1 John 1 - Sumi Naga CL (Re-edited) Bible (BSI)

Aküxüpu Tsa

¹ Aküxüpu tsa khikhi abothu lono acheghi keu ningu no chilu, ni nhethi no ithulu, nino jupukulu eno ni u no buluve akeno, tipau vehu sheshu ani,

² kughou aküxüpu tipau pephe piye keno, ningu no ithulu no ashepe shitsü, eno lhokta küxü khikhi Apu gholo ache püzü ningu lau pephetsü keno, tipau pesü nongu lau sheshu ani.

³ Ningu no khikhi ithulu eno chiluve akeno nongu lau pikülha ani, tishianguno nongu ghi ni gholo kuposhulu peniye ke; kuchou no ningu ye Apu eno Pa Nu Jisü Khristo sasü kuposhu acheni.

⁴ Ikehu ningu lolo alokivi akeu kupukülailu peniye nino hipaqo yelu ani.

Aküvü lo Chechelo

⁵ Ningu no Anu launo chilu püzü nongu lau pikülha akeu tsape ye hike: Alhou ye aküvü, eno Pa küdau ye khilemu aküzü kühae.

⁶ Tsala nino aküzü lo cheche pülaghi ningu ye Pa gholo kuposhu chenie pi aye, ningu ye miki ani eno kuchou pesü xüchemoe.

⁷ Ikemu Pa no aküvü lo ache ketoi ningu ghi aküvü lo cheche aye, ningu ye lakhino lakhi sasü kuposhulu ani eno Pa Nu Jisü ji no axine kümtsü launo ningu shikimthe tsülu ani.

⁸ Tsala nino ningu ye axine kühae pi aye, ni likhi ninguu pishiqhi auva eno ni lolo kuchou kühae.

⁹ Ikemu ningu no ni xine pipheve aye, Pa ye pükhükulupu eno achipiu kehu ni xineqo qhivetsü no alhoksa kümla kümtsü launo ningu shikimthelu nani.

¹⁰ Tsala nino ningu ye axine shimphie pi aghi aye, ninguu no Alhou pesü akimkiu shive tsüae, eno Pa tsa ye ni lolo kühae.