1 Kor. 12 - Sumi Naga CL (Re-edited) Bible (BSI)

Aghungulo Gho

¹ Athiküzümiqo, aghungulo gho tsalo ni ye nongu pelo mthano apenishi amoe.

² Nongu no ithi anike kughou nongu no Alhou mthano ache keno kiukiu gholau nomu nongu sasü atsa pikümla julho lau wuve cheke.

³ Tighenguno ni ye nongu pelo ithi penishi ani, Alhou Ghungu lono atsa pi kemi khunomu, “Jisü ye müsüinivae!” ipi chemoe eno khunomu Aghungu Kimthe no sachemo aye, “Jisü ye Ampeu” ipi mlae.

⁴ Agho jeli kütüta ani, ikemu Aghungu ye lakhie;

⁵ akümlapu jeli kütüta ani, ikemu Ampeu ye lakhie;

⁶ akümla küghütha jeli kütüta ani, ikemu peithalu peni keu küka ye Alhou noke.

⁷ Aqo kivipu ghenguno milakhikhi lau Aghungu akeu pephe piye cheni.

⁸ Kughengu milakhi lau Aghungu vecheo alokütsü tsa pikulupu tsü püani, eno lakhiu lau Aghungu tipau no akighithi tsa pikulupu tsü püani,

⁹ Aghungu tipau no kütami lakhiu lau aküpülü tsü püani, lakhiu lau shikipivi gho tsü püani.

¹⁰ Lakhi lau akümzapu kümla shikulupu tsü püani, lakhi lau tungkuptsa pikulupu, lakhi lau aghungu jeli kimchi kütüta shikulupu, lakhi lau amilikithe tsa jeli pikulupu, lakhiu lau amilikithe tsa pekide kulupu tsü püani.

¹¹ Hi kümtsü Aghungu lakhi eno athono tsü püani, eno Pa pulou lono Pa no lüthü lakhikhi lau tsü püani.

Aphimpi lo Aphiau Jeli

¹² Aphimpi lakhi lo aphiau jeli kutomo aketoi eno aphiau jeli kutomo no aphimpi lakhi lo aketoi, Khristo gholo ghi titoi ke.

¹³ Kughengu Aghungu lakhi lono ningu kümtsü aphimpi lakhi lo baptiz shisüe—Jewmi momu Greekmi na, aqüaxemi momu ghoshixümi namu—eno kümtsü pelo tipau Ghungu yelu peke.

¹⁴ Kughengu aphiau lakhi likhi no aphimpi ke kumoe, ikemu kutomo noke.

¹⁵ Tsala apukhu no, “Ni ye au kumo keke aphimpi gholo kumoe” ipi aye, apukhu ye aphimpi gholo kumove ake kumoe.

¹⁶ Akini no, “Ni ye anhethi kumo keke aphimpi gholo kumoe” ipi aye, akini ye aphimpi gholo kumove ake kumoe.

¹⁷ Tsala aphimpi kuchopu anhethi shiveke aye, khileno chiluni chekea? Aphimpi kuchopu no akini shiveke aye khileno tsüngü luni chekea?

¹⁸ Ikemu kuchou loye Alhou no Pa pulou lono aphimpi lo aphiauqo kithikiyi püatsü ke.

¹⁹ Aphiau jeli kümtsü lakhi likhi shiaghi aye, aphimpi ye khilaveni chekea?

²⁰ Ikemu kuchou loye aphiau jeli kutomo ani kemu aphimpi ye lakhi ke.

²¹ Anhethi ye au vilo ishi pimlae, “Ni ye no avehupu shiamoe,” momu akütsü ye apukhu vilo, “Ni ye no avehupu shiamoe,” ipi mlae.

²² Tishike kumono aphimpi lo aphiau khikhi no miqemlei kepi cheni keno, tipaqo sümo kelo kiumu shimlae.

²³ Nino aphiau khipaqo akhoto kumo kepi kümsü cheni keno tipaqou agigihu kije tsücheni, ni phimpi lo pekiphe shimla keu phiauqo ningu no alau tuchomjo cheni,

²⁴ eno pekiphe shilukeu phiauqo ye tishimo namu alomsümoe. Ikemu Alhou no hipa gholau no aphimpi kughuve tsü, ti ye aphimpi lo akhoto kumo keqou no agigihu kije tsüke,

²⁵ tishianguno aphimpi lo kijetha keu kühano aphiauqo pelo aphiphi shi lakhino lakhi tuchokile peniye ke.

²⁶ Aphiau lakhi no imeve aye, kümtsü no imeküqha cheni; lakhi no shekiqhe ithulu aye, kümtsü no alovi küqha cheni.

²⁷ Tishiaye, nongu ye Khristo phimpi ke, eno milakhi khino tipau lo kihimpemi ke.

²⁸ Alhou no akukuhou lo hitoi süsü püani: atüghüu no apostolmi, akiniu tungkupmi, aküthüu akükütsümi; tishino akümzapu kümlami, tishino shikipivi gho akemi, akukuphumi, saphekulumi, eno amili jeli lono pikemi.

²⁹ Kümtsü no apostolmi keshea? Kümtsü no tungkupmi keshea? Kümtsü no shikükami keshea? Kümtsü no akümzapu kümla shicheni keshea?

³⁰ Kümtsü no shikipivi gho ani keshea? Kümtsü no amili jeli lono picheni keshea? Kümtsü no pikide tsülu cheni keshea?

³¹ Ikehu agho akiqheu ithulu nike amlo tsülo. I no itaghi akighiche laghi lakhi nongu piyeni.