1 Thes. 1 - Sumi Naga CL (Re-edited) Bible (BSI)

Pethakütsü

¹ Paul, Silvanus eno Timothy no, Thessalonia lo Apu Alhou eno Ampeu Jisü Khristo kukuhou lau: Küpükini eno aloino keu tsü ani.

Aküpülü eno Kichekipiye

² Nongu kümtsü ghenguno nino alhokuthu Alhou shikimthi, ningu kighini lo tamono nongu jeku acheni,

³ ningu Papu Alhou zülo nongu küpülü kümla, kikimiye ghime, eno ni Mpeu Jisü Khristo lau iqemokeu lajupu akeu nino kümsülu cheni.

⁴ Alhou no kimiye chekemi athiküzümiqo, nino ithi anike Alhou no nongu kisheluvae,

⁵ kughengu ningu tsakiviu ye atsa likhi kumono aküka, Aghungu Kimthe, eno zükulupu küka lono nongu lau ighi. Nongu kivipu ghenguno nino nongu gholo akelo kishi xü keno nongu no ithi ani.

⁶ Nongu no ningu eno Ampeu kimihi shike, kughengu nongu no aghime kitikhi lono Aghungu Kimthe lokivi pesü atsakiviu ikhilu,

⁷ tishikeu lono nongu no Macedonia ngo Achaia lo küpülümi kümtsü lau kichekipiye shitsüe.

⁸ Nongu launo Macedonia ngo Achaia lo Ampeu tsa külha woke likhi kumoe, ikemu Alhou lau nongu küpülü akeu ye aqha kümtsü lo wuvae, ikehu ningu ye kiumu pi akepu kühavae.

⁹ Kughengu nino nongu lau ighi kelo kishi nongu no ningu ikhilu, ajulho launo tsüghüsü aküxüpu eno kuchou Lhou qenike ighi,

¹⁰ eno Pa Nu Jisü khuu akithi lono xüputhupe aloghu ighini ye akeu lono ni xaphelu nani keno, nongu no kishi Pa ikighi khekuto cheni keno, panongu ampi no pesü pike.