1 Kor. 9 - Sumi Naga CL (Re-edited) Bible (BSI)

Apostolmi Kümlapu

¹ Ni ye I ghoshi ililai anike kumo? Ni ye apostolmi ke kumo? Ni ye ni Mpeu Jisü ithulu püamo keo? Nongu ye I no Ampeu lau mlaphe keu kekumo keshea?

² I no kütami lau apostolmi kumo namu nongu lau likhimu ni ye apostolmi ke, kughengu nongu no ni ye Ampeuw apostolmi kepi keu michipu ke.

³ I peju chekemi zülo hi no I shokha cheni.

⁴ Ningu ye chushoni keu chipiu küha keshea?

⁵ Apostolmi kütami eno Ampeu thiküzümi ngo Cephas no shiche ketoi ningu ye anipu sasü izüwuni keu chipiu küha keshea?

⁶ Ikeo Barnabas nikujo likhino akümla shimono chuni keu chipiu küha kea?

⁷ Khuu no alikhi achuqupu kuto püzü ghüshimi shicheni kea? Khuu no atsailu chi püzü tipa xathi chuchemo kea? Momu khuu no ambe pighi püzü tipa kichhizü lumove cheni kea?

⁸ Ni ye timi kükagha lono hipaqo piani keshea? Ayezah lo ghi atho piani kekumo?

⁹ Kughengu Moses Yezah lo ishi yepüani, “Amshitsü no athi qophe akelo no ye pa kichi khavetsü moni.” Alhou ye amshitsü ghenguno alomsü ani keshea?

¹⁰ Pa ye mtsümishei ningu ghenguno pitsü anike kumo? Hi ye ningu ghenguno yepüatsü ake, kughengu alu hokide akeu ngo athi qophe akeu pama gha asaje ithuluni keu lakuju lono mla masae.

¹¹ Nino aghungu piti nongu gholo xusü kelo nongu launo ni phiashi tucho kepu thime lukeu ye ihulo keshea?

¹² Kütami no nongu launo hipa chipiu pükha aghi aye, ningu ye tinguno alau aküzüpu kekumo? Ikeghi ningu ye achipiu hipau peitha jumphi, eno Khristo tsakiviu laghi lo lakükhapu qhitsüni ke züqhulo ningu no thokha puqhe luve cheni.

¹³ Khunono achineki kümlapu lo ani keno, achineki lono pano chuqupu ithulu cheni, eno akiptia lo hukuthu kümlami no aghakishi kümllagho lono asaje ithulu cheni pi nongu ye mtha keshea?

¹⁴ Tihutoi khunono atsakiviu sheshu cheni keno atsakiviu vecheo xülupe masae pi Ampeu no azah tsüe.

¹⁵ Ikemu ni ye achipiu hipaqo peitha jumphie, tike kumono ni ye ithulu küzüpu hipaqo pükha niye anike kumoe. Kughengu ni ye thive keumu pavi thono khuu pelomu I kijivilelu chekeu hipau I launo süwuve tsüpemo nani.

¹⁶ I no atsakiviu sheshuke ghenguno ni ye kiumu qheza kepu kühae. Kughengu tishi peniye azah I tsü püani. I no atsakiviu sheshumo aye I hasapue!

¹⁷ Tsala I no I pulou lono hi shiaghi aye, I sala ajume anani, ikemu I pulou lono shiaghimo aye, ni ye I pichebe kümla shiani.

¹⁸ Tishiaye I jume ye kiu kea? Ti ye kümsa no atsakiviu pesü sheshuni keu, atsakiviu shekushu kümla lo I no ajume ithulu küzüpu shi akeu lumoni keu ke.

¹⁹ Kughengu ni ye khuu qeumu kumo kemu I no ni ampi pesü kümtsü qeu shivae, tishikeu lono Khristo lau timi alau saghi luniye ke.

²⁰ Jewmi alau saghi lunike ni ye Jewmi gholo Jewmi toi xüke. Ayezah qholo akemi saghi lunike ni ye Ayezah qholo akemi gholo ye panoqo toi xüke (kuchou lo ni ampi ye Ayezah qholo kumoe).

²¹ Ayezah nguno khalau akemi saghi lunike ni ye Ayezah nguno khalau akemi gholo ye panoqo toi xüke (kuchou lo ni ye Alhou yezah nguno khalau kumono Khristo yezah qholo xükemi).

²² Miqemlei kemi gholo ni ye miqemleive, tishianguno ni ye panoqo saghi luniye ke. Kiukiu gholau nomu khami likhimu xalu niye ni ye timi kümtsü lau thokha kümtsü shike.

²³ Ni ye atsakiviu ghenguno hi kümtsü shicheni, tishianguno panongu gholo ni ghi tipau kükümgha küsaje niyeke.

²⁴ Pokuxu kelo akupomi kümtsü no pocheni kemu milakhi likhino asaxü ithulu chenie pi nongu ye mtha keshea? Ikehu asaxü ithulu kepushi polo.

²⁵ Aghilimi kümtsü no thokha lo alikhi ampi ghasü cheni. Panongu ye pepushu moni keu kütsükuqho ithuluni ye hi shicheni, ikemu ningu ye püha moni keu saxü ithulu niye ke.

²⁶ Ikehu ni ye akimji kühano pochemoe; ni ye amülhü chishiju püha chekemi toi kichishi chemoe.

²⁷ Ikemu I no kütami vilo asheshu cheni püzü ni ampi ye kideqhive nosa kehu, ni ye I phimpi chishi kushughi eno ghasüpe qhicheni.