1 Thes. 2 - Sumi Naga CL (Re-edited) Bible (BSI)

Thessaloniami lau Paul Kümla

¹ Athiküzümiqo, nongu ampi no ithi anike nino nongu gholo ighi keu ye adou kumoe.

² Ikemu nongu no ithi aketoi, Philippi lo ningu ghimeqhi eno akukujopu shi peitha namu aküpüna kitikhi lono nino Alhou lau amlo kumto shino Alhou tsakiviu nongu lau pikülha ke.

³ Kughengu ningu tsape ye akumou momu mithekumo eno pishikiqhi lono kumoe,

⁴ ikemu Alhou no ningu ikhikulupu shitsü no atsakiviu pesü pichebe tsüke toi ningu no pi cheni, ningu ye timi pulou kumono Alhou khuu no ni mlo peju cheni keno Pa pulou shicheni.

⁵ Nongu no ithi anike ningu ye khilemu alatsa pisü ighimoe, momu alakimne no küzü pusü ighimoe—Alhou no thopike.

⁶ Momu nongu launo na kütami launo namu ningu ye timi launo ajekipi phumoe, monimo aye ningu ye Khristow apostolmi kehu nongu shou aküka ake.

⁷ Ikemu aza lakhi no atianuli lamlu ketoi ningu no nongu lau mtshaivü piyeke.

⁸ Nongu kimiyekütü ke ghenguno ningu no nongu lau Alhou tsakiviu pesü küsajeke likhi kumono ningu ampi ghi pesü tsünike azüvüke, kughengu nino nongu küpüqhiyi ithuluke.

⁹ Athiküzümiqo, nongu no ni ghime eno akümla kümsülu aghi nani: Alhou tsakiviu pesü nongu lau asheshu kelo, nongu khuu shoumu amakho shipe moniye nino putho pucho mla cheke.

¹⁰ Ningu khuaye no kishi nongu küpülümi lau akimthe, amikucho eno tukutiye küha keno nongu no eno Alhou ghi thopike.

¹¹ Kughengu apu no pa tianuli lau shike toi, nino nongu tucho keu nongu no ithi ani,

¹² Alhou khuu no Pa yekipe eno ajuküvü lo nongu kuluve akeno Pa lau ameküapu shi xü penike nino nongu hakutho eno shikumto ke.

¹³ Hi ghengu ghi nino tamono Alhou shikimthi ani, ike kughou nongu no ni launo Alhou tsa ikhilu keno ti ye timi tsa kumoe ikemu nongu küpülümi lolo mla akeu Alhou tsa kuchou kepi nongu no ikhilue.

¹⁴ Nongu athiküzümi no Judea lo Khristo Jisü gholo Alhou kukuhou akeqo kimihi shilue. Kughengu panongu no Jewmi launo ghime keu sholuke toi nongu ghi no ghakhumi launo aphiphi sholue.

¹⁵ Jewmi no Ampeu Jisü eno tungkupmi ghiqhive, eno ningu hapheve, Alhou pulou kumo shive, eno timi kümtsü ghümi shino

¹⁶ ningu pelo Jewkumomi xalu pemo nike atsakiviu pinikeu lakha, tishikeu lono alhokuthu pano xine qhepuku ke. Ikemu ashekha lo Alhou loghu pano shou ikughive.

Paul no Panongu Ithulu nishi

¹⁷ Ikemu athiküzümiqo, ado hami ghenguno ningu ye amlo lono kumo kemu aphimpi lono nongu launo putosüve kehu, nongu sasü agi no agi kinheqhe ghi kusholu nike khekulho shi ani,

¹⁸ kughengu ningu ye nongu lau ighini shiae—ni Paul ye anguno anguno pükapütsa—ikemu Satan no ni lakha ke.

¹⁹ Ni Mpeu Jisü ikighi lo Pa zülo niw lajupu, ni lokivi, ni jekipipu kiu ani kea? Ti ye nongu ke kumo?

²⁰ Kughengu nongu no ni jekipipu eno ni lokivipu ke.