1 Peter 4 - Sumi Naga CL (Re-edited) Bible (BSI)

Alhouw Küpükini Jukükütsümi

¹ Tishi aye, Khristo no ashi phimpi lono imeve akeke nongu ampi kükümsü ghi tipatho lono kutolulo, kughengu khukhumu ashi phimpi lono imeve aghi keu ye axine launo kukhovae,

² tishianguno ashi phimpi xapu xüake tivilo pitipüza keu xine lono kumono Alhou pulou lono xüniye ke.

³ Kughengu Alhou kümthami no kiu toi xüche keno, ghaghughale, alhoksa shinike pitipüza keu, shokümzü, ghasükümla, eno ajulho kümlla, hi kümtsü lo nongu ghi aphiphi shi kuloji ighikeu no kughomae.

⁴ Hipa vehulo itehi ye nongu no panoqo gholo akumou eno ghasükümla küxü lo kuloji moveke gheno panongu ye nongu jupe akichiqhi eno nongu pipüsaqhi ani;

⁵ ikemu panongu ye Khuu no küxümi ngo kithimi shou küghathani ye kutope ani keno Pa lau kihikülai tsü nani.

⁶ Akiqi hipau anike gheno Atsakiviu ye thive no akemi lau ghi pesü kütsü wue, tishianguno ashi küdau ye panoqo ghi kütami lau toi küghathabe aghimu aghungu xü lou no Alhou pulou kiqi lono xülu peniye ke.

⁷ Thokha kümtsü shekuho ye kupunuvae; tigheno akighini shikulupu shi alikhi aghasü eno tsükhüi lulo.

⁸ Kümtsü nguno alau, kikimiye no axine kutomo nhavetsü cheni kehu aghüiloqhiyi lakhino lakhi kimiye kilelo.

⁹ Nhenheshi mono nongu kilo lakhino lakhi sasüthi kilelo.

¹⁰ Milakhikhi no Alhouw küpükini gho ithulu püake toi, tipaqo peitha kithimi shino lakhino lakhi huthu kilelo:

¹¹ khuu no asheshu cheni keno Alhou Tsape pesü asheshulo; khuu no huthu cheni keno Alhou no tsü chekeu kumto pesü huthulo, tishianguno thokha lo Jisü Khristo vecheo Alhou jekipipu shilu penie. Alholo eno pülhapuju ajuküvü ngo aküka ye Paw ke, Amen.

Khristomi Ghime

¹² Kimiye chekeqo, nongu pejuni ke ami kütüghalu keshi nongu shou aghime küsa ikughi kelo, ti ye kiuala paküta keu nongu lau ighi aketoi akichiqhi kevilo.

¹³ Ikemu alovilo, kughengu atsa kuchou lo nongu ye Khristo ghime sasü küsajelu anike, tishianguno kughou Pa juküvü pepheni keno nongu ghi alovi eno amloqilu nani.

¹⁴ Khristo je ghenguno nongu shou tichetighe ikughi aye nongu ye akümghapue; kughengu ajuküvü Ghungu eno Alhou Ghungu no nongu shou anike.

¹⁵ Ikemu nongu gholo khumu ghikiqhi, aküpka, küsakügha kümla momu timi kukughu jeli heküxa ghenguno aghime shi kevilo.

¹⁶ Tishi namu, khuana no Khristomi lakhike ghenguno ime aghi aye, pa ye kujomza kevilo, ikemu tipau jelono Alhou shikimthi lo.

¹⁷ Kughengu Alhou kibolomi launo huthusü küghakütha shikepu ghuloki shivae; eno ningu launo huthulu aye, Alhou tsakiviu pülü chemo kemi ghengu ye kiu visavili ipeghi nani kea?

¹⁸ Eno “Amikuchomi ghi akushukulu xalu kepu shi aye, Alhou kümthami eno axinemi ye kiu shive nani kea?”

¹⁹ Tighenguno, khunono Alhou pulou kiqi lono ime cheni keno pano ngulho pesü pükhübekulupu Lhoküsüu lau kulhuqhive tsü ghi akivi mlalo.