1 Kor. 11 - Sumi Naga CL (Re-edited) Bible (BSI)

¹ I no Khristo kimihi shike toi nongu ghi I kimihi shilo.

Akütsü Shonhapu keu

² Ni ye nongu akishe tsü ani, kughengu nongu no thokha lo I kümsülu eno I no nongu lau pekiye tsükeu khuaye papelu ke.

³ Ikemu ni ye nongu pelo ithi penishi akeu ye Khristo no kiptimi kümtsü shou akütsü ke, anipu shou ye li kimi no akütsü ke, eno Khristo shou Alhou no akütsü ke.

⁴ Kiptimi no pa kütsü shonhapu inikhu momu tungkuptsa pi aye, pa ye Khristo shipünha ani,

⁵ ikemu totimi khuu no akütsü shonhapu mono inikhu momu tungkuptsa pini keno li ye akimi shipünha ani, kughengu li ye akütsüsa miyeve ke paphi shivae.

⁶ Kughengu anipu no li kütsü shonhapu mo aye, li ye akütsü sa ikhonhei tsave kepue. Ikemu anipu lakhi ghenguno akütsüsa ikhonhei tsave momu miyeve keu ye akukujopu ke ghenguno li ye akütsü shonhapu kepue.

⁷ Kiptimi ye akütsü shonhapu kepu kumo, kughengu pa ye Alhou julho eno Alhou juküvüpu ke, ikemu totimi ye kiptimi juküvüpu ke.

⁸ Kughengu kiptimi no totimi launo lhophe ke kumono totimi no kiptimi launo lhophe ke.

⁹ Tike kumono totimi ghenguno kiptimi lhophe ke kumono kiptimi ghenguno totimi lhophe ke.

¹⁰ Ikehu kungumi ghenguno totimi ye li kütsü lo kükagha michipu aghi masae.

¹¹ Tishinamu Ampeu zülo totimi ye kiptimi launo kütüta shimla momu kiptimi ye totimi launo kütüta shimlae;

¹² kughengu totimi no kiptimi launo lhophe ketoi, kiptimi ye totimi vecheo punue; ikemu kümtsü Alhou launo ighike.

¹³ Nongu ampi no xathalulo: anipu no akütsü shonhapu mono Alhou lau inikhu keu ye achipi keshea?

¹⁴ Kiptimi no asa kushuo puaye ti ye pa shipünha anie pi alhoaye lonomu nongu shika mla keshea?

¹⁵ Ikemu totimi no asa kushuo pukeu ye li juküvüpu ke kumo? Kughengu li no asa akeu ye li küzülu peniye ke.

¹⁶ Khuana no hipa vehulo kütsala kepu aghimu, ningu na Alhou kukuhouqo namu hitoi keu shichemoe.

Ampeu Ghulhu

¹⁷ Itehi I no piniye akeu lo ni ye nongu akishe tsü amoe, kughengu nongu no kuho kumqo kelo akivipu kumono alhoksapu shiani.

¹⁸ Atüghüshi, kughou nongu no kuhoni keno nongu gholo kijethakile akeu I no chiluvae; eno tile kuchou hami aghi nani,

¹⁹ kughengu nongu dolo amqo kütüta aghini cheni, tishino khunono kuchou keno tipaqo kimchilu peniye ke.

²⁰ Kughou nongu no kuho kumqoni keno, nongu ye Ampeu Ghulhu chu chenike kumoe.

²¹ Kughengu ti chukelo nongu ye pütüta libe chuve no khami no müzüthi, khami no shomzüve cheni.

²² Kiua? Nongu ye chushoni ke pütüta ki küha keshea? Ikeo nongu ye Alhou kukuhou thaigha eno kumlhomi shikukujo niye kea? Ni ye nongu vilo kiu pini kea? Ni ye hipau lo nongu sheqhe luni keshea? Moe, ni ye tishimoe.

²³ Kughengu I no kiu Ampeu launo ithulu keno nongu lau ghi pikülha tsü, ike Ampeu Jisü pesü thechuveke ji Pa no asho ikhilu,

²⁴ eno kughou Alhou shikimthi tsü keno Pa no ti süpho eno pi, “Hi ye I phimpi, nongu ghenguno tsüve keu ke. I kümsüchilelu ghi hi shichelo.”

²⁵ Tipaphi lono aghulhu thiu Pa no ajukhu ikhilu no pi, “Ajukhu hipau ye I ji pesü puloshoqhi kithe shikeue. Nongu no hi shoke kümtsü lo I kümsüchilelu ghi hi shilo.”

²⁶ Kughengu nongu no khijehi asho hipau chu eno ajukhu ikhiluni keno, tijehi Ampeu ighi moke kutolo nongu ye Pa kithi pikülhatsü anike.

²⁷ Tighenguno khukhumu tsaqütsalei mono Ampeu sho chu momu ajukhu ikhilu keu ye Ampeu phimpi eno aji shou akipimi shi nani.

²⁸ Ikehu milakhi khino chheju no tithiuno asho chu eno ajukhu ikhilu lo.

²⁹ Kughengu khuu no aphimpi kiqi michimla no asho chuni eno ajukhu ikhiluni keno, pa ampi shou küghakütha süghi kepushi chusho ani.

³⁰ Hi ghenguno nongu kutomo no qeinai eno küsükini shi ani eno khami ye thivae.

³¹ Ikemu ningu no kuchou no ningu ampi chheju aye, ningu ye küghakütha lo ilomo nani.

³² Tishimu kughou Ampeu no ningu shou küghathabeni keno, ti ye ningu shikümzü ani, tishianguno ningu ye ayeghiqha gholono kileqhive pemo niye ke.

³³ Tighenguno I thiküzümiqo, kughou nongu no Ampeu Ghulhu chuni ye kumqoni keno lakhino lakhi khekilelo—

³⁴ khuana no müzüthi aghi aye, pa ye aki lono chuvelo—tishianguno nongu no kumqo kelo nongu shou küghathabe monani. Kütau vehuqo ye I no ighi kelono kiche tsüni.