ZEKHARIA 13 - BAIBEL (BSI)

¹ “Tipa tsalalo David polo kughukomi ngo Jerusalem lo kughuna akemi axine ngo ajulho mllakeu qhukimtheve tsunike ghenguno azupuki lakhi khaqhitsu nani,” ipi Aqokitikhi MPEU no pike.

² “Tipa tsalalo ino aghakhu lono ajulho shisukeu aje akeqo ikhivetsu nani eno khiumu tipau kumsuchile kithemove nani. Ino aghakhu lono tungkupmi lakhi kepi cheghikemi ikhive nani eno ajulho mlla nishi keu nguagha ikhivetsu nani.

³ Khuala no tsuyikhomo tungkuptsa piniepi aye, pa puaza pa lhokeu no pa vilo ishi pinani, ‘Noye xu moake, kughengu nono AMPEU jelono akimkitsa pike.’ Pano tungkuptsa piaye papu azano pa qhuqhi pithilu nani.

⁴ Tipa tsalalo, tungkupmi khunomu timi pishiqhiniye pano kungunhetsu ithulu keulo akijivilomo nani momu tungkupmi lakhi toi shipiyemo nani momu tungkupmi phimini ghaghaikeu pepu puzu timi pishiqhimo nani.

⁵ Tishinike zuqhulo paye ishi pilo, ‘Niye tungkupmi kumoe, niye alukichimi lakhike, ikuxu kupujulo niye aluchi chekemike.’

⁶ Tile timi khualano pa vilo ‘Omqalo aghuzaku tipaqoye kiu kya?’ ipi iniju aye, ‘Ishounoqo kilono ighuzapipe keu zakuke’ ipi pano khochile nani.”

Bherikheu Pithivenikeu

⁷ Aqokitikhi MPEU no pi, “Idathughilo, azutakihi ipunukhoi mlachekeu bherikheu ghiqhilo! Pa ghiqhilo eno bheriqoye hapiye pighive nani. Ino iwu timiqo leni cheni,

⁸ aghakhuqhalo timi kikije kuthulo kiniye thive nani.

⁹ Ino kikije akuthuu ghupe puaghikemiqo kimchiju nani eno ami lono tsandiyi ghukimthe keshi panoqo shikimthe nani. Shunayi kemo keno kimchiju ketoi ino panoqo kimchiju nani. Ino panoqo vilo panonguye iwu timi kepi nani eno niye panoqo Lhou kepi panonguno piphe nani.”