1 Kor. 16 - Sumi Naga CL (Re-edited) Bible (BSI)

Küpülümi ghenguno Asüqha

¹ Itehi ye küpülümi ghenguno asüqha vehulo: Galatia kukuhouqo lau I no kichetsü ketoi nongu ghi tishi masae.

² Apinedo kümtsü lo atsala atüghüni nongu lakhikhi no aghikeu qhemi ikhithape kütsü püaghilo, tishianguno I no ighi keloye süqhasüli lumoveni.

³ Eno I no ighi kelono nongu no khuno pelo nongu gho Jerusalem lo pewu penike yesü lono piche püani keno I no tipaqo puwuni.

⁴ Tsala ni ghi wukepu shive aye panongu ye I gholono wuni.

Aghüzü Kukughu

⁵ Ni ye Macedonia vechesü wuniye kughu ani kehu tileno nongu lau ighini,

⁶ eno ni ye nongu gholo ado hami ngo nani, le süsü tusho kupuju mu ngove luvi, tishianguno I no khila khila wu kepu shinamu nongu no I ghüzüla lo kuphutsü penie.

⁷ Kughengu ni ye chokilhe shi itehi no nongu sholuni shi amoe. Ikemu Ampeu no pulotsü aye, ni ye nongu gholo ado ta ngoveni shiani.

⁸ Ikemu ni ye Pentecost tsala kutolo Ephesus lo ngove nani,

⁹ kughengu ameküapu kümla kije shikulupu dokivi I lau khaqhitsü anike, eno mjochileni kemi kutomo ani.

¹⁰ Kughou Timothy ighini keno, pa pelo nongu gholo ighümo no ngolu pelo, kughengu pa ghi I toi Ampeu kümla shiani.

¹¹ Ikehu khuu pelomu pa thaighape kevilo, ikemu pa ghüzüla lo aloinoqhiyi puwulo, tishianguno pa ye I lau ideighilu nani, kughengu ni ye athiküzümi gholo pa ighini keu laju anike.

Ashekha Tsa

¹² Itehi ye ni thiküzüu Apollos vehulo, ni ye athiküzümi kütami gholono nongu xujuwu lopi pa hakite, ikemu pa ye itodolo tilau ighini keu pulo amoe. Pa no adokivi ithulu kelono ighi nani.

¹³ Tsükhüi jukuto lo, aküpülü lo mtotoi puthugho lo, amlo kumto shilo.

¹⁴ Nongu no mlaitha keu kümtsü kikimiye lono shilo.

¹⁵ I no nongu hakite ani athiküzümiqo, nongu no ithi anike Achaia lo Stephanas kibolomi paghino aküxü kililu, eno panongu ye küpülümi kümlapu lo tsaqütsalei acheni kehu

¹⁶ timi hitoi keqo sakiphe pape eno pano gholo mlaküqha akemi ngo akukuphumi gholulo.

¹⁷ Ni ye Stephanas, Fortunatus eno Achaicus noqo no ighi kelo alokivi shive, kughengu panongu no nongu züqhushi ighi no

¹⁸ I ghüthi püxütsü eno nongu ghüthi ghi püxü tsüe. Timi hitoi keqo ye gihuküzüe.

Pethakütsü

¹⁹ Asia qhalo akukuhouqo no petha nongu tsü ani. Aquila ngo Prisca, eno pama kilo akukuhou no Ampeu lono alokivi petha nongu tsü ani.

²⁰ Athiküzümi kümtsü no petha nongu tsü ani. Akimthe kümüma keu pesü lakhino lakhi ikhilu kilelo.

²¹ Ni, Paul ampi no I u pesü petha hipau yeani.

²² Timi khuu no Ampeu kimiye keu küha keno, pa ye angusüpu shipeni. Ighilo, ni Mpeu!

²³ Ampeu Jisüw küpükini nongu gholo apeniu.

²⁴ Khristo Jisü je lono Iw kikimiye nongu kümtsü lau apeniu. Amen.