1 Kor. 13 - Sumi Naga CL (Re-edited) Bible (BSI)

Kikimiye Laghi

¹ Tsala I no timi eno kungumi mili lono pi aghi namu kikimiye küha aye, ni ye ayikihe ghügha momu küghapayi ghügha paphi ke.

² I no tungkuptsa pikulupu küka aghi no tuqhou küsü püakeu ngo akighithi jeli kümtsü vethalu, eno naghutoqo tukiqhelu kepu küpülü aghi namu kikimiye küha aye, ni ye kiumu kumoe.

³ I no aghikeu kümtsü pesü tsüve, eno I phimpi pitive peniye ikhiphetsü aghi namu kikimiye küha aye ni ye kiumu ala shiamoe.

⁴ Kikimiye ye kheakulu eno amlo ighiqhiyi; kikimiye ye aghichipo chemo, qhezalaki chemo; akuchhoma shichemo;

⁵ momu mkamihi chemoe. Kikimiye ye aghükha shichemo; pai amloide chemo momu alhoksa hekütsü kiyi chemoe.

⁶ Kikimiye ye alhoksa jupe alovi chemo, ikemu kuchou gholo alovi cheni.

⁷ Kikimiye ye kümtsü kutuulu cheni, kümtsü pülübe cheni, kümtsü lajube cheni, kümtsü puqhelu cheni.

⁸ Kikimiye ye khilemu kishekhave chemoe. Tungkuptsa ghi hauve nani, amilikithe tsa eno akighithi ghi kishekhave nani.

⁹ Kughengu ni kighithi eno niw tungkuptsa ye kupukülai mphi,

¹⁰ ikemu kughou no kupukülai keu ighini keno, tileno kupukümla ye hauve nani.

¹¹ Kughou I no itimi shiche keno, ni ye itimi toi piche, itimi toi kümsüche, itimi toi kiqikuto juche. Kughou I no kichimi shive keno, ni ye itimi ghilisüqe qhikhave.

¹² Kughengu itehi ningu ye ahiju lo jusü akeshi yekibideu ithulu ani, ikemu hithiu ye agi no agi kinheqhe ithulu nani. Itehi ni ye ithipixi aphi, ikemu Alhou no qhoi ni ithi aketoi hithiu ye I no qhoi ithive nani.

¹³ Tishiaye aküpülü, lajupu eno kikimiye hipano küthü ani; ikemu hipaqo gholo akiqheu ye kikimiye ke.