1 John 2 - Sumi Naga CL (Re-edited) Bible (BSI)

Ni Ngulau Khristo

¹ I tianuliqo, I no nongu lau hipaqo yepuwu akeu ye nongu pelo axine shi pemo niye ke. Ikemu khuana no axine shi aye, ningu ye Apu zülo ni ngulau Jisü Khristo amikuchou hu anike.

² Pa no ni ghenguno axine kümllagho shive tsüe, ni ghengu likhi no kumo püzü ayeghiqha kümtsü xine ghengu ghike.

³ Hipau vecheo ningu no ithilu keu ye tsala ningu no Alhou zakütsüqo pelu aye ningu ye Pa ithitoi luvae.

⁴ Khuu no “Ni ye Pa ithitoi ani” ipi ani kemu Pa zakütsü pemoni keno pa ye kimkimi, eno pa lolo kuchou kühae,

⁵ ikemu khunono Pa tsa peluni keno, kuchou no Alhou kikimiye ye pa launo kupukülailu cheni. Hipau vecheo ningu ye Alhou küdau ani kepi ithilu nani:

⁶ khuu no pa ye Alhou laumi ipini keno pa ye Jisü no cheche keu laghi lo chewu kepue.

Azakütsü Kithe

⁷ Kimiye chekemiqo, ni ye nongu lau azakütsü kithe ye anike kumoe, ikemu nongu no abothu lono achekeu zakütsü aqau ke. Azakütsü aqau ye nongu no chiluve keu tsape ke.

⁸ Tishimu I no nongu lau hipau ye akeu ye azakütsü kithe ghike, ti ye Khristo küdau pina nongu küdau pimu kuchoue, kughengu aküzü ye wove chea eno kuchou küvü huno phuphushi ayae.

⁹ Khunono aküvü lo anie pipüzü pa thiküzümi mithini keno pa ye aküzü lo aphi.

¹⁰ Khunono pa thiküzümi kimiye cheni keno pa ye aküvü lo acheni eno pa lau ye küpxalu kepu kühae.

¹¹ Ikemu khunono pa thiküzümi mithi cheni keno pa ye aküzü lo ani, aküzü lo checheni eno khilau wucheni keno ithi chemoe, kughengu aküzü no pa nhethi kighicheve tsü ake.

¹² Anuliqo, ni ye nongu lau ye ani, kughengu Khristo je lono nongu xine ye qhive tsüae.

¹³ Apunoqo, ni ye nongu lau ye ani, kughengu nongu no abothu lono acheghi keu ithi anike. Lhothemiqo, ni ye nongu lau ye ani, kughengu nongu no alhoksau theqhilu ke. Atianuliqo, ni ye nongu lau ye ani, kughengu nongu no Apu ithi cheni.

¹⁴ Apunoqo, ni ye nongu lau ye ani, kughengu nongu no abothu lono acheghi keu ithi anike. Lhothemiqo, ni ye nongu lau ye ani, kughengu nongu ye mtotoi ani, Alhou tsa no nongu lolo ani eno nongu no alhoksau theqhilu ke.

Ayeghiqha Kimiye Kevilo

¹⁵ Ayeghiqha momu tile akeu thimeqo kimiye kevilo. Khuana no ayeghiqha kimiye cheghi aye, pa lolo Apu kikimiye kühae.

¹⁶ Kughengu ayeghi lo thime akeqo—ashiaji eno anhethi no mine chekeu ngo aküxü lo qheküza—ye Apu launo kumono ayeghiqha launo ighie.

¹⁷ Ayeghiqha ye akiminepu jeli gholono wove cheae, ikemu khunono Alhou lopu shikeno alholo acheni.

Kichileu Khristo

¹⁸ Atianuliqo, hi ye ashekhau tüqhüdo ke, eno kichileu Khristo ighini keu nongu no chiluve akehu itehi ye kichileu Khristo kutomo ipeghivae. Tighenguno hi ye ashekhau tüqhüdo kepi nino vethalu ani.

¹⁹ Panongu ye ni gholono ipeve kemi, ikemu azüu nomu niqomi kumoe, kughengu niqomi keaye ni gholo kuloji aghini cheke. Ikemu panongu no ipeve keu lono pano ye niqomi kumo kepi mtsüqheive peniye ke.

²⁰ Ikemu nongu ye Akimtheu huno nukishelu püani, eno kümtsü no kuchou kighithi ani.

²¹ Nongu no kuchou ithi moke ghenguno kumoe, ikemu ithi ani kehu, eno akimki ye kuchou launo ighi chemo kehu ni ye nongu lau hipau yelu ani.

²² Tishiaye, khuu no Jisü ye Messiah ipikeu milive cheni keno, timi tipau no akimkiu thono khuu no kea? Khuu no Apu eno Anu milive cheni keno, pau no kichileu Khristo ke.

²³ Khunomu Anu milive no Apu ikhilu mlae. Khuu no Anu ikhilu ani keno Apu ghi ikhilu ani.

²⁴ Nongu no abothu lono kiu tsape chiluve akeno alhokuthu nongu lolo apelo. Nongu no titoi atsape pesü alolo qhilu aye nonguu ghi Anu ngo Apu lau xükimelu nani.

²⁵ Eno hi ye Khristo no ningu lau piqhikeu shoqhi—lhokta küxü huke.

²⁶ Khunono nongu pishiqhini ke pükapütsa ani keno ni ye panoqo ghili pesü nongu lau yelu ani.

²⁷ Ikemu Khristo launo Aghungu Kimthew nukikishe ithulu keu huno nongu lolo ani kehu nongu ye khuana pelo shikape kepu vehu kiumu kühae. Ikehu azüu no nongu shikave ketoi Pa Ghungu Kimthe no thokha pesü nongu shika kelo ti ye kuchou kethono kichileu kumo ke—Pa lau kimepe achelo.

Alhou Tianuliqo

²⁸ Tishiaye atianuliqo, Pa lau kimepe achelo, tishianguno kughou Pa no ipeghini keno ningu ye akukujo lono itshü ilomo nani, ikemu Pa ikighi lo amlo kumto shilu nani

²⁹ Tsala nongu no Khristo ye amikucho kepi ithi aghi aye, achipiu-mikucho pesü xüche kemi kümtsü Alhou nuli kepi nongu no thebeilu nani.