1 Kor. 15 - Sumi Naga CL (Re-edited) Bible (BSI)

Khristo Xüchilekulu

¹ Athiküzümiqo, I no nongu lau atsakiviu pikülha keu, khikhi nongu no ikhilu no tipa shou puthugho ani keno ti pesü nongu kütü ani.

² Nongu no adou lono pülü püaghimo aye, I no nongu kütsü piyekeu tsa nongu no mtotoi tsüqülu keu lono nongu xalu nani.

³ Kughengu I no kiu ithulu keno ti ye ighono akhotou kepi nongu lau ikhiphe tsü: ti ye Kuchoyesü kiqi lono Khristo no ni ghenguno thive tsü,

⁴ Kuchoyesü kiqi lono Pa ye qhove eno aküthüni no xüputhuve,

⁵ eno Pa no Cephas zülo ipeghi, tishino apostolmi chighikini zülo ipeghie.

⁶ Tishino ghuthu lakhi lo athiküzümi 500 shou zülo ipeghi, panongu khami ye zühuve akemu kutomo no itehimu xüaphie.

⁷ Tithiu Pa no James zülo ipeghi, tishino apostolmi kümtsü zülo ipeghie.

⁸ Ashekha shi, Pa no ni ado tomphi lono punu keu nga toikeu lau ipeghie.

⁹ Kughengu ni ye apostolmi gholo akimkheu, I no Alhou kukuhou shikighime chekehu ni ye apostolmie pi kuküzüpu kumoe.

¹⁰ Ikemu I no kiu keno, ti ye Alhouw küpükini vecheo ke, eno Paw küpükini I tsükeu ye adou shivemoe. Tishike kumono apostolmi kütami nguno alau I no mlache, kuchou no I no shiluke kumono I gholo akeu Alhouw küpükini noke.

¹¹ Tighenguno I no kütsü püaghi na, panongu no kütsü püaghi namu ningu no sheshu eno nongu no pülülue.

Kithimi Xüchilekulu

¹² Tsala Khristo pesü akithi lono xüputhuve keu sheshu cheni aye, nongu gholo khami ye kishino kithimi xüchilekulu kühae piani kea?

¹³ Kithimi xüchilekulu kühae pi aye, Khristou ghi xüputhu püa movae;

¹⁴ Eno Khristo xüputhu püaghimo aye, ningu kükütsü ye adou eno nongu küpülü ghi adoue.

¹⁵ Tinguno alau ningu ye Alhouw kichile thopimi shiauvae, kughengu kithimi xüputhu mlae pikeu no kuchou shiaghi aye, Alhou no Khristo xüputhumo namu ningu ye Pa no Khristo xüputhu kepi ashepe shike.

¹⁶ Kughengu kithimi xüputhu cheghimo aye, Khristou ghi xüputhu püamoe.

¹⁷ Eno Khristo xüputhu püaghimo aye, nongu küpülü ye abokümsa eno nongu ye no xine lo aphie.

¹⁸ Tishino khunoqo Khristo laumi shi zühuve akeno, panongu ye pühavae.

¹⁹ Ningu no hipa yeghi lo küxü ghengu likhino Khristo lau lajupu acheghi aye, ningu ye timi kümtsü nguno alau ahasapu shivae.

²⁰ Ikemu mtsüqheino Khristo ye akithi lono xüputhuvae, zühuve kemi gholo Pa no amsüu xathi ke.

²¹ Kughengu timi lakhi vecheo akithi ighi ketoi, timi lakhi vecheo kithimi xüchilekulu ghi ighie.

²² Adam vecheo timi kümtsü thive ketoi Khristo gholono kümtsü püxüve nani.

²³ Ikemu hipau kikithi lono shinani: Khristo no amsüu xathi, tithiu Pa ikighi lono Pa lau akeqo xüputhu nani.

²⁴ Eno kughou Pa no ayekipe, kükagha, eno aküka kümtsa kütsave kethiu kükaqha pesü Apu Alhou tsüveni keno, tileno ashekha tsala ighi nani.

²⁵ Kughengu Alhou no Pa ghümi kümtsü Pa pukhu philo qhitsü moke kutolo Pa no ayepe masae.

²⁶ Aghümi ashekhau kütsa masakeu ye akithi ke.

²⁷ Kughengu “Alhou no thokha pa pukhu philo qhive tsüae.” Ikemu kughou “Thokha Pa pukhu philo qhitsü” ipi keno, ti ye mtsümishei Alhou khuu no thokha Khristo qholo qhitsü keno, Pa ampi ye kihisü amoe.

²⁸ Kughou thokha Pa qholo qhitsü ani keno, tileno Anu ampi ghi thokha Pa qholo qhitsükeu Lhou qholo shinani, tishikeu lono thokha kümtsü lo Alhou likhi niye ke.

²⁹ Tishimo aye, timiqo no kithimi züqhushi baptiz lukeu kiqi ye kiu kea? Kithimi ye khilemu xüputhu chemoe pi aye, kushiye timiqo ye kithimi züqhushi baptiz lucheni kea?

³⁰ Kushiye ningu ye atüqhüdo kümtsü lo kümsapu lo acheni kea?

³¹ Athiküzümiqo, ni Mpeu Jisü Khristo gholono I no nongu jupe qheza chekeu huno I pelo hipau shuphelu ani peke, ni ye tsalakipetsü thive acheni!

³² Ashi gholau no pini keloye, I no Ephesus lo tüghashiqo sasü kichighike ghenguno ni ye kiu ala shi ani kea? Kithimi xüputhu cheghimo aye, “Ningu chusho ani nolo, kughengu thoghiu ningu ye thiniae.”

³³ Nongu pishiqhivepe kevilo: “Aküsami lhoksa no ghushoghili kivi shipüsave cheni.”

³⁴ Nonguw shokümzü küzü lono ithuvelo, tino achipi ke, eno axine shikithe akevilo. Kughengu khami ye Alhou mthae. Nongu shikujo nike ni ye hi piani.

Xüchilekulu Phimpi

³⁵ Ikemu khami no ighiju nani, “Kithimi ye kishi xüputhu cheni kea? Panongu ye kiutoi keu phimpi punani kea?”

³⁶ No aghüzüu! Nono kiu yisü keno, tipau thimphi kutolo aküxü lhoipeghi chemoe.

³⁷ Eno nono kiu yisü keno ti ye lhoipeghi niye akeu bo kumoe, ikemu ti ye ashothi momu kiukiu xüthimu shiaghi luvi.

³⁸ Ikemu Alhou no Pa pulou lono alothi tipau abo tsücheni, eno pütüta lothi kiqi lono abo tsücheni.

³⁹ Kughengu ashi phimpi kümtsü aphiphi kumoe, ikemu timi phimpi küta, tüghashi küta, aghauqo küta, eno akhaqo kütake.

⁴⁰ Atsütsü lo eno ayeghi lo akeqo phimpi ani, ikemu atsütsü lo jukivi küta eno ayeghi lo jukivi kütake.

⁴¹ Khetsünhe jukivi küta, aqhi jukivi küta, ayepuqo jukivi küta; eno ayepuqo dolo ghi ajukivi kütüqü ani.

⁴² Kithimi xüchilekulu ghi titoi ke. Kiu yisü ani keno ti ye tsümave cheni; kiu xüputhu keno ti ye thikithe moae.

⁴³ Aphimpi ye juküsapu shi qhove cheni; ikemu jukighilepu shi xüputhu nani. Miqemlei qhove cheni ikemu akumtoshi xüputhu nani.

⁴⁴ Alhoaye phimpi qhove cheni; ikemu aghungu phimpi shi xüputhuve nani. Alhoaye phimpi ani aye, aghungu phimpi ghi anike.

⁴⁵ Ishi yepüake toi: “Timi atüghüu Adam ye aküxüküa shi lhoke”; ikemu ashekhau Adam ye aküxüküa Ghungu ilhouve.

⁴⁶ Alhoaye phimpi no atüghüu, tithiuno aghungu kethono aghungu paghike kumoe.

⁴⁷ Timi atüghüu ye ayeghimkhu no lhoke; Timi akiniu ye kungugha lono ighie.

⁴⁸ Khunono ayeghi laumi keno pano ye ayeghimkhu lono lhokeu timi hutoike, eno kungugha laumi no kungugha lono ighikeu Timi hutoike.

⁴⁹ Ningu no ayeghimkhu no lhokeu timi jukimihi pepu aketoi kungugha lono ighikeu Timi jukimhi ghi pepu nani.

Tuqhou eno Tokulu

⁵⁰ Athiküzümiqo, I no hi piani: ashi eno aji ye Alhou yekipe ighimla nani, momu thiveni keu ye thimoni keu mheghi ighimla nani.

⁵¹ Julo! I no nongu vilo tuqhou küsü püakeu tsa piani. Ningu kümtsü no thivemo nani, ikemu kümtsü no kilive nani,

⁵² pai anhekütsü khavi, afuko ashekhau igha kemtsa ningu kümtsü kilive nani. Kughengu afuko igha nani, kithimi pesü thi kithemo kepushi xüputhuve nani, eno ningu ye kilive nani.

⁵³ Kughengu hi tsümaveni keu phimpi ye tsümamoni keu pepuve masa, eno thiveni keu phimpi ye thimoni keu pepuve masae.

⁵⁴ Kughou tsümave kepu phimpi no tsümamoni keu pepuve, eno thiveni keu phimpi no thimoni keu pepuveni keno, tileno ishi yepüakeu kipitsa shikupu nani: “Tokulu no akithi munovae.”

⁵⁵ “O akithi, ow tokulu khile ani kea? O akithi, ow qükepu sahu khile ani kea?”

⁵⁶ Akithiw qükepu sahu ye axine, eno axine küka ye Ayezah ke.

⁵⁷ Ikemu Alhou khuu no ni Mpeu Jisü Khristo vecheo tokulu ningu tsü keno Pa shikimthi.

⁵⁸ Tighenguno, I qhuu I thiküzümiqo, mtotoi puthugholo, itha kevilo, alhokuthu Ampeu kümla pekho tsüalo, kughengu Ampeu lau mlaitha akeu ye adou shivemo nanie pi nongu no ithi anie.