ZAKINIU 29 - BAIBEL (BSI)

Muab lo Puloshoqhi Shikithe

¹ Muab yeghilo akelo AMPEU no Muse vilo ahza tsupuzu Israilmi sasu puloshoqhi tsa kiqi hipaqo shipenikeu shie; hipaqo kumtsu AMPEU no panoqo sasu Sinai Toghi lono puloshoqhi shikeu gholo kuphatsu keu ke.

² Muse no Israilmi kumtsu kukutsu puzu panoqo vilo pike, “AMPEU no Ijip lo akukau shou, pawu kijemi shou eno pa ghakhu shou kiu shive keno nongu ampino ithuluvae.

³ AMPEU no akumzapu kije, akichiqhi kepu kumla eno akumsapu pusa shikeu nonguno ithuluvae.

⁴ Ikemu ishi tsala kutolo AMPEU no nongu pelo kiu puju-shijuve akeno tipau vethamlano aphi peke.

⁵ Ampe lhobidi kutolo AMPEU no asayeqha vechesu nongu sasu wuke eno nongu phimini ngo apukhu kuqhoye khilemu aqa shive mphike.

⁶ Nonguye chukepu asho kuha momu atsayiji eno barli-ji shikepu kuhake ikemu paye nongu Lhou kepi nongu shika nike nongu vehupuqo kutotsuke.

⁷ Kughou ninguno a-a hipaulo ighi keno Heshbon lo akukau Sihon ngo Bashan lo akukau Og no ningu sasu aghu shinike ighie. Ikemu nonguno panoqo leluve,

⁸ panoqo yeghi luvetsu eno Ruben ngo Gad laghami dolo kijethape tsuveke eno Manase laghami tuxa lau tsuveke.

⁹ Puloshoqhi hipaulo akeu jeli kumtsu amikucho shi papelo tishianguno nonguno shikeu thwokhalo tokulupu shilu nani.

^10-11 “Ishi tsalalo, nongu kumtsu nowu sakiphemi eno kijemi, nowu kiptimi, totimi eno itimi eno nongu gholo xuakemi inaghami, nosu azu xaputsu chekemiqo kumtsu AMPEU Alhou gizulo puthugho akhanike.

¹² AMPEU nongu Lhou no nongu sasu ishi tsala lono puloshoqhi hipau shinike eno tipaulo amakho akeu ikhilunike nonguye hile anie,

¹³ tishianguno nonguye pawu timi eno paye nongu Lhou kepi itehino mutsuqhei shive pelo, tiye pano nongu lau eno nopuasu Abraham, Isak eno Jakob lau tushoqhive keu toi shipelo.

¹⁴ AMPEU no puloshoqhi hipau shi akeu eno tipau gholo amakho akeqo huye nongu lau likhi sasu shiani ke kumoe.

¹⁵ Paye ishi tsalalo pa gizulo ningu puthugho akemi kumtsu sasu shi anike eno nipolo kughukomi punu mphi keqo ghi sasu shi anike.

¹⁶ “Nonguno kumsulu aghi nanike Ijip lo kuxuye kiu toi eno ashiayeh kutami ghakhu vechesu izuwu keuye kiu toi kela ithi anie.

¹⁷ Panoqo wu aphikumqhupu julho asu, atu, tsandiyi eno shunayino shikeu nonguno ithuluvae.

¹⁸ Mutsumishei shilo ike kiptimi, totimi, abolomi momu alaghami hilehi puthugho akemi khumu AMPEU launo tsughusu wuveno ashiayeh kutami lhouqo mllauve kevilo. Tishive aye tipauno khumtsai eno tughukupu tsani lakhi thuwu ipeghikeu kuhu lakhi toive nanike.

¹⁹ Mutsumishei shilo ike ishi tsalalo hile akemi lakhi nomu tsaqui piputovekeu tsa hipaqo chiluve keghi pa likhi pa ghoshi xu wuve aye pa ghenguno thwokha kumtsu akivipu shinani kepi kumsu kevilo. Tino nongu kumtsu akivimi eno alhoksami aphiphishi kutsave nanike.

²⁰ Timi tikithipuye AMPEU no pheve nanike. AMPEU loghu kighideno pa shou iqu ikughi nani eno kaku hipaulo kutsa kungokeu yepe qhikeu kumtsu AMPEU no qhoi pa kutsalevemoke kutolo pa shou ikughi pe nani.

²¹ AMPEU no Israil laghami kumtsu gizulo pa kugha pesu kichekipiye lakhi shitsu nani eno AMPEU wu akukutsu kaku hipaulo yepua keu puloshoqhilo musuini jeli kiqi lono kutsakungo keu pa shou sughi nani.

²² “Ighini keu tiqhelilo nopolo kughukomi ngo inaghamino ala kushuwalo ayeghi akeqo lono AMPEU no noyeghi shou kutsakungo eno aghime sughikeu ithulu nani.

²³ Aluzaqoye asutsuni kuhano thoqhaleive nani amichu ngo amtino nhaluve nani; kiumu shosumo nani, alupi ghi ipeghimo nani. Noyeghiye Sodom ngo Gomora eno Adma ngo Zeboim phughiqo toive nani, tipaqoye AMPEU no Pa loghu kighide lono kutsaleveke.

²⁴ Tileno ayeghiqha kuchopu lono iniju nani, ‘AMPEU ye kushiye panoqo yeghi pesu hikithipu shivetsu kya?’

²⁵ Tileno hitoi khochilekeu anani, ‘Tiye AMPEU wu timiqono pa sasu puloshoqhi shikeu panonguno kuboleveke, paye panoqo puasu Lhou eno pano Ijip lono panongu saipeghi kelono puloshoqhi shikeuke.

²⁶ Panoqono khilemu mlla chemokeu kutau lhouqo qeuveke, tiye AMPEU no panoqo vilo mlla kevilo pi lakha chekeu lhouqoke.

²⁷ Ikehu AMPEU no pawu timiqo shou aloghu ideveno pano yeghi shou kutsakungo keu kaku hipaulo yepeqhikeu kumtsu sughiveke.

²⁸ AMPEU ye shishe aloghu ideveno pa loghu kije lono pano yeghi lono panoqo akuhu lono nhuve eno inaghami yeghilo hapuwuveno ishi tsalalo panonguye tilau ani.’

²⁹ “AMPEU ningu Lhou no kusupe puakeu thime hami anike; ikemu paye pa yezah pephepiyevae eno ningu eno nipolo kughukomiqoye alhokupujulo tipau gholu masake.”