1 John 4 - Sumi Naga CL (Re-edited) Bible (BSI)

Kuchou eno Kichileu Ghungu

¹ Kimiye chekemiqo, aghungu jeli kümtsü pülü kevilo, ikemu tipaqo ye Alhou launo kemo keno ithini ke chhejulo, kughengu ayeghiqha lo kichile tungkupmi kutomo ipeghivae

² Alhou Ghungu ye nongu no hipau lono michilu nani: Alhou launo ighikeu Ghungu huno Jisü Khristo ye ashi phimpi xapusü Alhou launo ighie pi shuphe nani,

³ ikemu Jisü je shuphemo keu ghungu ye Alhou launo kumoe. Hi ye khikhi ighini chenie pi nongu no chiluche püzü itehi ayeghiqha lo ighive akeno, kichileu Khristo ghungu huke.

⁴ Atianuliqo, nongu ye Alhou laumi eno kichile tungkupmi theqhi luvae, kughengu nongu lolo Khuu ani keno Pa no ayeghi lo akeu nguno akijeu ke.

⁵ Panongu ye ayeghilomi ke ghenguno ayeghi gholau no picheni; eno ayeghilomi no pano tsapi ini cheni.

⁶ Ikemu ningu ye Alhou laumi ke. Khunono Alhou ithi ani keno ni tsapi initsü cheni; eno khunono Alhou laumi kumo keno ni tsapi initsü chemoe. Hipau lono ningu no Kuchou Ghungu eno kichileu ghungu michilu cheni.

Alhou ye Kimiyekiniu

⁷ Kimiye chekemiqo, ningu lakhino lakhi kimiyekileni nolo, kughengu kikimiye ye Alhou launo ighi ke, khunono kimiye cheni keno Alhou nuli shiluvae eno Alhou ithitoi ani.

⁸ Khunono kimiye chemo keno Alhou ithi chemoe; kughengu Alhou ye kimiyekiniu ke.

⁹ Alhou kikimiye ningu gholo pephetsü keu ye hipau lono ke: Alhou no Pa Nu lakhi akeu pesü ayeghi lo puwu, tishianguno ningu pelo Pa vecheo xülu peniye ke.

¹⁰ Kikimiye ye hipau lo ani: ningu no Alhou kimiye ke kumono Pa no ningu kimiye eno Pa Nu pesü ni ghenguno axine kümllagho shive penike puwue.

¹¹ Kimiye chekemiqo, Alhou no hitoi ningu kimiye püaghi aye, ningu ghi lakhino lakhi kimiye kepue.

¹² Timi khunomu Alhou ithulu mphi; ikemu ningu no lakhino lakhi kimiye kile aye, Alhou ye ningu lolo ani eno Paw kikimiye no ni lolo kupukülailu ani.

¹³ Hipau lono ningu ye Alhou lau kimepe ani eno Pa no ni sasü kimepe ani kepi nino ithilu ani, kughengu Pa no Pa Ghungu pesü ningu tsüvae.

¹⁴ Ningu no ithulu no ashepe shi anike Apu no Pa Nu pesü ayeghiqha Xakuluu shipeniye puwue.

¹⁵ Khukhumu Jisü ye Alhou Nu kepi piphetsü keu ye Alhou lau kimepe ani eno Alhou no pa lolo ani.

¹⁶ Ikehu Alhou no ni ghenguno kikimiye kije akeu ningu no ithitoi luno pülübe luvae. Alhou ye kimiyekiniu ke, khunono kikimiye lo acheni keno Alhou lau kimepe ani eno Alhou no pa sasü kimepe ani.

¹⁷ Hipa ghola lono kikimiye ye ningu lolo kupukülailu cheni, tishianguno ningu ye küghakütha tsala ghenguno amlo kuloghi shilu nani, kughengu ayeghiqha zülo ningu ye Khristo kimihi shilu masae.

¹⁸ Kikimiye loye akümsapu kühae, ikemu kupukülai keu kikimiye no akümsapu hapheve tsü cheni. Kughengu msaighü keu ye aghimepu kiqi ghike, khunono msaighü cheni keno kikimiye lo kupukülai lumphie.

¹⁹ Ningu no kimiye kile chekeu ye Alhou paghino ningu kimiye kehue.

²⁰ Khuana no, “Ni ye Alhou kimiye cheni” ipi no pa thiküzümi mithi cheghi aye, pa ye kimkimi; kughengu khunono pa no ithulu chekeu thiküzümi kimiye chemo keno, pa ye ithulu chemo keu Lhou kimiye mlae.

²¹ Ningu no Alhou launo azakütsü ithulu keu ye hike: khunono Alhou kimiye cheni keno pa thiküzümi ghi kimiye masae.