ZEFANIA 1 - BAIBEL (BSI)

¹ Amun nu Josia no Juda lo akukau shiake ghuloki lono AMPEU no atsape hipau Zefania tsuke. Zefania ye Kush nu, Kush ye Gedalia nu, Gedalia ye Amaria nu eno Amaria ye Hezekiya nuke.

AMPEU Wu Kughakutha Tsala

² AMPEU no pike, “Niye ayeghilo akeu kumtsu kutsaleve ni cheni,

³ timi lhoxu kumtsu, ashi aghauqo eno akhaqo kutsaleveni. Ino kusakughami xale qhiveni. Ino timi jeli kumtsu kutsaleveni eno timi lakhimu ghupe qhimo nani. Ni AMPEU no piqhi ani.”

⁴ “Ino Jerusalem lo akemi ngo Juda lo akemi kumtsu ghimeqhi nani. Tilehi Baal mllakeu jeli khije aghini keno ashekhau kutolo ino kutsaleve nani eno khunomu asu-atu chinemi tipau qechekemi kumsuchilelu pemo nani.

⁵ Khuno aki kutsuqalo ikupuzu aqhi, tsukinhe eno ayepu mlla nikeno ino kutsaleve nani. Khunoqono imlla cheni eno igholu akeu shoqhi shicheni ikemu tishi puzu Milkom lhou jelono ashoqhi shicheni keno ino tipaqo kutsaleve nani.

⁶ Khunoqo no ilauno idewove eno ipapemoveni eno khunoqono ilau ighimoni momu panoqo sapiyelo pi inijumoni keno ino tipaqo kutsa leve nani.”

⁷ AMPEU tsalaye kupunuvae; tighenguno pa zulo inaqhoi shivelo! AMPEU ye aghashi mllakeu lakhi toi pawu timiqo ghiqhi nike kutope ani.

⁸ AMPEU no pi, “Ghikiqhi tsala lo, ino kijemiqo, akukau nunoqo eno inaghami khuayeh pepimhe chekemi kumtsu ghimeqhi nani.

⁹ Khunoqono Alhou kumthami toi mlla cheni keno eno khunoqono puka pughikeu pesu pano shou ampiu ki shepichhi tsuniaye pukaqhi eno timi heqhive cheni keno tipaqoye ino ghimeqhi nani.”

¹⁰ AMPEU no pi, “Tipa tsalalo, Jerusalem lo Akha Khagholo timino ighaqakeu sutsa nonguno chilu nani. Aphughi anile shipuake kudau qanhenhei keu sutsa nonguno chilu nani eno naghuto kubo kighini ikiqikeu sutsa kije lakhi chilu nani.

¹¹ Nongu aphughi chhiliu kudau akemiqono kughou hipau chiluni keno qanhenhe igha qalo, kughengu alhikishimi kumtsu thiveniake!”

¹² “Tipa ghulokilo ino akuluqhe lakhi pepuzu Jerusalem lheju nani. Khunoqono pano likhi pano ghapiqi eno pano pukhupe acheni, khunoqono pano likhi pano vilo, ‘AMPEU ye akivimu alhoksa mu shimo nanike’ ipi picheni keno, ino timi tipaqo ghimeqhi nani.

¹³ Pano wu kinikuluye xulepuwuve nani eno pano kiye kutsaleve nani. Panonguye panonguno shiakeu kilo khilemu ngomo nani momu panonguno atsayilu chiakeu lono mlakeu tsayiji shomo nani.”

¹⁴ AMPEU tsala kijehu kupunuvae, ighono kupunuvae eno payi ighi nani. Tiye kukhu kimji tsala shi nani, kughengu ghushimi amlo kuloghiu thotsu amlo hauveno igha nani!

¹⁵ Hiye muqhumzayike tsala shi nani, shiluksa eno amlo itapinyive keu tsalake, shikupsa eno kutsale nikeu tsalake, zumoi eno khummuyikeu tsalake, zuchiyi eno khungkusuno nhaluve keu tsalake.

¹⁶ Aghushilo ighakeu fuko sutsano chhitoikeu eno aliwo qogheqo shipuakeu ngo qhemghaikeu ghukhu-a shipua keu phughi leakelo aghushimino aghule kukeu tsalake.

¹⁷ AMPEU no pi, “Ino timiqo shou kutsakungo keu sughi niaye akeuye timi kumtsuno anhethi kighichemi toi kuka ju puha nani. Panonguno ishou axine shike eno itehiye panoqo jiye azu toi pele nani eno panoqo kithikumoye ayeghi shou tsu munashu anani.”

¹⁸ AMPEU no pa loghu piyeke tsalalo, pano wu shunayi ngo tsandiyi kumtsu tsunamu panoqo xamla nani. Ayeghiqha kuchopu pa loghu mikuiquno pitileve nani. Pano ayeghilo akemiqo kumtsu zuleno akuxu shekha shivetsu nani.