ZAKINIU 34 - BAIBEL (BSI)

Muse Kithi

¹ Muse ye Muab khilaqa lono chesu Nebo Toghilo ikuve eno Jerikho ghungulo Pisga Toghi kutsuqalo wuve eno tilau AMPEU no aghakhu qha kuchopu pa piyeke: Gilead ghakhu ahuu Dan taun kutolo;

² Naftali ghakhu kuchopu; Efraim ngo Manase ghakhu; Juda ghakhu kulolau Mediteriya zughi kutolo;

³ Juda apeu akhila Zoar lono Jerikho kutolo amsabo toikeu subo akeu phughi.

⁴ Tile AMPEU no Muse vilo pi, “Ino Abraham, Isak eno Jakob vilo pano polo kughukomi tsunikeu shi tushoqhive keu yeghiye hike. Ino opelo juluve anipeke ikemu niye opelo tilau wupemo nanike.”

⁵ Tighenguno AMPEU qeu Muse ye tilau Muab ghakhu lono thive, AMPEU no tishi velopi pive keu toi shive.

⁶ AMPEU no Muab lo abokhuqa lakhilo Bethpeor taun ghungulo pa qhoveke, ikemu ishi tsala kutolo pa kumo kuqhoa mutsumishei keuye khunomu mthake.

⁷ Muse thiveke ghulokilo paye ampe 120 shi ake; paye puzuu toi mutotoi ake eno pa nhethi ghi akivishi aphike.

⁸ Israilmino Muab khilalo pa ghenguno atsala shighi kutolo mloqa ke.

⁹ Nun nu Joshua ye alokutsuno chhitoive kughengu Muse no pa kishelu puzu pa qhusulu peke. Israilmino Joshua gholuke eno AMPEU no Muse vechewo ahza tsukeu papelu cheke.

¹⁰ Israil lo Muse toi keu tungkupmi khilemu kuha aphike; AMPEU no agi kinheqheno pa sasu kuptsake.

¹¹ Tungkupmi kutami khunomu AMPEU no Muse puwu puzu Ijip lo akukau, pawu kijemi eno pa ghakhu shou akichiqhipu eno akumzapu kumla mlapeke toikeu shimphie.

¹² Tungkupmi kutami khunomu akumsapu eno akuloghi jeli Muse no Israilmi kumtsu nhekithelo shike toike shilu mphike.