1 Kor. 3 - Sumi Naga CL (Re-edited) Bible (BSI)

Akukuho lo Kijetha

¹ Athiküzümiqo, nongu ye aghungulo timi kumono ashi lo timi eno Khristo küdau angakughunu toi ni ye nongu pütsa masavae.

² I no achuqupu kumto kumono akichhizü pesü nongu loji, kughengu nongu ye achuqupu kumto chukümlapu shiae, eno itehimu nongu ye chukulupu shimphi,

³ kughengu nongu ye ashi lono xüaphi ke. Nongu gholo anhekushu eno mtomshu akelo ti ye ashi eno ayeghi gholau no xü aphike kumo?

⁴ Kughengu milakhi no, “Ni ye Paul laumi,” lakhiu no “Ni ye Apollos laumi” ipi kelo nongu ye ashilo timi shi anike kumo?

⁵ Imaye Apollos ye kushi kemi eno Paul ye kushi kemi kea? Pama ye aqemi, eno Ampeu no pichetsü ketoi pama vecheo nongu no pülülue.

⁶ I no abo shosü, Apollos no azü pusü, ikemu Alhou no thuwulu peke.

⁷ Ikehu shosü keu na azü pusü keu namu kiumu kumoe, ikemu Alhou khuu no thuwulu pe cheni keno, Pa likhino akhoto ke.

⁸ Abo shosü keu ngo azü pusü keu pama gha athoe, pütüta no mlasü keu kiqi lono ajume ithulu nani.

⁹ Kughengu ningu ye Alhou kümlapu lo mlaküqha chekemi; nongu no Alhou luza eno Alhou ki.

¹⁰ Alhou no küpükini I tsükeu kiqi lono, aki kishimi shitsami toi I no aboqha qhae, eno kütami no tipau shou shipuku ani. Pütüta no kishi shipuku ani keno kutokughoi lo.

¹¹ Kughengu aboqha khikhi qhave akeno, ti ye Jisü Khristo ke, tinguno alau ye kütau boqha khunomu qhamlae.

¹² Khuana no ameshoyi, ghükayi, akughupu tu, asü, atsüni, aghijini pesü aboqha hipau shou shipuku püaghi namu

¹³ pütüta kümla pephe piye nani, kughengu Atsala huno aküvü lo pephe nani, eno milakhikhi no kiutoi keu kümla mla püaghini keno ami no pitiju nani.

¹⁴ Khuno kümla aboqha shou shipuku püakeu no pitipüha mlani keno pa ye asaxü ithulu nani.

¹⁵ Ikemu khuno kümla no piti pühaveni keno, pa ampi ye ami lono pojolu keshi kethono xalu nani kemu pa ye asaxü ithumlave nani.

¹⁶ Nongu ye Alhou chineki eno Alhou Ghungu no nongu lolo acheni kepi mtha keshea?

¹⁷ Khunono Alhou chineki kütsaveni keno Alhou no pa kütsave nani. Kughengu Alhou chineki ye akimthe eno nongu no tipau chineki ke.

¹⁸ Timi khumu alikhi ampi pishiqhi kevilo. Nongu gholo khuana no pa ye hipa yeghi lo alokütsümi kepi aghi aye, pa ye alokütsümi shinike ghenguno mbomzümi shive masae.

¹⁹ Kughengu Alhou züloye hipa yeghi lo lokütsü ye mbomzüe. Kughengu ishi yepüani, “Pa no alokütsümi pano mqükini lono meluve cheni,”

²⁰ eno itaghi, “Alhou no alokütsümi kükümsü ye abokümsa kepi ithi ani.”

²¹ Ikehu khumu timi pükhüpe qheza kevilo. Kughengu thokha kümtsü nonguw ke,

²² Paul na, Apollos na, Cephas na, ayeghiqha na, aküxü na, akithi na, itehi akeu na, ighini keu namu—kümtsü nonguw ke,

²³ eno nongu no Khristow, Khristo no Alhouw ke.