1 Kor. 7 - Sumi Naga CL (Re-edited) Bible (BSI)

Külakupu Khuaye

¹ Itehi ye nongu no I lau yepuwu keu tsalo: “Kiptimi lakhi ye totimi sasü ashiaji küqhamo keu pavie.”

² Ikemu kipti-toti dolo mithekumo ghukuju ghenguno kiptimi kümtsü pütüta nipu akepu eno totimi kümtsü pütüta kimi akepue.

³ Akimi no pa nipu lau akimi kümlapu saje shikupu tsü, titoi anipu no li kimi lau anipu kümlapu saje shikupu tsü kepue.

⁴ Kughengu anipu ye li phimpi shou kükagha kühae, ikemu akimi no ani. Titoi akimi ye pa phimpi shou kükagha kühae, ikemu anipu no ani.

⁵ Nongu no akighini shiniye pulo küqhano ado hami kusholu move kelo kumo aye lakhino lakhi milive kevilo. Kütüta shivemu itaghi kuloqu luvelo, tishianguno nongu no alikhi aghasümla namu Satan ye nongu ghuju mla nani.

⁶ Itehi ye azakütsü kumono puloza shi ghi I no hi piani.

⁷ Ni ye kümtsü pelo ni ampi hutoi shi penishi ani. Ikemu kümtsü no Alhou launo agho ithulu keu ani, milakhi no agho lakhi eno lakhiu no agho kütau ani.

⁸ Külaumo no akemi ngo chimemi vilo I no hi pi anike panongu ye I toi lüthüshi akeu pavie.

⁹ Ikemu panongu no alikhi aghasümla aye külauve masae. Kughengu ghasümla no pitipüza akepu ye külauve keu no akiviue.

¹⁰ Külauve kemi lau I no azah hipau tsüani (I no kumono Ampeu no ke): Anipu ye li kimi sasü ixave kepu kumoe

¹¹ (ikemu li no tishive aye, li ye külamo no auve masa, tishimo aye li kimi sasü külashi luve masae), eno akimi ye pa nipu küghüxave kepu kumoe.

¹² Kütamiqo vilo I no pi anike (Ampeu no kumono I no ke) tsala athiküzümi lakhino pülümokemi anipu luve no li no pa sasü küghüna nike pulo aghi aye, pa ye li küghüxave kepu kumoe.

¹³ Totimi lakhino pülümokemi akimi kilo wove no pa no li sasü küghünani keu pulo aghi aye, li ye pa sasü ixave kepu kumoe.

¹⁴ Kughengu aküpülü kumo akimi huye pa nipu vecheo akimthe shiluve nani, eno aküpülü kumo anipu huye li kimi vecheo akimthe shiluve nani. Tikumo aye no tianuli ye mithekumo shiniae, ikemu itehi panongu ye ikhikulupu shiani.

¹⁵ Tishimu aküpülü kumou no ixani shive aye, tishive pelo. Titoi keu loye athiküzümi momu achelimi huye kuqho phevae. Alhou ye aloino keu küxü lo nongu kuluvae.

¹⁶ Kughengu no anipu ye o kimi xalu nani kemo keno kishino ithi ani kea? Momu no akimi ye o nipu xalu nani kemo keno kishino ithi ani kea?

O Kulukeu Gholau no Xülo

¹⁷ Ampeu no pichebe keu kiqi lono eno Alhou no kiu lo kuluve akeno milakhi khino tipau kiqi lono xülo. Akukuhou kümtsü lo hi ye I khuaye ke.

¹⁸ Khuana aphighüyiko ghave kethiu no kulu kemi ani keshea? Pa ye aphighüyiko michipu shipühani ye shikevilo. Khuana aphighüyiko ghamphi lono kulu keu ani keshea? Pa ye aphighüyiko ghaniye shi kevilo.

¹⁹ Kughengu aphighüyiko ghana monamu kihi amoe, ikemu Alhou zakütsü pelukeu no akhotou ke.

²⁰ Milakhi no kiu qhemi lo acheke lono pa kulu keno tipau lo akepue.

²¹ O kulu kelo no ye aqüaxemi shiche keshea? Amlosa kevilo. (Ikemu o khaqhiphe kepu do sholu aye adokivi lulo).

²² Kughengu khuu aqüaxemi shiake lono Ampeu lau kulu keno, pa ye Ampeu no kuqhopheve kemiae. Titoi khuu no kuqhophe keu lo ake lono kulu keno pa ye Khristo qüaxemi shivae.

²³ Nongu ye ame no qhüvae; tighenguno timi qüaxemi shikevilo.

²⁴ Ikehu, athiküzümiqo, kiukiu tüqhüdo lono kulu püaghi namu, tipau lono Alhou sasü kuposhulo.

Külaumo kemi eno Chimemi

²⁵ Itehi ye külau mono akemi ghenguno, ni ye Ampeu launo tsükeu za kühae, ikemu Ampeuw kimiyekini vecheo pükhübekulu shiaghi kehu I no Iw xakütha tsü ani.

²⁶ Itodolo adoküsa jukelo, milakhi ye pa no itehi kishi ani keno titoi akeu pavie pi kümsülu ani.

²⁷ No ye anipu sasü ani kea? Li küghüxa kevilo. No ye külaumo no ani keshea? Anipu phu kevilo.

²⁸ Ikemu nono külauve namu no ye axine shiamoe, eno totimi lakhi no külauve namu li ye axine shiamoe. Ikemu khunono külauni keno ayeghi lo veküsa jeli sholu nani kehu ni ye tipau lono nongu hakha niye ke.

²⁹ Athiküzümiqo, I no pi akeu ye hike: kihikütha do ye ikhonheivae. Hinguno hilau ye anipu luve kemi no külamphi kemi toi xülo,

³⁰ mloqa akemi no mloqamo ketoi lo, alovi akemi no alovimo ketoi lo, küqhükilimi no kiumu küha ketoi lo,

³¹ eno ayeghiqha peitha akemi no kiumu kütshükime küha ketoi lo. Kughengu itehi akeu yeghiqha kogheküghü ye küha wocheae.

³² Ni ye nongu pelo kütakihi penishi amoe. Külaumo kemi ye kishi Ampeu pulou shini keno Ampeu kümlapu lo kütakihi cheni.

³³ Ikemu külauve kemi ye kishi pa nipu pulou shini keno ayeghi lo vehu ghenguno kütakihi cheni,

³⁴ eno pa kükümsü ye kijeve cheni. Külaumo kemi totimi momu ililhothe ye kishi aphimpi ngo aghungu lo akimthe shimasa keno Ampeu kümlapu lo kütakihi cheni. Ikemu külauve kemi totimi ye kishi li kimi pulou shitsüni keno ayeghi lo vehu ghenguno kütakihi cheni.

³⁵ Nongu la shipeniye ni ye hi piani, nongu lakhani ye kumono akhuaye kivi lono nongu pelo kijethamo keu küpülü Ampeu lau tsü peniye ke.

³⁶ Khuana no pa no küsükhave lau akhuaye kivi pephe mlavae pi kümsü aghi, eno pa shiaji no pitipüza külaveni shiaghi aye, pama ye külauve lo—ti ye axine kumoe.

³⁷ Ikemu khuu no pa mlo iqhikumtolu, masakeu kühano pa shiaji ghasülu püzü pa no küsükha püakeu lumoveni pi pa mlo lono xathalu keno, pa ye achipi shiani.

³⁸ Ikehu timi khuu no pa no lumove keu ayiliu sasü külaveni keno, pa ye achipi shiani, ikemu khuu no külau move keno pau no akiviu shivae.

³⁹ Anipu ye akimi no xüake tivilo pa lau tsüghape qhivae. Ikemu akimi no thive aye li ye Ampeu pulou lono li no khuu pulo keno pa sasü külalu nani.

⁴⁰ Tishimu Iw xakütha kiqilo li ye külau move keu no alau amloqi nani. Eno ni ghi Alhou Ghungu no I sasü anie pi kümsü ani.