1 Kor. 10 - Sumi Naga CL (Re-edited) Bible (BSI)

Ajulho ghenguno Ghutu

¹ Athiküzümiqo, ni ye nongu pelo ithi penishi ani, ni puasüqo kümtsü no khüngküsü qholono cheche eno kümtsü no azüghi kathasü wue,

² kümtsü no Moses pape khüngküsü ngo azüghi lono baptiz shi,

³ kümtsü no aghungu lo chuqupu chu,

⁴ eno kümtsü no aghungu lo zü yeke. Kughengu panongu no pano pape chekeu ghungu Tuqu lono azü yeke, eno Atuqu tipau ye Khristo ke.

⁵ Ikeghi, Alhou ye panongu kutomo shou amlo qimove, ikehu asayeqha lono panongu apanaghave.

⁶ Thime hipaqo ye ningu ghenguno kichekipiye ke, ningu pelo panongu toi alhoksa thime kümsü pemo niye ke.

⁷ Panongu khami toi nongu ye ajulho kümllami shikevilo; ishi yepüake toi, “Timiqo no chushoni ye iqa eno ilhe niye ithue.”

⁸ Panoqo khami toi ningu ye kipti-toti dolo mithekumo shikepu kumoe, kughengu ghulo lakhi lono pano 23,000 ikiqi thiveke.

⁹ Ningu ye Khristo peju kepu kumoe, kughengu panongu khami no tishi kelono apighi no mighiqhive,

¹⁰ momu muchho kepu kumoe, kughengu panongu khami ye tishi kelono Akithi Ghawu no panongu pithive ke.

¹¹ Hi kümtsü kichekipiye shi panongu shou ikughi kemu ningu ghutu ghi tipaqo yepe qhitsüe, kughengu ningu ye ashekha ghuloki lo ayae.

¹² Tighenguno khukhumu mtotoi puthugho ani aye pa ye veqhimo kepushi jukutolo.

¹³ Timi lau ghukuju ighi chekeu nguno alau ye ghukuju kiumu nongu shou ikughi mphi. Alhou ye pükhükulupu, eno Pa ye o kumto qhemi nguno alau o ghuju pemo nani, ikemu ghukuju gholono, o pelo polupe kepu laghi tsü nani, tishikeu lono o pelo puqhelu penani.

¹⁴ Tighenguno, I no kimiye chekeqo, ajulho kümlla lono povelo.

¹⁵ Ni ye alokütsümi pütsa aketoi piani; I no kiu piani keno nongu ampi no xathalulo.

¹⁶ Kükümgha jukhu ningu no pesü shikimthi tsü chekeu ye Khristo ji gholo kutupo anike kumo? Asho khikhi ningu no süpho cheni keno, ti ye Khristo phimpi gholo kutupo anike kumo keshea?

¹⁷ Asho no lakhi ketoi, ningu ye kutomo kemu aphimpi lakhie, kughengu ningu kümtsü asho lakhi lono küsaje ke.

¹⁸ Israelmi ghili kümsü julo; khunono akümllagho chucheni keno panongu ye akiptia lo kuposhu anike kumo keshea?

¹⁹ Tishiaye ni ye kiu piani kea? Ajulho mllakeu chuqupu ye kiuala keo ajulho no kiuala kea?

²⁰ Moe, I no pi akeu ye Alhou kümthami no aghashi keu ye tüghami mlla ani thono Alhou mlla amoe. Ni ye nongu pelo tüghami sasü kuposhu penishi amoe.

²¹ Nongu ye Ampeu jukhu lo sho püzü tüghami jukhu lo ghi shomlae. Nongu ye Ampeu ghulhu lüpa lo chuno tüghami ghulhu lüpa lo ghi chumlae.

²² Ningu ye Ampeu nhekushupu xukuthoni keshea? Ningu ye Pa nguno akumtou keshea?

Ampeu Juküvüpu Shilo

²³ “Thokha ayezah lono shilu nani,” ikemu kümtsü ala shilu chemo. “Thokha ayezah lono shilu nani,” ikemu kümtsü shiqhe pukulu chemoe.

²⁴ Timi khumu pa kivipu phukepu kumoe, ikemu pa kisüghüu kivipu phukepue.

²⁵ Ashi kije-a lo kiu je aghini keno kiviküsa lotsü ghüza monike kiumu iniju kevino kiu kiumu chulo.

²⁶ Kughengu “Ayeghi eno tile akeu kümtsü Ampeuw ke.”

²⁷ Pülümokemi lakhino aghulhu lo o kusü kelo nono wukepu shive aye, kiviküsa lotsü ghüza monike o zülo kiu qhitsü keno kiumu iniju kevino chulo.

²⁸ Ikemu khuana no o vilo “Hi ye ajulho mllave keue,” ipi aye, khuu no o vilo pi keno, pa ghenguno eno kiviküsa lotsü ghenguno chu kevilo—

²⁹ ni ye ow kiviküsa lotsü piamoe, ikemu paw pi anike. Kughengu kushiye kütami kükümsü no I pulou shou küghathabe apeni kea?

³⁰ I no shikimthi qhiyi chu aye, kushiye I no shikimthi tsükeu ghenguno I pipüsa apeni kea?

³¹ Tighenguno, nongu no chuna shona kiukiu shinamu kümtsü Alhou juküvüpu ghenguno shilo.

³² Jewmi na, Greekmi na, Alhou kukuhou namu, khuu laumu akipimi tsü kevilo,

³³ ni ghi I no mlakeu thokha lo kümtsü pulou shinike pükapütsa cheni, ni ye I kivipu phumo no kutomo kivipu phu acheni, tishikeu lono panongu xalu niye ke.