ZEKHARIA 4 - BAIBEL (BSI)

Akulu Kibepu Kungunhetsu

¹ Kungumi iputsa akeuye itaghi ighino niye zuani kughashi ikuda puthu.

² Pano ivilo, “Noye kiu ithulu ani kya?” ipi iniju. Ino khochile, “Shunayino shikeu akulu kibepu lakhi ithulu ani. Akutsuqalo teli sukepu khu lakhi ani. Akulu kibepu shou akulubo tsuni ani eno akulubo lakhikhilo akulukighi tsuni sukepua ani.

³ Akulu kibepu phivilo oliv subo kini tuxa tuxa kudau anie.”

⁴ Tileno ino kungumi vilo iniju, “Akijeu, hipaqo kiu shiniye ishi puani kya?”

⁵ Tileno kungumi iputsa akeuno ikhochile, “Hipaqoye kiu keno noye mtha kesha?” “Mthae, akijeu niye mthake,” ipi ino pi.

¹⁰ Kungumi huno ivilo pi, “Akulubo tsuni huye AMPEU nhethi tsuni ayeghiqha kumtsu shou jupuku achekeuke.” Panonguye aghuthi suveke kughengu aki kishi kumla kititi likhi shiluke. Ikemu Zerubabel no ngovemo puzu Achineki shi akeu panonguno ithulu nani eno panonguye alovive nani.”

¹¹ Tileno ino pa vilo iniju, “Akulu kibepu tuxa tuxa kudau oliv subo kini akeu kiqiye kiu kya?

¹² Eno shuna yihu kini lono oliv teli qoipeghi chekeu phivilo oliv loka kini akeu kiqiye kiu kya?”

¹³ Pano ivilo iniju, “Noye mtha kesha?” “Moe, niye mthake, akijeu,” ipi ino khochile.

¹⁴ Tileno pano pi, “Hikumaye ayeghiqha kumtsu MPEU no pa qepeniye nukisheluve keu kumake.”

Zerubabel lau Tushoqhi

⁶ AMPEU launo ighi keu tsape hipau Zerubabel tsulopi kungumi huno ivilo pike: “Noye aghushipu kumtono kumoe, momu okuka kumtono kumoe ikemu ighungu pesu tokulupu shi nani.

⁷ Naghuto pahi vekukha kugha sholu pimu ozulo tiye hauve nani. Nono Achineki shiqhepuku kithe nani eno nono atuqo ashekhau pa-alo sulukelo timiqono, ‘Jukighilepu, jukighilepu!’ ipi igha asheshu nani.”

⁸ AMPEU launo atsape kutau lakhi ilau ighi.

⁹ Pano pi, “Zerubabel no Achineki aboqha qhave ake eno pano aki tipau shiqhi nani. Kughou hipau shiveni keno ino iwu timiqo lau opuwu kepi panonguno ithi nani.