ZAKINIU 28 - BAIBEL (BSI)

Aghokulu Kukumgha

¹ “Nonguno AMPEU nongu Lhou gholu eno pano ahza tsukeu ishi tsalalo ino nongu tsu akeu kumtsu amikuchoshi pelu aye pano nongu ayeghilo ashiayeh akeqo kumtsu nguno akijeu shitsu nani.

² AMPEU nongu Lhou gholulo eno kukumgha hipaqo kumtsu nongu wu shilu nanike:

³ “AMPEU no nowu taunqo eno aluqa kumghatsu nanike.

⁴ “AMPEU no atianuli kutomo, tuxatini kumzapu eno amshi ngo bheri kutomo pesu nongu kumghatsu nanike.

⁵ “AMPEU no nowu tuxatini eno abi ale shou kumghatsu nanike.

⁶ “AMPEU no nonguno mla ithakeu thwokhalo kumghatsu nanike.

⁷ “Aghumino nongu haleighi keu AMPEU no leluvetsu nani. Panonguno aqha lakhi kudauno nongu haleighi nani ikemu panonguye nongu launo apanagha pokepu shinani.

⁸ “AMPEU Alhou no nongu kumla kumghatsu nani eno nobi alelo athi pe shepichhi tsua nani. Pano ayeghi nongu tsu akeulo pano kumghatsu nani.

⁹ “Nonguno AMPEU Alhou gholu aye eno pano ahza tsukeu thwokha shi aye, nongu pesu pawu timiqo shi nani, tiye pano tushoqhive ke toi shi nani.

¹⁰ Tile ayeghilo timi akeqo kumtsuno AMPEU no nongu pesu pawu timiqo shilu pekeu ithuluve nani.

¹¹ AMPEU no atianuli kutomo, amshi kutomo eno tuxatini kutomo pesu nongu puasu vilo nongu tsuni keu shi tushoqhive keu yeghilo nongu tsu nani.

¹² Pano pawu kinikulushi kike puakeuki atsutsu lono atusho achipi lono tsutsughu piqitsu nani eno nongu kumla kumtsu kumghatsu nani, tishikeu lono nonguye ashiayeh kutomo punalu nani ikemu nonguye khuno launomu nalu kepu shimo nani.

¹³ AMPEU Alhou no nongu pelo ashiayehqo gholo sakiphemi shipe nani eno apapemi shipemo nani; nonguye pulhapujulo axukivishi anani eno khilemu tomovekeu shimo nani tiye nonguno amikucho shi pa yezah ishi tsalalo ino tsu akeu papelu keu lono tishilu nanike.

¹⁴ Ikemu nonguno kiu kiu lo namu khilemu tipaqo hebide kevilo momu kutau lhouqo mlla eno qekevilo.”

Aghokulukumo Jume

¹⁵ “Ikemu nonguno AMPEU Alhou hebide aye eno pano ahza tsukeu ngo ayezahqo ishi tsalalo ino tsuakeu nonguno amikucho shi pelumo aye alhoksa jeli hipaqo kumtsu nongu lau ikughi nani:

¹⁶ “AMPEU no nowu taunqo eno aluqa musuinive tsu nani.

¹⁷ “AMPEU no nowu athi, tuxatini eno tipaqo pesu nochuqupu mlalu chekeu musuinive tsu nani.

¹⁸ “AMPEU no nongu shou musuini keu lono atianuli aghulo likhi punu, tuxatini akivi shimo eno amshi ngo bheri aghulo likhive pe nani.

¹⁹ “Nonguno mla ithakeu thwokhalo AMPEU no musuinive nani.

²⁰ “Nonguno alhoksa mla eno AMPEU milive aye pano kutsakungo keu, kubangu keu eno akupuna nonguno mla itha keu kumtsulo sughi tsu nani, tiye papashi eno qhoi nongu kutsale khavemoke kutolo tishi nani.

²¹ Pano kusukini shelo kusukini puwu puzu nonguno ngoluniye kuto akeu yeghilo nongu milakhimu qhimove nani.

²² AMPEU no kitixe kusu, ingughuikeu eno aghakimki pesu nongu ghimeqhi nani, pano akulu eno pughaqhikeu mulhu pesu nowu tuxatini kutsaleve tsu nani. Kutsakungokeu hipaqoye nonguno thimoke kutolo tishi ananike.

²³ Tsughu qhimove nani eno noyeghiye atu toi tsatsaive nani.

²⁴ Tsutsughu zuqhulo nongu kutsavemoke kuto AMPEU no pasapagha yeghi mukhu eno pasapagha saye piqitsu nani.

²⁵ “AMPEU no noghumiqo pelo noshou tokulupu shive penani. Nonguno aqha lakhi kudauno panoqo leighi nani ikemu nonguye panoqo launo apanagha kuhapove nani, eno nongu shou kiu shi ani kela tipau ithulu pesu ayeghilo timi kumtsu no thughuive nani.

²⁶ Nonguno thive kelo ashi-aghauno ighi puzu nongu shikumo chu nani, eno tilehi khunomu tipaqo hakumsa puwuvemo nani

²⁷ AMPEU no nongu shou amishe puwu nani tiye Ijipmi shou pano puwu keu toi. Pano nongu phimpilo apiyi qeqeshi piyipe nani. Nongu phimpiye apiyino nhaluve nani eno muthomuzai nani ikemu tipau shipivi mla nani.

²⁸ AMPEU no nongu pelo akukumsu hauvepe nani; pano anhethi kighiche ngo kubangukeu pesu nongu ghime qhi nani.

²⁹ Nonguye pucho mughu ghi anhethi kighicheni lakhi toi hula hila kuka ghaju nani eno nonguye ala phuju puha nani.Nonguno kiukiu mla itha namu kughukolumo nani. Tamono nongu qodanedaqhi eno suqoqhi nani eno nongu kuphuni kemi lakhimu kuha nanike.

³⁰ “Nonguno ilimi lakhi sasu kughupu kighini nani ikemu kutamino li sasu kulauve nani. Nonguno aki shipe qhi nani ikemu tile khilemu ngomo nani. Nonguno atsayilu lakhi chi nani ikemu tipau xathi khilemu chumo nani.

³¹ Nomishi qoye nogizu lono ghiqhive tsu nani ikemu nonguye tipau shi kiumu chumla nani. Nonguno ju apulaghi nowu gadaha sunhe sawuve nani eno tipaqoye notsuchilemo nani. Nowu bheriqoye noghumi tsuve nani eno nongu kuphuni kemi lakhimu kuhave nani.

³² Nonguno ju apulaghi nopu nongaqoye inaghami lau aqemi shipenike tsupu wuve nani. Ghulo atsu-tsu notianuliqo ideighini malaye juaniepi nongu nhethino qeive nani.

³³ Inagha shiayeh lakhino nonguno akaveshi tuxatini mlaphe puthu pua keu kumtsu luvetsu nani ikemu nonguye kiumu ithumla ke likhi kumono tamono nongu qodaqhi eno akijikusa pushi peitha nani.

³⁴ Nonguye aghichhe ghime shi kelauno akukumsu hauve nani.

³⁵ AMPEU no akusu eno vimlakeu piyi pesu nongu pukhulo ikughipe nani; amisheno nokutsu lono apukhu kutolo nhaluve nani.

³⁶ “AMPEU no nongu eno nokukau sasu inaghami yeghilo, khile nongu na nopuasuqo pinamu xuju mphi keu-a-lo sawuve nani; tilau nonguye asuatuno shikeu lhouqo qeuve nani.

³⁷ Aghakhu khipaqolo AMPEU no nongu kuthole puwuni keno, timiqoye nongu shou kiu shivea keno jupesu apuchopungove nani; panonguno nongu junu eno nongu thaigha nani.

³⁸ “Nonguno axapiti kumzapu shi yisu nani ikemu aghulo likhi ghile hulu nani, kughengu tulhaquno nowu tuxatini chuvetsu nanike.

³⁹ Nonguno atsayilu chi puzu tuchomujo nani ikemu nonguye tipaqo lono atsayithi xolumo nani momu tipaqo tsayi-ji sholumo nani kughengu apitheno atsayibo tsavetsu nani.

⁴⁰ Noyeghi aqha kumtsu oliv subo ipeghi nani ikemu nonguye oliv teli kiumu ithumla nani kughengu oliv lothiye pithi ixive nanike.

⁴¹ Nonguye anu eno anga lho nani ikemu tipaqo puha khave nani kughengu panonguye aghukishi lono akughumi shi sasu wuve nani.

⁴² Nosubo eno axabo kumtsu pitheningano tsathave tsunani.

⁴³ “Inaghami noyeghilo akemiqono alaushi muto kithe auve nani eno nonguye asheshino hau kitheve nani.

⁴⁴ Panonguno nongu puna kepu pisa anani ikemu nonguye panoqo punalu kepu kiumu kuha nani. Ashekhaloye panonguno noshou ayehkipemi shive nani.

⁴⁵ “Kutsakungo keu hipaqo kumtsu nongu shou ighi nani eno nongu kutsalevemo ke kutolo nogholo auve nani kughengu nonguno AMPEU nongu Lhou gholumo ke eno pano ayezah tsukeu kumtsu nonguno papemoke.

⁴⁶ Nongu eno nopolo kughukomi shou Alhou no kughathabeve keu michishi tipaqono alhokupujulo nongu shou anani.

⁴⁷ Alaghi thwokha lono AMPEU no nongu kumghatsu ke ikemu nonguno alokivishi eno amlo kiqi lono pa qemoke.

⁴⁸ Tighenguno nonguye AMPEU no aghumi nongu shou puwutsuniye akemiqo qeuve penani. Nonguye akhu amzu shive, tughuthive eno aphi kumsave nani eno thwokha avehupu shive nani. Nongu kutsale khavemoke kutolo AMPEU Alhou Ijip lono nongu xaphelu keu huno nongu gholo ananike.

⁴⁹ Ayeghi shekichi kudauno AMPEU no ashiayeh lakhi nongu shou saighi nani, tipau shiayeh tsa nonguno mthake. Panonguno aluqu toi nongu shou kuptshupe ikughi nani.

⁵⁰ Panonguno ayikusa shinani eno itimi lau na muchomi lau pinamu kimiyekeu kutilamu kuha nani.

⁵¹ Panonguno nomishi ngo nowu tuxatini chukhave tsunani eno nonguye akhuava shi thive nani. Panonguye nongu ghenguno athi, atsayi-ji oliv teli, amshi momu bheri kiumu qhitsumo nani; eno nonguye thive nani.

⁵² Panonguno AMPEU Alhou no nongu tsuakeu yeghilo taun akeqo kumtsu leighi nani eno nonguno pukhupe akeu aliwo qhemghai putu puakeqo kumtsu ikiqive nani.

⁵³ “Noghumino nowu taunqo khasupe le akelo nonguye achuqupu ghenguno shishe avekusa shive kelauno AMPEU Alhou no atianuli nongu tsukeu heqhi chuwuve nani.

^54-55 Akuxu xuthivekemi kijemi kibo lono punukemi pinamu khasupe le akelo shishe avekusa shive no pa tianuli khami heqhi chunani kughengu paye achuqupu kutau kuha kehu. Eno paye atianuli tipau shi pa thikuzuu momu pano kimiyeche keu nipu momu pa tianuli kutami aghikeqo pinamu tsumono pano chuve nani.

^56-57 Akuxu xuthivekemi kijemi kibo lono punukemi totimi shianamu, liye akinino kutsasa kehu khilaumu ala chesu wuchemo kemu lighi tipaphi shive nani. Aghumino li phughi khasupe leluve kelo, liye achuqupu ghenguno shishe avekusa shive puzu linga kughunu akitheshi punukeu eno tipau kuzukeu nha ghi kusuuno chuve nani. Liye pano kimiye chekeu akimi mu tipau kusajemo nani momu li tianuli khuumu sasu kusaje chumo nani.

⁵⁸ “Kaku hipaulo yepe qhipuatsu keu Alhou kukutsu kumtsu nonguno amikuchoshi papelu moaye eno AMPEU Alhou je akichiqhipu eno akumzapu nonguno qhoqhu gihumo aye,

⁵⁹ pano nongu shou eno nopolo kughukomi shou shipivimla kepu kusukini eno pusa kumsapu puwu nani eno tiye khilemu hakhamla kepu shi nani.

⁶⁰ Pano nongu shou Ijip lo pujushiju keu kumsapu kusukini jeli ghuthu akiniu ghi sughi nani eno nonguye vikithemla nani.

⁶¹ Tilikhi kumono Alhou yezah eno kutsukeu kaku hipaulo pipe puamokeu kusukini eno kitixe kusu jeli kumtsu pano puwu nani eno nonguye kutsaleve nani.

⁶² Atsutsulo ayepu akeu jejehi nonguno alau ikowove aghi namu nongu gholo aghulo likhi puxulu nani kughengu nonguno AMPEU Alhou gholumo kehu.

⁶³ AMPEU no nongu pelo kinikulu shilu eno alau ikowolu pekeulo alovi ketoi pano nongu kutsaleve eno shipsave keulo ghi paye alovi nani. Nonguno ngoluniye akeu yeghi lono nongu nhujove nanike.

⁶⁴ “AMPEU no ashiayeh kumtsu gholo nongu kuthole puwuve nani, ayeghi aku lakhi lono lakhi kutolo puwuve nani, tilau nonguye asu atuno shikeu lhou qeuve nani, nongu na nopuasu namu khilemu puzuuye mlla mphi keu lhouqo mllauve nani.

⁶⁵ Nonguye khipa-alo mu iqughai keu sholumo nani, a-a lakhimu nowu kepi pimla nani; AMPEU no kutakihi keu, lajupu kuhakeu eno avekusa pesu nongu kuzupholuve nani.

⁶⁶ Nongu kuxuye pulhapuju akumsapulo anani. Putho pucho akuighupu nongu lolo chhitoive nani eno nonguye akithi kumsano tamo mithe xu acheuve nani.

⁶⁷ Nonguno thwokha ithulu kelo nonguye akumsa launo amlo kukushive nani. Inaqhe atsutsu avelau shive aghi penishi nani; kijili atsutsu inaqhe shive aghi penishi nani.

⁶⁸ AMPEU no ashukaki lono Ijip lo nongu saide puwuve nani, pano nonguye tilau itaghi khilemu wukithemo nani kepi pivea kemu. Tilau nonguno noghumi lau aqemi shinike nolikhi nojesuniye pukaputsa nani ikemu khuunomu nongu qhulu nishimo nani.”