1 John 5 - Sumi Naga CL (Re-edited) Bible (BSI)

Ayeghi shou Theqhikulu

¹ Khunono Jisü ye Messiah kepi pülü cheni keno pa ye Alhou nuli, eno khunono Apu kimiye cheni keno Alhou nuli shiluve kemi kütami ghi kimiye cheni.

² Kughou ningu no Alhou kimiye no Pa zakütsüqo peluni keno, ningu ye Alhou nuliqo kimiye cheni kepi hipau lono ithi cheni.

³ Kughengu Alhou kikimiye ye ningu no Pa zakütsüqo pelu keu lono ke. Eno Pa zakütsüqo ye puqhe kümlapu kumoe.

⁴ Kughengu Alhou nuli shive kemi no ayeghi theqhilu cheni. Eno ni küpülü huno ayeghi shou tolu cheni.

⁵ Jisü ye Alhou Nu kepi pülü chekemi nguno kütami khuu no ayeghi theqhilu nani kea?

Alhou Nu Ghenguno Ashepe

⁶ Hi ye, Khuu azü eno aji pesü ighi keno—Jisü Khristo huke; azü likhimu kumo ikemu azü eno aji kinikujo ke. Eno Aghungu no kuchou kepi ashepe shitsü, kughengu Aghungu ye kuchou huke.

⁷ Ashepe shitsü kemi küthü ani:

⁸ Aghungu, azü eno aji; eno hipano küthü ye puloküqha cheni.

⁹ Timi shepekishi ghi ningu no ikhilu cheghi aye, Alhou shepekishi no akijeue, kughengu hi ye Alhou no Pa Nu ghenguno ashepe shikeu ke.

¹⁰ Khukhumu Alhou Nu shou pülübe keu ye pa lolo hipau shepe ani. Khukhumu Alhou shou pülübemo keu ye Alhou pesü akimkiu shive tsüae, kughengu Alhou no Pa Nu ghenguno ashepe shikeu pa no pülübemo kehue.

¹¹ Ashepe ye hike: Alhou no lhokta küxü pesü ningu tsü, eno aküxü hipau ye Pa Nu lau ani.

¹² Khukhumu Anu pesü paw shiluve keu ye aküxü ani; khukhumu Anu pesü paw shimo keu ye aküxü kühae.

Nongu no Ithi Peniye ke

¹³ Nongu khunono Alhou Nu jelo pülübelu keu lono lhokta küxü anani pi ithinishi cheni keno, ni ye nongu lau hipaqo ye ani.

¹⁴ Ningu no Alhou lau amlo kuloghipu akeu ye hike: nino kiu kiumu Pa pulou lono khu aye Pa no chilutsü nani.

¹⁵ Eno nino kiu kiumu khu kelo Pa no chilutsü cheni kepi ningu no ithi aye, ningu no Pa lau qhüiniju püakeu ye niw shilu nani kepi nino ithitoi ani.

¹⁶ Khuana no pa thiküzümi lakhino akithipu kumo xine shi aghi keu ithulu aye, Alhou lau khulo, eno Alhou no aküxü pesü akithipu kumo xine shive kemi tsü nani. Akithipu lo sailove chekeu xine ghi ani; tipau ghenguno inikhu kepue pi ni ye piamoe.

¹⁷ Akumou kümla kümtsü axine ke, ikemu akithipu lo sailo chemo keu xine ghi acheni.

¹⁸ Ningu no ithi anike Alhou nuli shiluve kemi kümtsü no axine shiauve chemo, ikemu Alhou launo ighi keu huno pa süsho acheni, eno alhoksau ye pa bulu chemoe.

¹⁹ Ningu ye Alhou laumi kepi nino ithi ani, eno ayeghiqha ye kümtsü alhoksau küka qholo ani.

²⁰ Ningu no ithi akeu ye Alhou Nu no ighi püzü vethakulu pesü ningu tsü püani, tishianguno Khuu no kuchou keno ningu no ithi peniye ke, eno ningu ye Khuu no kuchou keno Pa lau, Pa Nu Jisü Khristo lau kimepe anie. Pa ye kuchou Lhou eno lhokta küxüe.

²¹ Atianuliqo, nongu ye kichileu lhou julhoqo launo putosü lulo.