1 Kor. 1 - Sumi Naga CL (Re-edited) Bible (BSI)

Pethakütsü

¹ Paul, Alhou pulou vecheo Jisü Khristow Apostol shi penike kulu keu, eno ni thiküzüu Sosthenes nikujo no,

² Corinth lo Alhou kukuhou, Khristo Jisü launo shikimtheve kemi, aqha kümtsü lo ni Mpeu Jisü Khristo jeku chekemi gholo süküqha no küpülümi shipenike kuluve keqo lau ye ani:

³ Ningu Papu Alhou eno Ampeu Jisü Khristo launo küpükini ngo aloino keu nongu tsü ani.

Shikimthikütsü

⁴ Jisü Khristo vecheo Alhouw küpükini nongu tsükeu ghenguno, ni ye alhokuthu Alhou shikimthi acheni,

⁵ kughengu nongu ye Pa launo atsapi eno akighithi kümtsü lo kinikülü shilue—

⁶ ti ye Khristo ghili pesü ashepe shikeu nongu gholo mtotoilu ke—

⁷ tishianguno ni Mpeu Jisü Khristo pephe piyeni keu khe akelo, nongu ye aghungulo gho kiumu mikheve amoe.

⁸ Pa no ashekha kutolo nongu shikumto no ni Mpeu Jisü Khristo tsala lo küqü mono aghi penani.

⁹ Alhou ye pükhükulupu, Pa vecheo nongu kusawo Pa nu, ni Mpeu Jisü Khristo gholo kuposhulu peke.

Akukuho lo Kijethakile

¹⁰ Athiküzümiqo, ni Mpeu Jisü Khristo je lono I no nongu qhüiniju anike nongu kümtsü no pulo küqhalulo, nongu gholo kijethakile kevi, ikemu akükümsü lo eno küghakütha lo küqhakulu shilo.

¹¹ Kughengu I thiküzümiqo, nongu dolo mtomshu anie pi Chloe no bolomi no I vilo pivae.

¹² I no piakeu ye hike: nongu lakhikhi no piani, “Ni ye Paul laumi,” “Ni ye Apollos laumi,” “Ni ye Peter laumi,” momu “Ni ye Khristo laumie.”

¹³ Khristo ye kijethave akeshea? Paul no nongu ghenguno kros lono thive keo? Nongu ye Paul je lono baptiz shi keshea?

¹⁴ I no Alhou shikimthi akeu ye, Crispus ngo Gaius pama nguno alau ye ni ye nongu khumu baptiz shitsü püamoe,

¹⁵ ikehu timi khumu pa ye I je lono baptiz shi kepi pimlae.

¹⁶ (Kumchomaghi, ni ye Stephanas no kibolomi ghi baptiz shitsü kena; ikemu tinguno alau ye khumu baptiz shitsü kemo keno ni ye mthae.)

¹⁷ Kughengu Khristo no I puwu keu ye baptiz shipeniye ke kumoe ikemu Atsakiviu pikülha peniye ke, alokütsü tsa pikithi pesü kumoe, tikumo aye Khristow kros küka ye abokümsa shiveni cheke.

Khristo ye Alhou Lokütsü eno Aküka

¹⁸ Kughengu pühave akemi ghenguno kros tsa ye mbomzüe; ikemu ningu xaluve akemi ghenguno ti ye Alhou kükake.

¹⁹ Kughengu ishi yepüani: “I no alokütsümi lokütsü shipühave tsü nani, eno vethakulumiw vethakulu kütsave tsü nani.”

²⁰ Alokütsüu khile ani kea? Ayezah shikükau khile ani kea? Hipa tiqheli lo kighekithiu khile ani kea? Alhou no ayeghi lo lokütsü pesü mbomzü shivetsü ake kumo?

²¹ Kughengu Alhou lokütsü kiqilo ayeghilomi no Alhou ithimo keke niw mbomzü kükütsü vecheo khunono pülülu keno tipaqo xalu keu no Alhou lopu shilue.

²² Kughengu Jewmi no amchipu khucheni eno Greekmi no alokütsü phucheni,

²³ ikemu ningu no Khristo yedave keu kütsü cheni, ti ye Jewmi ghenguno apukhu küpsüpu eno Jewkumomi ghenguno mbomzü vehu,

²⁴ ikemu khunoqo kuluve akeno, Jewmi na Greekmi namu, panongu ghengu ye Khristo no Alhou küka eno alokütsü ke.

²⁵ Kughengu Alhouw mbomzü ye timi lokütsü nguno alokütsü, eno Alhouw miqemlei keu ye timi kükakumto nguno akumtoue.

²⁶ Athiküzümiqo, nongu kulu keu kümsükuto julo. Ayeghi lo küxü gholau ye nongu gholo kutomo no alokütsümi kumo, ghüsükulumi kumo, momu ghenimi kumoe.

²⁷ Ikemu alokütsümi shikujo niye Alhou no ayeghi lo kiu no mbomzü keno ti kishelu; eno akumtomi shikujo niye Alhou no ayeghi lo kiu no miqemlei keno ti kishelue.

²⁸ Ayeghi lo akhotopu thimeqo pesü avehu kühave tsüniye Alhou no chuninhei eno jukünatha kemi, eno avehu kühakeu thimeqo kishelu,

²⁹ tishianguno Alhou zülo timi khumu qheza pemo niye ke.

³⁰ Pa ghenguno nongu ye Jisü Khristo lau kimepe ani, ni ghenguno Khristo ye Alhou launo ighikeu lokütsü, amikucho, shikimthekütsü, eno xachilekulu ke.

³¹ Tighenguno ishi yepüa ketoi, “Khuu no qhezani keno Ampeu küdau no qheza pelo.”