, eno ningu ye pülhapuju Ampeu gholo acheuve nani.

¹⁸ Tighenguno atsa hipaqo pesü lakhino lakhi lokughuno tsülo.