1 Kor. 2 - Sumi Naga CL (Re-edited) Bible (BSI)

Khristow Kros Sheshu

¹ Athiküzümiqo, kughou I no nongu lau ighi keno, ni ye atsa pikithi momu alokütsü lono Alhou shepe pikülha ke kumoe.

² Kughengu ni ye nongu gholo Jisü Khristo eno Pa yedave keu nguno kütau ye kiumu ithimo nike xathave.

³ Ni ye miqemlei, msaighü eno khokhoshi nongu gholo ae,

⁴ I tsapi eno I tsape ye alokütsü lono züizalu kepu shimoe, ikemu Aghungu küka lono shipiye lue,

⁵ tishikeu lono nongu küpülü ye timi lokütsü lo kumono Alhou küka shou belu peniye ke.

Aghungu launo Alokütsü

⁶ Tishimu aküpülü lo tekhoive kemi lau nino alokütsü tsa pesü picheni, ti ye hipa yeghi lo lokütsü momu yepemi hauveni keqo lokütsü kumoe.

⁷ Ikemu ningu no Alhouw tuqhou eno küsü püakeu lokütsü picheni, ti ye mulhou no Alhou no ningu juküvüpu ghenguno kughuve tsüke.

⁸ Hipa yeghi lo yepemi khumu hi vethamlae, kughengu panongu no ithike aye ajuküvüpu Mpeu yeda moni cheke.

⁹ Ikemu ishi yepüake toi, “Kiu anhethi no ithulu mphi, akini no chilu mphi keno, momu timi mlo no kümsülu mphi keno, Alhou no kiu Pa kimiye chekemi ghenguno kuto püani keno”—

¹⁰ thime hipaqo Alhou no Aghungu vecheo ni lau pephe piyevae. Kughengu Aghungu no Alhouw kuthoküzü kutolo thokha lheju cheni.

¹¹ Kughengu timi ye pa lolo akeu ghungu no kumo aye khuu no pa kükümsü ithi luni kea? Titoi Alhou Ghungu no kumo aye khunomu Alhou kükümsü ithi chemoe.

¹² Ningu ye hipa yeghi lo ghungu ithuluke kumoe, ikemu Alhou launo ighikeu Ghungu ithulue, tishikeu lono ningu pelo Alhou no kümsa no kiu ni tsü keno ithi peniye ke.

¹³ Ikehu nino timi lokütsü no shikakeu lono kumono Aghungu no shika keu tsa pesü picheni, eno Aghungulo küxümi vilo Aghungu ghili kuchou pesü hepho piye cheni.

¹⁴ Ashilo küxümi ye Alhou Ghungu launo ighikeu ikhilu chemoe, kughengu ti ye pa ghenguno mbomzü ke, eno tipaqo ye aghungu lono kimchilu cheni kehu pa ye tipaqo vethalu chemoe.

¹⁵ Aghungulo timi no thokha kümtsü kiqikutoju cheni, ikemu khunomu pa shou küghathabe chemoe.

¹⁶ “Kughengu khuu no Ampeu kükümsü ithi anie pino Pa mije tsüluni kea?” Ikemu ningu ye Khristo kükümsü ni lolo ani.