ZAKINIU 32 - BAIBEL (BSI)

¹ “Ayeghi eno atsutsu itsa initsulo, ino kiu pini keno tsaqui inilo.

² Ikukutsuye tsutsughu kighiji toi iqighi eno ayeghi shou atsuzu toi kumqolue. Itsaye tsutsughuno atsuni khunu shou ikiqi iku ketoi, atsani kumtsha shou mkhano ghupuku keu toi.

³ Ino AMPEU je sheqhe nani, pawu timiqono paye kiu toi kije keno pi nani.

⁴ ‘AMPEU ye nongu sushokuluu akughushuu, pano shike kumtsulo kupukulu eno kuchou; Nongu Lhou ye amikucho eno kuchoue; achipiu eno akivipu pano shi cheni.

⁵ Ikemu nonguye amikucho kumo eno pawu timi shikuzupu kumoe, axinepu eno pishikiqhi shiayeh lakhi.

⁶ Hikithipushi nonguye AMPEU peitha kepu kesha? Nongu aghuzunikha eno putokeu kuhakeqo. Paye nongu papu, nongu Pulhokusuu, pano nongu pesu ashiayeh lakhi shitsue.

⁷ “Wovekeu, khaghi ghuloki kumsujulo; kiu shive keno nongu vilo pitsu lopi apunoqo vilo inijulo, kitemi vilo kha-ghi ghili pitsu penike inijulo.

⁸ Shishe Akiqheuno ashiayehqo pututa yeghi kutotsuwo; timiqoye khile akepu keno pano kughutsu. Pano Israil shiayeh lakhi khi lau alhou lakhi kutotsu,

⁹ ikemu Jakob polo kughukomiye pa sala shi pano kishelue.

¹⁰ ‘Panonguno asayeqha lo itsuche kelono pano panoqo phulu, tiye kughukughalei amlhuno fuchighikeu sayeqhae. Pano panoqo susholu eno tucho hejuluve tiye pa likhi pa susholu akeshie.

¹¹ Aluquno patiqo yewukeu shika keshi, achishibo sukho keu lono panoqo xapuqheluve ketoi, AMPEU no Israil pelo veqhimono ngoluve pe.

¹² AMPEU likhino inami lhou kukuphu sumono pawu timiqo sawuluve.

¹³ “Pano panoqo pelo qhemghai keu yeghi shou kalu pe, alulo kiu ipeghi keno panoqo pelo chulupe. Panonguno atuqu gholo aghalo khingozu phulu; atusa yeghilo pano wu oliv subo aheshi ipeghie.

¹⁴ Pano mishi ngo aneno akichhizu kumzapu tsu; panonguye bheri, ane eno amshi akiviu pighilu, ashothi akiviu eno atsayi-ji shokiviu ae.

¹⁵ ‘AMPEU wu timiqoye kinikulu shiuve ikemu hebideuve; Panonguye chhibochhilei eno achuqupuno shepichhi cheuve. Panonguno Alhou panoqo pulhokusuu qhiveno akughushu shi pano xakuluu peive.

¹⁶ Panoqono ajulho mllakeu huno AMPEU ye anheshuve; Panonguno alhoksa shikeuno pa pelo axuidevepe.

¹⁷ Panonguno kuchou kumo lhou lau aghashi, pano puasuno mthamithe keu lhou kitheqo, Israil no khilemu pape chemo keu lhouqoe.

¹⁸ Panonguno pano Lhou, akughushuu shi pano xakuluu, akuxu panoqo tsukeu Lhou kumsumave.

¹⁹ AMPEU no hipau ithulu kelo paye axuideveno pa nuqo eno pa ngaqo peive.

²⁰ Pano pike, “Niye hinguno hilau pano kuphumoae;” pano shou kiu shiveni keno tileno ino juni, kuthovi eno amikucho kumomi hipaqo.

²¹ Pano julho pesu panonguno iloghu kighide, pano wu alhouqo ipikeu lau anheshu, alhou ipi kemu kuchouno alhou kumoe. Tighenguno ashiayeh ipi chekemi ino peithano pano loghu kighideve tsu nani; Kughuzumi shiayeh qo shou ino panongu pelo anheshuvepe nani.

²² Iloghu kighideye ami toi iqu ipeghino ayeghi shou thwokha jeli kumtsu piti nani. Tipauno ayeghi qhou kutolo to nani eno naghutoqo pukhu kuxa pitile nani.

²³ “Ino panoqo shou ashekha kuhakeu kutsakungo sughi nani eno ipiji kumtsu pano shouno peitha nani.

²⁴ Panonguye akhuava eno aghakimki lono thi nani; Panonguye akusu lhoksa lono thinanie. Ino tughashi puwu no pano hakuqoqhi pe nani, tughu kupu pighino pano mighi nani.

²⁵ Aghukishino alaghilalo akithi sughi nani; akiboqolo thughuive keuno pughuqhi nani. Lhothe pumi lhothe limiye thive nani anga kughunu ngo kitekusu mu ghumo nani.

²⁶ Ino panoqo qhoi kutsaleveni cheni, tishianguno khunomu pano kumsuchilelumo nanie.

²⁷ Ikemu niye pano ghumi pelo iwu timiqo shou toluve akepi qheza pemo nani, ni ampino kuchouno pano chinedaqhi anie!

²⁸ ‘Israil ye akuputokeu shiayeh lakhi kumoe; panonguye alokutsu kiumu kuhae.

²⁹ Panonguye kushiye leluvepe keno tipau ithumla, Panonguye kiu shive keno tipau vethamlae.

³⁰ Kishi puzu qhethonhe lakhiye milakhino leluve, qhethonhe chighiye mikinino leluve kya? AMPEU, pano Lhou ye pano qhive; pano wu akumto Lhou ye panoqo tsupuwuve.

³¹ Panoqo ghumino pano lhouye miqemilei kepi ithia, Israil Lhou toi akumtou kumoe.

³² Pano ghumino Sodom ngo Gomora toi kixikula, atsayibo khumtsai eno tughu kupu tsayithi pithi keu toi,

³³ apighi tithi tughu pesu shikeu tsayiji toie.

³⁴ “Panoqo ghumino kiu shivetsu keno AMPEU no kumsupusu ani; pano ghimenike pano ado achipiu khe ani.

³⁵ AMPEU no amkhulu nani eno pano ghime nani; ikiqiveni keu do ighi nani; panoqo puhaveni keu tsala kupunuvae.

³⁶ AMPEU no pawu timiqo xaphelu nani tiye pano kuka kuhave keu pano ithulu kethiuno. Paqe chekemi shou pano amlo ighiqhiyi keu anani; tiye panoqoye akukuphu kuhakeu pano ithulu kethiuno.

³⁷ Tithiuno AMPEU no pawu timiqo vilo iniju nani, ‘Nonguno akumto lhou kepi pukhu chekeqo khile ani kya?

³⁸ Nonguno lhoxu heqhikeu tha pesu loji cheke eno yepenike atsayi-ji pesu mllache kehu! Pano pelo ighi puzu itehino nongu kuphu pelo; pano pelo nongu xaphelu penike pesu wupelo.

³⁹ “Ni eno ilikhino Alhou; kutau lhouye kuchou kumoe. Ino pithive cheni eno ino puxu luve cheni, ino ghuzano shipivi cheni, ino kiu shini keno milakhinomu mujochile mlae.

⁴⁰ Kuchouno niye xu akeu Lhou keke, ino iu peqhepe ino tushoqhi ani,

⁴¹ Niye ighushi zuta mlapui keu chighini cheni eno kuchou xakutha shikeu jutsu nani. Ino ighumiqo shou amkhu luni eno imithi chekemiqo ghimeqhi nani.

⁴² Ipijiye ahji kighiji nani, imujochile kemi kumtsu izutano pithive nanie. Isasu aghu shikemi lakhimu niye ghumo nani; izapukemi eno akughumi ghi thive nanie.”

⁴³ “Ashiayeh kutamiqo, nongu AMPEU wu timiqo sheqhe masae; Pano pithipuaghi kemi pano ghimeqhi nani. Pano aghumi shou amkhu lucheni eno pawu timiqo xine peivetsu cheni.”

⁴⁴ Muse ngo Nun nu Joshua pamano ale hipau sheke tishianguno Israilmino hipau chilu peniyeke.

Muse Tsa Ashekhau

⁴⁵ Alhou no kutsukeu pesu timiqo lau kutsutave kethiu,

⁴⁶ Muse no pi, “Mutsuqheino nonguye ishi tsalalo ino ahza hipaqo nongu tsukeu papelu masa kene. Nongu tianuli vilo hipaqo pikichichilo, tishianguno panongu pelo amikucho shi Alhou no kutsukeu kumtsu papelu pelo.

⁴⁷ Akukutsu tsa hipaqoye abokumsa tsa kumoke; hipaqoye nokuxupu kuchouke. Hipaqo gholulo eno nonguye Jordan katha ikukelo ayeghi nonguno ngolu niye akeulo axu shulu nanike.”

⁴⁸ Tipa tsalanino AMPEU no Muse vilo pi,

⁴⁹ “Muab ghakhulo Abarim Naghutolo wulo tiye Jerikho phughi ghungulo; Nebo Toghilo ikulo eno ino Israilmi tsuniye akeu Kanan yeghi juluvelo.

⁵⁰ Noye tipau naghuto lono thive nani, tiye omu Aron no Hor toghi lono thiveke toi,

⁵¹ kughengu Israilmi gizulo okujo kinikujo amikucho kumo shiveke. Kughou Zin sayeqhalo Kades taun phivilo Meriba zu akeulo nonguno ngo akelo nono timiqo gizu lono iphimo gihumove ke.

⁵² Noye putosuuno ayeghi julu nani ikemu noye ino Israilmiqo tsuakeu yeghilo ilomla nanike.”