1 Peter 5 - Sumi Naga CL (Re-edited) Bible (BSI)

Alhou Mbeloji Khemi

¹ Ikehu, I no Khristo ghime lo thopimi lakhi shi, ajuküvü pepheni ye akeu lo ghi asaje kulumi, eno kichimi lakhi shino nongu gholo layemiqo shikumto anike:

² Alhou mbeloji nongu gholo akeu khekuto lo, tsüikhomo pike ghenguno kumono Alhou no nongu pelo shipenishi keu gholau no puloniqhiyi shilo; ala shiluni ke ghenguno kumo ikemu azükini shi qeni keu mlo xapulo;

³ khunoqo pesü nonguw jukükütsü qholo kuchoqhi püatsü akeno, panoqo qhasü kevi, ikemu ambe loji lau kichekipiye shilo.

⁴ Eno kughou Ambe Khetou ipeghini keno, nongu no aju idimo keu juküvüpu kütsükuqho ithulu nani.

⁵ Tihutoi, nongu khunono alhothe keno kichimi qhoqhülo. Kümtsü no lakhino lakhi huthuni ke aqhokighe nanu pepulo, kughengu “Alhou ye aqheküzami mjochile cheni, ikemu aqhokighemi lau küpükini tsü chenie.”

⁶ Tighenguno Alhou u kumto qholono nongu ampi kuchunilo, tishianguno Pa do-ghuloki achipi lono nongu sünheqhe nani,

⁷ nongu mlo kütakihi chekeu kümtsü Pa lau kulhuqhive tsülo, kughengu Pa no nongu tucho achenie.

⁸ Tsükhüi lo; jukuto lo. Nongu ghümi tüghami ye abongshuu no igha chekeshi khukhumu tsüqhi luveni ke phucheni.

⁹ Pa tuchile lo, nongu küpülü lo mtotoi lo, no küsami küpülümi ghi ayeghiqha kümtsü lo aghime athoshi sholu ani kepi ithilo.

¹⁰ Nongu no ado kitila imeve kethiu, kikimiye küpükini kümtsü akeu Lhou, Khuu no Khristo vecheo Paw lhokta juküvü lo nongu kuluve akeno, Pa ampi no nongu pesü atho puthotsü, aküpülü iqhikumto tsü, aküka tsükithe, eno aboqha kumto lo shosü nani.

¹¹ Alholo eno pülhapuju aküka ye Paw ke, Amen.

Ashekha Petha

¹² Pükhükulupu thiküzüu shi I no kihi chekeu Silvanus vecheo ni ye nongu lau shikumto eno shuphetsü ghi hi no Alhouw küpükini kuchou kepi ikhonhei shi yevae. Mtotoi hipau lo puthugho lo.

¹³ Akukuhou khikhi Babylon lo ani keno, khipau ghi Alhouw kishekiphe keno, li no, eno itaghi I nu Mark no, petha nongu tsüpuwu ani.

¹⁴ Kikimiye michipu shi lakhino lakhi mümakile petha shilo. Khunono Khristo laumi keno kümtsü lau aloino alo.