ZEKHARIA 7 - BAIBEL (BSI)

AMPEU ye amlo tsumono Kumvukeu mithi

¹ Darus no akukatou shikeu ampe kuthuno aqhi toku eno atsala abidini Kislev qhilo AMPEU no atsape lakhi itsuke.

² Bethel lo akemiqono Aqokitikhi MPEU Achine kilo Sharezer ngo Regemelek eno pano timiqo puwuke, tiye AMPEU wu kukumgha inikhu penike eno

³ achinemi ngo tungkupmi vilo hipau vehu iniju peniyeke: “Achineki kutsalevekeu ghenguno ninguno ampe kushuwa kutolo aqhi apunguulo kumvu chekeu toi ninguye tishi mloqa achekepu keo mokya?”

⁴ AMPEU sutsa hipau ilau ighike.

⁵ Pano pi, “Aghakhu hipaulo akemiqo vilo eno achinemiqo vilo pilo ike panonguno hi ampe lhotsuni dolo aqhi apunguu eno aqhi akutsuniu lo kumvu chekeu eno mlo qachekeu huye igihukeu lono kumoe.

⁶ Kughou panonguno kuchu kusho shini keno tiye panoqo ghakiqipu ghenguno shicheke.”

⁷ Kughou Jerusalem ye kinikulushi eno timi kumzapushi akelono eno tipau sukumxa taun lo likhi kumo puzu apeu qhalo eno kulolau naghuto kumxalo ghi timi kumzapu ake ghuloki lono AMPEU no azuumi tungkupmi vechewo hipau pikeuke.

Hekibide ghenguno Piyighivepe

⁸ AMPEU no atsape hipau Zekharia tsuke:

⁹ “Ado kushuwo lono ino ahza kutsu hipaqo iwu timi tsuke: ‘Nonguye lakhino lakhi athikuzumi lau kuchou xakutha, kupukilekeu eno kimiye qhiyi keu shimayesake.

¹⁰ Nonguye chimemi, mighimgha eno inami khunoqo nongu gholo ani keno momu khukhumu nongu kukuphu avehupu shi aghikemiqo nedaqoda kevilo. Momu lakhino lakhi shipusa nikeu laghi kughuqhi kevilo.’

¹¹ “Ikemu iwu timiqono initsumoniye tsatsayi auve. Panongu kukumsu xukhomove eno inimoniaye panongu kini kiyikhaluve.

¹² Panonguno amlo hekighike pesu auvekeuye Aqokitikhi MPEU no pa ghungu pelo puzuumi tungkupmiqo vechewo ayezah eno akukutsu tsa tsupuwukeu chilumoniyeke. Tighenguno niye ighono aloghu ideveke.

¹³ Ino pikeu panonguno inimoke ghenguno kughou panonguno inikhu keno ino khochilemoveke.

¹⁴ Pasapagha toi ino panoqo jole pesu inaghami yeghilo auvepe. Ikehu aghakhu kivi hipauye kughukughalei keu-a shive eno khunomu tilehi kughunamove.”