1 Kor. 6 - Sumi Naga CL (Re-edited) Bible (BSI)

Küpülümi shou Küghakütha

¹ Nongu milakhi no lakhi shou atsakügha kepu aghi aye, Alhou küpülümi lau wunike züqhulo pa ye amikucho kumomi zülo wuni keshea?

² Ikeo Alhou küpülümi no ayeghiqha shou küghathabe nanie pi nongu ye mtha kea? Eno nongu no ayeghiqha shou küghathabe nani pi aye, nongu ye tachutaghu vehuqo ghi küghatha mlave nani keshea?

³ Ningu no kungumi shou ghi küghathabe nanie pi nongu ye mtha keo? Tishiaye, hipa küxü lo vehuqo ye kishita peithathi masa kelae!

⁴ Ikehu nongu no hitoi keu vehulo kütsala ipeghi aye, kushiye nongu ye akukuho lo kihisümo kemi zülo pewu cheni kea?

⁵ Ni ye nongu shikujo niye hi piani. Athiküzümi dolo kütsala kilekeu xatha tsüni kemi alokütsümi nongu gholo lakhimu kühave keshea?

⁶ Tishinike züqhulo athiküzümi lakhino lakhi sasü küghaki lo pülümokemi zülono atsakügha wuni keshea?

⁷ Lakhino lakhi sasü atsakügha akeu kiqi ye tomo mithevae. Kushiye nou nomu akumou shivemo kea? O pükaqhive pekeu mu pavimo keshea?

⁸ Ikemu le nongu ampi no akumou shino no thiküzümiu ghi pükaqhiuve ke!

⁹ Amikucho kumomi ye Alhou yekipe ighimla nanie pi nongu ye mtha keshea? Nongu pishiqhipe kevilo: kipti-toti dolo mithekumomi na, ajulho kümllami na, küsalhami na, kiptimi no kiptimi sazü kemi na,

¹⁰ küpkami na, alakimnemi na, shokümzümi na, thoküghami na, pükaqhi kemi namu, khumu Alhou yekipe ighimla nani.

¹¹ Nongu gholo khami ye titoi cheke. Ikemu Ampeu Jisü Khristo je lono eno ni Lhou Ghungu vecheo nongu qhuve no shikimthepe achipikalu ke.

Kipti-toti Mithekumo lono Polulo

¹² “Ni ye thokha shikulupu chipiu ani,” ikemu kümtsü peitha kulupu kumoe, “Ni ye thokha shikulupu chipiu ani,” ikemu kiu nomu I qhasüve pemo nani.

¹³ “Achuqupu ye akive ghenguno eno akive ye achuqupu ghenguno ke”—ikemu Alhou no tiküma gha kütsave nani. Aphimpi ye kipti-toti dolo mithekumo ghenguno kumoe, ikemu Ampeu ghenguno, eno Ampeu ye aphimpi ghenguno ke.

¹⁴ Alhou no Ampeu xüputhu eno Pa küka pesü ningu ghi xüputhu nani.

¹⁵ Nongu phimpi ye Khristo phiau kepi nongu ye mtha keshea? Tishiaye ni ye Khristo phiau pesü kütüqhalimi phiau shive tsüni keshea? Khilemu kumoe!

¹⁶ Ikeo nongu ye milakhi no kütüqhalimi sasü ashiaji küqha aye pa ye li sasü ashi lakhi shivae pi mtha kea? Kughengu, ishi yepüake toi, “Pama ye ashi lakhi shive nani.”

¹⁷ Ikemu khuu no Ampeu gholo kimepe ani keno pa ye aghungu lono Ampeu sasü lakhi shivae.

¹⁸ Kipti-toti dolo mithekumo lono polulo. Timi lakhi no axine shikeu kümtsü aphimpi khalau noke, ikemu khuu no kipti-toti dolo mithekumo shi keno, pa ye pa phimpi shou axine shipuku ani.

¹⁹ Nongu phimpi ye Alhou no nongu tsükeu, nongu lolo akeu Aghungu Kimthe chineki kepi nongu ye mtha keshea? Nongu ye nonguw ke kumoe,

²⁰ kughengu nongu ye ame no qhüluvae. Tighenguno nongu phimpi lono Alhou juküvüpu shilo.