1 Kor. 5 - Sumi Naga CL (Re-edited) Bible (BSI)

Ashupu asalha no Akukuhou Shipixi

¹ Nongu gholo kipti toti dolo mithekumo anipi kuchou tsa I lau pi ighivae, timi lakhi no papu nipu sasü küghüna anie pike ti ye Alhou mtha kemi gholou ghi kutuulu chemoe.

² Ikeghi nongu ye akuchhoma shiani! Nongu ye mlo akelau kekumo? Khuu no hikithipu shipüani keno nongu gholono haphevelo.

³ Kughengu I phimpi ye nongu gholo küha kemu I mlo ye nongu gholo ani; eno nongu gholo akeshi timi khuu no hikithipu shipüani keno ni ye pa shou küghathabevae.

⁴ Kughou Ampeu Jisü je lono nongu no kuho kumqo eno I ghungu no nongu gholo ngoni keno, Ampeu Jisü küka pesü

⁵ nongu ye timi hipau phiashi kütsave penike ikhiphepe Satan tsüvelo, tishianguno Ampeu tsala lo pa ghungu xalutsü penie.

⁶ Nongu qheküza ye aloke kumoe. Kholaqhi kitila no asho kunu püakeu kuchopu inguvepe chekeu nongu ye mtha keshea?

⁷ Nongu ye kuchou no kholaqhi sümokeu sho kehu kholaqhi aqau ye shikimtheve lo tishianguno asho kukunu kithe shinani. Kughengu niw Hechekulu mbe Khristo ye küghape aghashivae.

⁸ Tighenguno ningu kholaqhi aqau, ti ye kimthikile keu eno küsakügha kholaqhi, kumono kholaqhi sümokeu sho, ti ye tsaqütsalei keu eno kuchou, pesü tiqhetini pinini nolo.

⁹ Iw yesü lono nongu vilo kipti-toti dolo mithekumo sasü kuloji kevilo pike—

¹⁰ ti ye hipa yeghi lo shupu-salha chekemi, alakimnemi eno pükaqhi chekemi, momu ajulho kümllami piamoe, tishini keloye nongu ye ayeghiqha hipau lono ipeve masa niae.

¹¹ Ikemu itehi I no nongu lau ye akeu ye hike: timi khuu no pa ye athiküzümi lakhie pi püzü kipti-toti dolo mithekumo shicheni, alamine, ajulho mlla, momu kütami thaigha, shomzü, pükaqhi cheni keno, timi tipau sasü kuloji kevilo—tikithipu ye sasü kuchu-kushomu shikevilo.

¹² Kughengu ni ye kushiye ashoumi shou küghathabeni kea? Nongu ye akukuho alou akeqo shou küghathabe kelau kekumo?

¹³ Ashoumi ye Alhou no küghathabe nani. “Küsaküghami ye nongu gholono haphevelo.”