1 Kor. 8 - Sumi Naga CL (Re-edited) Bible (BSI)

Ajulho Mllavekeu Chuqupu

¹ Itehi ye ajulho mllavekeu chuqupu vehulo: “ningu kümtsü no akighithi ani” ipi ningu no ithi ani. Hitoi keu kighithi ye timi pelo qhezauve chenipe, ikemu kikimiye no shiqhe pukulu cheni.

² Timi khuu no pa ye kiu kiumu ithi anie pi kümsüni keno, pa ye ithi masa keu mtha aphie.

³ Ikemu khuu no Alhou kimiye cheni keno, Alhou no pa ithi ani.

⁴ Ikehu, achuqupu pesü ajulho mllakeu tsa loye, ningu no ithi anike “ajulho ye kuchocho aküxü anike kumoe,” eno “Alhou ye lakhi likhi ani.”

⁵ Kughengu atsütsü momu ayeghi lo alhouqo ipiche keqo aghi namu—le kuchou loye “alhou” eno “ampeu” kutomo akhanie—

⁶ ikeghi ningu ghenguno Alhou ye lakhi likhi, Pa ye Apu, thokha Pa launo ighi eno Pa ghenguno ningu ye xüani, eno Ampeu lakhi likhi, Pa ye Jisü Khristo, Pa vecheo thokha ani eno Pa vecheo ningu ye xüani.

⁷ Tishimu, kümtsü no hipau kighithi kühae. Ikemu khami ye inahuu ajulho sasü kütshükime chekeu lono ajulho mllakeu chuqupu chuve no panow kiviküsa lotsü miqemleipe kitiqeve cheni.

⁸ Achuqupu no ningu pesü Alhou kupunu lumo nani. Nino chumoke ghenguno ningu no alhoksau ke kumoe, eno chuke ghenguno akiviu ke kumoe.

⁹ Ikemu nongu chipiu hipau no aküpülü lo miqemlei kemi pukhu küpsüpu shi nosake kutokupuilo.

¹⁰ Kughengu no akighithiu no ajulho kümlla chineki lo chuake lono khuana miqemlei kemi no ithuluve aye, pa ghi ajulho mllakeu chuqupu chunike amlo mtove nanike kumo?

¹¹ Ikehu miqemlei keu athiküzüu, khuu ghenguno Khristo no thive keno, hipau ye o kighithi vecheo kütsavae.

¹² Kughou nono hitoi o thiküzümi shou axine shino panow kiviküsa lotsü miqemlei akelono ghüzani keno, no ye Khristo shou axine shi ani.

¹³ Tighenguno achuqupu no I thiküzümi pelo küpxa lupe aghi aye, ni ye khilemu ashi chumo nani, tikumo aye I no I thiküzümi küpxalu nosae.