ZAKINIU 7 - BAIBEL (BSI)

AMPEU wu Timiqo

¹ “Nonguno ngoluniye akeu ghakhulo AMPEU nongu Lhou no nongu saighi nanike eno pano tipa yeghi lono ashiayeh kutomo hapuwuvetsu nanike. Nonguno azuu haighi kelo pano ashiayeh tsuni nongu nguno akichiu eno akuka kuami haphevetsu nanike: Hatimi, Girgashimi, Amarimi, Kananmi, Perizimi, Havimi eno Jebusimi.

² AMPEU nongu Lhou no timi hipaqo puhave penike akuka nongu tsuaye nongu ye panoqo kumtsu pithikhave masake. Panoqo sasu kulakishi shikevilo momu kitilamu panoqo kimiye kevilo.

³ Panoqo sasu kulakupu shikevilo momu no tianuliqo pelo panoqo sasu lakhimu kulukile pekevilo.

⁴ Kughengu tipaqono nongu tianuliqo AMPEU launo musu sawuveno kutau lhouqo mllauve penanike. Tikithipu shive aye AMPEU ye nongu lau aloghu ideve nani eno ghuthu khavino nongu kutsave nani.

⁵ Ike tighenguno panoqo kumlla kiptia xalevetsulo, panono chinichekeu tuqu khetsukucho kubolevetsulo, panoqo lhou-liu Ashera julho ghekuchove tsulo.

⁶ Nonguye AMPEU Alhou timiqoke ghenguno hipau shilo. Ayeghilo timi kumtsu akeqo gholono Pano nongu pelo pawu pakutakemi shipenike kisheluke.

⁷ “AMPEU no nongu kimiye eno nongu kishelu keuye nonguno kutami nguno kutomo keghenguno kumoe; nonguye ayeghilo ashiayeh aghulou ke.

⁸ Ikemu AMPEU no nongu kimiyeke eno Pano nongu puasuqo lau tushoqhive keu pecheni shike. Tighenguno pa kumto kije pesu nongu xaluke eno nonguno Ijip lo akukau quaxemi shi acheke lono nongu khaqhiphetsu ke.

⁹ AMPEU nongu Lhou likhino Alhou kepi kumsululo eno paye amikuchoke. Paye puloshoqhi phevemo nanike eno pa qhuivu eno Pano ahza tsukeu papelu kemiqo lau tiqheli 1000 kutolo pawu iqemokeu kikimiye piye chenike.

¹⁰ Ikemu pa mithichekemi ghimeqhinike paye kiumu kunacho keu kuhae.

¹¹ Tighenguno kiu nongu shikave akeno itehiye tipau pelulo; ishi tsalalo ino ayezah nongu tsuvekeu kumtsu papelulo.

Aghokulu Kukumgha

¹² “Nonguno ahza kutsu hipaqo tsaqui inino amikucho shi agholu aye, tileno AMPEU nongu Lhou no nongu lau pawu puloshoqhi shikeu peche nani eno pawu iqemokeu kikimiye piye nanike, tiye nopuasu vilo tushoqhive ketoi.

¹³ Pano nongu kimiye eno kumghatsu nani, tishianguno nonguye timi kutomo shiluve nani eno atianuli kutomo shilu nani; pano nongu luza kumghatsu nani tishikeulo nonguye athi, atsayi-ji eno oliv teli alu nani. Pano nopuasuqo vilo ayeghi hipau nongu tsunikeu shi tushoqhive keulo kukumgha hipaqo kumtsu nongu tsu nanike.

¹⁴ Nongu lau kumzapu kumghatsu keu qhemi ayeghiqhalo timi khuno laumu tsumo nanike. Nongu gholo milakhimu anuha shimo momu notsu-aqu lakhimu iqomo nani.

¹⁵ AMPEU no kusukini kumtsu launo nongu susholu nani eno nonguno Ijip lo ithulu puakeu kusu lhoksa lakhimu paye nongu shou pukutsumo nani, ikemu tipaqo kumtsu noghumiqo shou pukuvetsu nanike.

¹⁶ AMPEU nongu Lhou no ashiayeh khijehi nokuka qholo qhitsuni keno kumtsu kutsavelo eno panoqo kimiyeqhiyi keu shikevilo; momu panoqo lhouqo mlla kevilo kughengu tipauno nongu meluve nanike.

¹⁷ “No likhi no vilo, timi hipaqoye nongu nguno timi kutomo eno tighenguno nonguye panoqo haphemla kepi pikevilo.

¹⁸ Panoqo musa kevilo; AMPEU nongu Lhou no Ijip lo Akukau ngo pawu timiqo lau kiu shikeno tipau kumsululo.

¹⁹ Pusa lhoksa jeli no likhi no nhethino ithuluve keu, akumzapu akichiqhipu eno akuka kumto kije AMPEU nongu Lhou no peitha puzu nongu kuqhopuwu keu kumsululo. Pano Ijipmi kutsaleve kepaphi lono timi hipaqo itehi nonguno musa akemi kumtsu kutsave nanike.

²⁰ Pano panoqo gholo izuichoi vepe nani eno khunoqo pokasu wuveno itshu aghini keno kutsalevetsu nani.

²¹ Tighenguno timi hipaqo musa kevilo; AMPEU nongu Lhou no nongu gholo anike, paye Alhou kijeke eno pa sumsa kepu ke.

²² Nonguno azuu haighike lono kititino pano ashiayeh hipaqo haphevetsu nanike. Nonguye ghuthu khavino panoqo kutsalevemla nanike, kughengu nonguno tishi aye tughashi chilove nani eno nongu shipusave kepu kumsapu shive nanike.

²³ AMPEU no noghumiqo pe nongu kuka qholo qhitsu nani eno panongu kutsalevemo ke kutolo izuvulaive penanike.

²⁴ Pano panoqo shou kukamiqo pesu no kuka qholo suvetsu nani. Khunomu nongu lakhamla kepu shive nani; nonguno kumtsu kutsave nanike.

²⁵ Panoqo su-atu julho pitivetsulo. Panoqo shuna momu tsandi pepu aghikeu jumine kevilo eno nosala tipau lukevilo. Nonguno tishi aye tipauno nongu meluve nani kughengu AMPEU ye ajulho mllakeu mithi chenike.

²⁶ Nongu kilo asuatu julho hipaqo lakhimu sughi kevilo tikumoaye panoqo shou musinive keu tho nongu shou auve nanike. Nonguye asuatu julho hipaqo mithi eno jupe aphimuqhu masake, kughengu panonguye AMPEU no musuinive keu qholo anike.”