1 Thes. 3 - Sumi Naga CL (Re-edited) Bible (BSI)

¹ Kughou ningu no kutuu mlave keno ningu ye Athens lo ngoveke pavie pi kümsüve,

² eno nongu küpülü kughuko tsüno hakiteni ke ningu no ni thiküzüu Timothy, Khristo tsakiviu shekushu lo mlaküqha chekeu nongu lau puwu,

³ tishianguno aghime hipaqo lono milakhi mu ithave pemo niye ke. Kughengu nongu ampi no ithi anike aghime no ningu saje shivae.

⁴ Nino nongu gholo ake lono ningu ye shikighime keu sholu nanie pi azünatha nongu vilo pike, itehi ye nongu no ithi aketoi tishivae.

⁵ Hi ghenguno kughou I no kutuu mlave keno, ni ye ghukujuu no nongu ghuju sawuve no ni kümla adou shive nosa keu kümsa lono nongu küpülü ghili ithini ye Timothy puwuke.

Timothy no Shikumto tsü

⁶ Ikemu itehi Timothy no nongu küpülü eno kikimiye sütsa kivi pesü ni lau ideighi no nongu ye alhokuthu ningu kimiyeqhiyi kümsü acheni, eno nino nongu ithuluni shi aketoi nongu ghi ningu ithuluni shi anie pi ni vilo pike.

⁷ Ikehu athiküzümiqo, akiqi hipau ghenguno ni veküsa eno aghime lo nongu küpülü no ni lokughuno tsüke.

⁸ Nongu no Ampeu lau mtotoi puthugho aghi aye ningu ye xü ani.

⁹ Nongu ghenguno nino ni Lhou zülo shishe alokivi shilu keu lo ningu ye kishi Alhou shikimthi tsüni kea?

¹⁰ Ningu ye tamo mithe putho pucho inikhu ani, tishianguno ningu no agi no agi kinheqhe ghi nongu ithulu no nongu küpülü lo kiu no tomono ani keno tsükileni.

¹¹ Itehi ye ningu Papu Alhou ampi, eno ni Mpeu Jisü no ni la kiche tsüno nongu lau ighilu peni,

¹² eno Ampeu no nongu lau niw kikimiye ikowo eno qochili lupe ketoi, nonguw kikimiye ghi lakhi no lakhi lau tishilu peni,

¹³ tishianguno ni Mpeu Jisü no Pa küpülümi sasü ighi kelo, Pa no nongu mlo pesü ni Pu Alhou zülo tukutiye küha no akimthe shitsü peni.