ZAKINIU 6 - BAIBEL (BSI)

Ahza Akijeu

¹ “Ayezah hipaqo kumtsu AMPEU Alhou no nongu shikapiye penike ahza itsuke. Nonguno ilono ngoluniye akeu ghakhulo tipaqo pelulo.

² Nonguno xu ake tivilo nongu ghi nongu polo kughukomi kumtsu AMPEU nongu Lhou gihulo eno pa yezah ino nongu tsuakeu kumtsu pelulo, tishikeu lono nonguye tipau ghakhulo axu shulu nanike.

³ Israilmiqo, tipaqo inino papelo! Tishiaye nonguye thwokhalo akivipu shilu nanike eno AMPEU ningu puasu Lhou no tushoqhive keu tholono nonguye akughushu shiayeh lakhi shilu nani eno kinikulu ghuma yeghi lo xulu nanike.

⁴ “Israil, hipau kumsululo! AMPEU ningu Lhou likhino Alhou ke!

⁵ Omlo kuchopu,ongulho kuchopu, eno okumto kuchopu pesu AMPEU nongu Lhou qhuivulo.

⁶ Ishi tsalalo ino ahza hipaqo nongu tsuakeu khilemu kumsuma kevilo.

⁷ Hipaqo pesu notianuli shikapiyelo. Nonguno akilo akelo, nonguno khalau chekelo, nonguno akulho qhi akelo nonguno akumla shi akelo hipaqo pikide kithe alo.

⁸ Hipaqo nongu umlolo khapulo eno nongu loputsu tsukepushi nongu kishelo khapulo.

⁹ Nongu ki hukikha eno khagho tsukuchoqolo yepukulo.

Ghobide Nosake Piputo

¹⁰ “AMPEU nongu Lhou no nopuasu Abraham, Isak eno Jakob lau tushoqhive ketoi pano ayeghi lakhilo aphughi kinikulu eno akuloghi nonguno shimokeu pesu nongu tsu nanike.

¹¹ Nonguno qhipua mokemu thime kivi jelino aki chhitoi nanike eno nonguno chhumokeu zukikhe anani eno nonguno shosumokeu tsayili ngo oliv xathili ananike. AMPEU no ayeghi hupaulo nongu saghi kelo eno nonguno chinishikeu kumtsu ithulukelo,

¹² AMPEU khuno Ijip khilehi nonguye aqemi shi ache keno, tipau lono nongu xaphelu keno pa phevemo kepushi mutsumishei shilulo.

¹³ AMPEU nongu Lhou sumsalo, pa likhi mllalo eno pa jelo likhino ashoqhi shilo.

¹⁴ Kutau lhou jeliqo mlla kevilo, nongu sumxape akemiqo lhou mlla kevilo.

¹⁵ Nonguno kutau lhouqo mlla aye AMPEU loghuye ami toi nongu shou ighi nani eno qhoi nongu kutsave nani kughengu AMPEU nongu Lhou khuu nongu gholo ani keno paye pa suxakemi qhimo nanike.

¹⁶ “Nonguno Massa lo shike toi AMPEU nongu Lhou peju kevilo.

¹⁷ Nonguye pano ayezah nongu tsukeu kumtsu pelunike mutsuqhei shilo.

¹⁸ AMPEU no kiu pesu achipi eno alo pi cheni keno tipau shilo eno nonguye thwokhalo akivipu shilu nanike. Nonguye AMPEU no nongu puasu vilo tushoqhivekeu aghuma yeghi pesu amheghi shilu nanike,

¹⁹ pano tushoqhive ke toi no ghumiqo hapheluve nanike.

²⁰ “Ighinikeu tsalalo nongu tianulino nongu vilo iniju nani, ‘AMPEU ningu Lhou ye kushiye nivilo ayezah hipaqo kumtsu pelulo pi ahza tsu kya?’

²¹ Tileno panoqo vilo pike, ‘Ninguye Ijip kukau qemi shi acheke eno AMPEU no pa kuka kije pesu ningu xapheluke.

²² Ni nhethi ampino pano akumzapu kumla shikeu eno Ijipmi shou akuighupu jeli shikeu eno pano kukau ngo pawu kijemiqo shou shikeu kumtsu ithuluke.

²³ Pano Ijip lono ningu kuqhophe puzu hilau nisaghi eno ayeghi hipau nitsuke tiye pano tishini kepi nipuasuqo lau tushoqhive ketoi shike.

²⁴ Tishino AMPEU niLhou no ayezah hipaqo kumtsu papelu penike eno pa sumsa chepenike ahza ningu tsuke. Ninguno tishilu aye pano pulhapuju nishiayeh shou ju khe nanike.

²⁵ Alhou no ahza ningu tsukeu thwokha ninguno amikucho shi pelu aye paye ningu lau amlo kiqi anani.’ ”