ZAKINIU 31 - BAIBEL (BSI)

Joshua no Muse Theli

¹ Muse no Israilmi vilo pikibeghi

² pike, “Niye ampe 120 shivae eno hinguno hilauye nongu sakipheu shilumo ake. Tinguno alauno, AMPEU no ivilo Jordan katha ikupemo piveake.

³ AMPEU Alhou no nongu zuu wunani eno ashiayeh tilau akeqo kutsaleve nani, tishikeu lono nonguno panoqo yeghilo ngolu nanike eno AMPEU no pive ketoi Joshua no nongu sakipheu shi nanike.

⁴ AMPEU no timi hupaqo kutsaleve nanike tiye pano Amarimi kukami Sihon ngo Og leluve ketoi eno pano ghakhu kutsalevetsu ketoi shi nani.

⁵ AMPEU no panoqo shou nongu pelo tokulu shilupe nani, ino nongu vilo pive keu toi nonguye panoqo kutotsu masake.

⁶ Amlo kuloghi shilo eno amlo kumto shilo. Panoqo musa kevilo. Nongu Lhou, AMPEU ampino nongu gholo anani. Paye nongu phevemo momu qhivemo nanike.”

⁷ Tishieno Muse no Joshua kuno Israilmi kumtsu gizu lono pa vilo pi, “Amlo kuloghi shilo eno amlo kumto shilo; nono timi hipaqo sakipheu shipuzu AMPEU no panoqo puasu lau tushoqhive keu yeghilo sailo ngolu nanike.

⁸ AMPEU ampino osaphe nani eno ogholo anani. Paye ophevemo momu oqhivemo nani tighenguno amlo hauve kevilo momu musa kevilo.”

Akutsuniu Mpelo Ayezah Phi

⁹ Muse no Alhou yezah yepe qhi AMPEU wu Puloshoqhi Bohu jukuto kemi Levi lagha achinemi tsu eno Israil lo sakipemi tsu.

¹⁰ Pano panoqo lau ahza tsu, “Ampe akutsuniu ashekha lau apiashe qhive tsukeu mpe veho ighike kumtsu Apusho Pine lo ighono ighaghi hipau phisulo.

¹¹ Israilmi no akumlla-a lakhilo AMPEU nongu Lhou mlla nike ighike lono hipau phisulo.

¹² Kiptimi, totimi, atianuli eno nowu taunlo inami xuakemi kumtsu ku kumqolo tishianguno kumtsu ghano tipau chilu eno AMPEU nongu Lhou gihuni keu ithipeni eno amikucho shi pa kukutsu papelu penike.

¹³ Hitoi shikeu lono nopolo kughukomi khunoqono AMPEU Alhou Yezah khilemu chimlano aphi keno tipaqono chilu nanike. Tishianguno nonguno Jordan katha iku ngolukeu yeghilo xuake tivilo panonguye pa ghokulu shilu nanike.”

Muse vilo Ashekhautsa pi

¹⁴ Tileno AMPEU no Muse vilo pi, “Noye ado kushuwa xumoake. Joshua kulo eno Aphikilo pa sasu ighilo, tishianguno ino akukutsu tsa pa tsunike.” Muse ngo Joshua pama aphikilo wuke

¹⁵ eno AMPEU no Aphiki hukikha phivilo khungkusu tsukucho lakhi lono puthugho luveno pama lau ipeghi piye.

¹⁶ AMPEU no Muse vilo pi, “Noye itheno thiniae eno nono thive kethiu timiqoye ilau amikucho shimove nani eno ino panoqo sasu puloshoqhi shikeu kuboleve nanike. Panonguye iqhiveno panonguno iloniye akeu yeghilo achine kutau lhouqo mllauve nanike.

¹⁷ Kughono tipau shini keno niye panoqo lau amlo ideve nani; ino panoqo qhiveno panonguye kutsaleve nani. Kutsakungo keu akumsapu kutomo panoqo shou ighi nani eno tithiuno panonguno kumsuchilelu nikeuno hipaqo panongu shou shikeuye ni pano Lhou ye panoqo gholo achemove ake ghenguno kena ipi ithi nani.

¹⁸ Tileno ino panoqo kuphumo pive nani kughengu panonguno alhoksa shive eno kutau lhouqo mllawuve ke.

¹⁹ “Itehiye ale hipau yepe qhilo. Hipau pesu Israilmi shikalo tishianguno hipauno panoqo shou thopi shipenike.

²⁰ Ino pano puasu lau tushoqhive ketoi panoqo sasu kinikulu eno aghuma yeghi hipaulo ilo nani. Tilehi panonguno lunishi ke thaqhu achuqupu alu nani eno panonguye alokughuno shi xulu nani.Ikemu panonguye tsughu idesu kutau lhouqo mllauve nani. Panonguye imilive nani eno iwu puloshoqhi kuboleve nani,

²¹ tighenguno kutsakungo keu kumsapu kutomo panoqo shou ikughi nani. Ikemu ale hipauye itaghi phe ache nani eno tipauno pano shou thopi shinani. Itehi ghi, ino panoqo tsunikeu shi tushoqhive keu yeghilo ino panoqo sailo mphilo pinamu panonguno kiu kumsupu ani keno ino ithi ani.”

²² Tipa tsalanino Muse no ale yepe qhive eno Israilmi vilo tipau shikave.

²³ Tileno AMPEU no Nun nu Joshua putsa eno pa vilo pike, “Akumto shi amlo kuloghi shilo. Nono Israilmi sasu ino panoqo vilo tushoqhive keu yeghilo ilolo eno ino ogholo anani ke.”

²⁴ Muse no kaku lakhilo Alhou yezah yepe qhino lakhimu sumovekeu shimo nike kutokupui shi.

²⁵ Pano tipau shi tave kethiu Levi lagha achinemi, AMPEU Puloshoqhi Bohu jukuto chekemi vilo pike,

²⁶ “Alhou yezah kaku hipau ikhilulo eno AMPEU Alhou wu Puloshoqhi Bohu phivilo qhilo, tishianguno tipauno pawu timiqo shou thopi shi ache pelo.

²⁷ Panonguye kiutoi kuthovi eno hekibidemi keno ino ithi anike. Panonguno ino xuakelo AMPEU hebide cheke eno ino thive kethiuye tinguno alaushi hebide nanike.

²⁸ Nongu alaghalo sakiphemi ngo kijemi igi zulo kuhokumqolo, tishianguno ino hipaqo pesu pano vilo pitsunike; pano shou thopi shipenike ino kumgugha ngo ayeghi kusu anike.

²⁹ Ino ithi anike ino thive kethiu timiqoye kixikula shive nani eno ino pano shikakeu peive nani. Ighini keu ghulokilo panonguye kutsakungo keu sholu nani kughengu panonguno AMPEU no shikevilo pi lakha keu shike lono pa pelo aloghu idevepe nanike.”

Muse Le

³⁰ Tileno Israilmi kumtsu ghano ini akelo ale hipau kuchopu Muse no sheke.