1 John 3 - Sumi Naga CL (Re-edited) Bible (BSI)

¹ Apu no kiu toi keu kikimiye pesü ningu tsüve akeno kiqi julo, ningu pesü Alhou nuli kepi kuvetsü no kuchou nomu ningu ye tishi luvae. Ayeghilomi no ningu ithimo keu kiqi ye panongu no Alhou ithimo kehue.

² Kimiye chekemiqo, itehi ningu ye Alhou nuliqo ke, eno ningu ye kiu shive nani keno ti ye pephe mphi; ikemu nino ithi akeu no kughou Khristo no ipeghini keno ningu ye Pa toive nani, kughengu ningu no tileno athoshi Pa ithulu nani.

³ Eno khuu no Pa lau lajube cheni keno Pa no akimthe shike toi pa ghi pa ampi shikimthe luve cheni.

⁴ Khuu no axine kümla shicheni keno ayezah heküxa kümla ghi shicheni, axine ye ayezah heküxau ke.

⁵ Nongu no ithi anike Jisü ye axine süwuve tsüniye ighi ke, eno Pa küdau ye axine kiumu kühae.

⁶ Pa lau kimepe akemi khunomu axine shiauve chemoe; khunono axine shi auveni keno pa ye Khristo ithulu ke kumono ithi keghi ithi mphi.

⁷ Atianuliqo, khunomu nongu pishiqhipe kevilo. Khukhumu achipiu-mikucho pesü xüche kemi ye Khristo no amikucho kehu pa ghi amikucho ke.

⁸ Khukhumu axine kümla shiche keu ye tüghami laumi, kughengu tüghami ye abothu lono axine shisü ighivae. Alhou Nu no ipeghi keu kiqi ye tüghami kümlaqo kütsave tsüniye ke.

⁹ Alhou nuli shiluve kemi khunomu axine kümla shiuve chemoe; kughengu Alhou lhoaye ye pa lolo ani, eno pa ye Alhou nuli shiluve akehu axine shiauve mlae.

¹⁰ Khunono Alhou nuli eno khunono tüghami nuli keno hipau lono michilu ani: achipiu-mikucho pesü xümo kemi ye Alhou laumi kumo, tike kumo athiküzümi kimiyemo kemi ghi Alhou laumi kumoe.

Lakhino lakhi Kimiyelo

¹¹ Kughengu nongu no abothu lono atsape chiluve keu ye hipau ke, ningu ye lakhino lakhi kimiye kepue.

¹² Ningu ye Cain toi kepu kumo, pa ye alhoksau laumi eno pa thiküzüu Abel heqhi pithive. Pa ye kushiye pa thiküzüu heqhi pithive kea? Kughengu pa kümla ye alhoksa likhi eno pa thiküzüu kümla no amikucho kehue.

¹³ Athiküzümiqo, ayeghilomi no nongu mithi kelo nongu ye akichiqhi kevilo.

¹⁴ Ningu ye akithi hechesü aküxüpu lo ipeghivae pi ithi ani, kughengu ningu no athiküzümi kimiye acheni ke. Khunono kimiye kile chemo keno akithipu lo anie.

¹⁵ Khuu no pa thiküzümi mithini keno pa ye ghikiqhimi, eno ghikiqhimi ye alolo lhokta küxü kühae pi nongu no ithi ani.

¹⁶ Hipau lono ningu no kikimiye ithilu ani: Khristo no ningu ghenguno Pa küxü pephe tsüve kehu ningu ghi athiküzümi ghenguno ni küxü pephetsü kepue.

¹⁷ Ikemu khuana no ayeghi lo thime jeli aghi no pa thiküzümi no avesa akeu ithulu pülaghi pa mlo xükho move aye, kishino Alhouw kikimiye ye pa lolo ngoni kea?

¹⁸ Atianuliqo, ningu atsapi lo likhino shimoni, ikemu akümla eno kuchou lono kikimiye piyeni nolo.

¹⁹ Hipau lono ningu ye kuchou laumi eno Alhou zülo amlo kumto shikithelu ani kepi ithi nani;

²⁰ kughengu ni mlo no akipimi ningu tsü anamu Alhou ye ni mlo nguno akijeu eno Pa no thokha ithi ani.

²¹ Kimiye chekemiqo, tsala ni mlo no akipimi ningu tsümo aye, ningu ye Alhou zülo amlo kuloghipu ani;

²² eno kiu kiumu nino khu kelo ithulu cheni, kughengu ningu no Pa zakütsü pelu eno Pa pulou shi cheni kehue.

²³ Pa zakütsü ye hike: ningu ye Pa Nu Jisü Khristo jelo pülübe eno Pa no aza ningu tsüve ketoi lakhino lakhi kimiye kile masae

²⁴ Khukhumu Alhou zakütsü pape kemi ye Pa lau xükimelu ani, titoi Alhou ghi pa lolo ani, eno hipau lono Pa no tsükeu Ghungu huno ningu sasü xükimepe acheni kepi ningu no ithi ani.