ZEKHARIA 6 - BAIBEL (BSI)

Khurkulu bidi Kungunhetsu

¹ Ino kungunhetsu kutau lakhi ithulu. Hipau tuqhuloye khurkulu bidi alazayi naghuto kini dolono ipecheghi keu ino ithulu.

² Khurkulu atughiuye khurshi huchuyi keuno sunheche, akiniuye khurshi tsubuyikeuno sunheche,

³ akuthuuye khurshi akimiyeno sunheche eno abidiuye khurshi hughayi keuno sunheche.

⁴ Tileno ino kungumi vilo iniju, “Akijeu, khurkulu hipaqo kiqiye kiu kya?”

⁵ Pano khochile, “Hipaqoye amlhu bidike; panonguye ayeghiqha kumtsu shou AMPEU zulono ighi anike.”

⁶ Khurshi tsubuyi keuno sunheche keu yeghikiluye ahuu Babilon lo wucheke, khurshi akimiye yeghikiluno kulolau wu cheke, khurshi hughayikeu yeghikiluye apeu ayeghi ake kudau wu cheke.

⁷ Hughayikeu khurshi khalau ipeghive keulo panonguye wunike khelhokutu ake tiye ayeghiqha xujuwuniyeke. Kungumi no ishi pi, “Wulo eno ayeghiqha xujulo!” Ikelo panonguno tishike.

⁸ Tileno kungumi huno ighamuku ivilo pi, “Khurshi ahuu Babilon kudau wukeu hino AMPEU xukighide vekumtshave tsuae.”

Akuka Kutsuqho Joshua pipe

⁹ AMPEU no atsape hipau tsu.

¹⁰ Pano pi, “Hapiye pighivekemi Heldayi, Tobija eno Jedaiya noqono tsukeu gho lupuzu Zefania nu Josiya kilo itehino mtazu wulo. Timi hipaqoye Babilon lo pighiwuve keu lono ideghiveake.

¹¹ Panonguno tsukeu tsandiyi ngo shunayi pesu akuka kutsuqho lakhi mlalo eno Jehozadak nu Joshua, Achinetou kutsu qhopipelo.

¹² Pa vilo Aqokitikhi MPEU no pikeu pesu ishi pilo, ‘Timi khuu Aloka ipi kucheni keno paye pano khile ani keno tilehi no kinikulu shi nani eno pano AMPEU chineki shikithe puku nani.

¹³ Tipau shiqhe pukunikeu timi huye pake eno agigihu kukami lakhi tsukuzupu pano ithulu nani eno pano pawu timi shou ayehpe nani. Achinemi lakhi pa kuka lakhu phivilo puthugho nani eno panonguno alakishi eno kuloni kughuvuyi keu lono kumtsa mla nani.’

¹⁴ Akutsukuqhoye AMPEU Achine kilo Heldayi, Tobija, Jedaiya eno Josiya jelono kumsumamla keu lakhishi ache nani.”

¹⁵ Timi putosuu xuachekemi ighi nani eno AMPEU chineki shikithe puku nike kuphu nani. Kughou tipau shikithe pukuveni keno Aqokitikhi MPEU no nongu lau ipuwu kepi nonguno ithi nani. Nonguno AMPEU nongu Lhou no azah tsukeu qhoyi papelu aye hipau kumtsu shi nani.