1 Kor. 4 - Sumi Naga CL (Re-edited) Bible (BSI)

Apostolmi Kümlapu

¹ Ningu ye Khristo qemi eno Alhouw tuqhou jukükütsümi kepi nongu ye kihitsü kepue.

² Eno jukükütsümi ye pükhükulumi shimasae.

³ Ikemu nongu momu ayeghi lo küghaki lono I shou küghathabeni keu ye I ghenguno akhoto vehu kumoe. Kuchou loye, ni ye ni ampi shou küghathabe chemoe.

⁴ Kughengu ni ye I kipimi kiumu kümsülu amoe, tishike ghenguno ni ye akipimi kühake pimlae. Ampeu no I shou küghathabe cheni ke.

⁵ Tighenguno ado tomphi züuno eno Ampeu no ighi mphi lono küghathabe kevilo. Pa no aküzü lo küsü püakeqo aküvü lo süipeghi nani eno amlo lo kümsüpu akeu lhaphe piye nani. Tileno pütüta müzülo Alhou launo sheqhe kepu ithulu nani.

⁶ Athiküzümiqo, nongu pelo ala shipeniye I no thime hi kümtsü pesü Apollos nikujo launo kiche piyevae, tishianguno nongu no ni launo shikalu no yepüakeu nguno alau shimo nani. Tishino nongu ye milakhi pape cheni pikeu qheküza lono lakhiu phimove keu shimo nani.

⁷ Khuu no nongu ye kütami nguno paküta kepi ithulu kea? Nongu ye Alhou launo ithulu mokeu kiu ani kea? Nongu no ithulu püaghi aye, ti ye kümsagho kumo kesheno nongu ye kushiye qheza cheni kea?

⁸ Nongu ye nongu no lunishi keu kümtsü auvae! Nongu ye kinimi shivae! Ningu sümono nongu ye kükami shivae! Nongu no kaluke aye ningu ghi no gholo aküka küsajeni cheke!

⁹ Kughengu I no kümsüju kelo ningu apostolmi ye akithi za tsüve kemi toi Alhou no ningu pesü ashekhau shi aqha zülo pephe piye ani, kughengu ningu pesü ayeghiqha, kungumi, eno timiqo zülo qheghüi jukepu lakhi shive tsüae.

¹⁰ Ningu ye Khristo ghenguno mbomzümi, ikemu nongu ye Khristo lau kimelu keu lono alokütsümi. Ningu ye miqemlei kemi, ikemu nongu ye akumtomi. Nongu ye agigihupu ithulu cheni, ikemu ningu ye tichetighemi ke.

¹¹ Itehi kutolo ningu ye müzüthi tüghüthi ani, ningu ye aphimini küixü pepu, ningu heqhi-buqhi eno kupokichemi shiani,

¹² ningu ye ichheime ni u no mla cheni. Ningu ghusho aye, nino kümghave tsü cheni; ningu shikighime aye nino kutuu cheni;

¹³ ningu thaigha aye nino akümtsha shi khochile cheni. Ningu ye ayeghiqha ghapheu, eno timiqow tübatüzü xukupuu shivae eno shianie.

¹⁴ Ni ye nongu shikujo niye hipau yepuwu amoe, ikemu I qhuu I tianuli kiqishi nongu hakutho tsüniye ke.

¹⁵ Kughengu nongu no Khristo küdau no lapiyemi kihikhakümla aghimu nongu ye apu kutomo kühae. Kughengu atsakiviu vecheo I no Khristo küdau no nongu papu shilue.

¹⁶ Ikehu I toi shilopi I no nongu hakite ani.

¹⁷ Hi ghenguno I no Ampeu küdau no pükhükulupu nu, I qhuu Timothy nongu lau puwu ani, ti ye I no Khristo gholo cheche keu pesü akuaqha lo akukuhou kümtsü lau shika cheke toi nongu kütü peniye ke.

¹⁸ Khami ye I no nongu lau ighimo aküghashi kuchhoma ani.

¹⁹ Ikemu Ampeu pulou shiaghi aye, ni ye itheno nongu lau ighi nani, eno hi akuchhomami no pikeu tsa kumono pano küka kiu ani keno I no jutsü nani.

²⁰ Kughengu Alhou yekipe ye atsapi no kumono aküka noke.

²¹ Nongu pulou ye khikhiu kea? Ni ye akihepusü peighi lopi keo, kikimiye lono mtshaivü ighi lopi kea?