ZAKINIU 26 - BAIBEL (BSI)

Ghile Kumllagho

¹ “AMPEU nongu Lhou no ayeghi nongu tsu akeulo ngoluve eno tsaqui kughunaluve kethiu,

² nongu milakhi khino tuxa tini xolu tughiu lono amqo kotha pesu ashoghilo sulo eno tipau pesusu akumlla-a kuto puakeu lakhilo peighilo.

³ Tipa ghulokilo achineu ampi shi aghi keu lau wulo eno pa vilo pilo, ‘Ino itehino AMPEU iLhou gihu ikhilu anike pano nipuasu tsunikeu shi tushoqhive keu yeghilo niye iloghiluvae.’

⁴ “Achineuno nolauno ashoghi ikhilu nani eno AMPEU nongu Lhou wu akiptia gizulo tipau qhinani.

⁵ Tipathiu AMPEU gizu lono nonguno atsa hipaqo pikibewolo: ‘Ipuasuye Aramiami lakhike, itsu itsuche kemi pa kibolomi sasu Ijip lo kughuna niye wuke. Panonguno tilau wuke ghulokilo panonguye aghulo likhike ikemu akuka kumto eno anoghi shiayeh lakhi shiluve.

⁶ Ijipmino akijikusapu shi ni peithake eno angkashi ningu pelo aqemi toi mla peke.

⁷ Tileno ninguno AMPEU nipuasu Lhou vilo kuphu lepi ighamuku ke. Pano nisutsa chilutsu eno nighichhe ghime, nikijikusa eno nikuxu iju akeu jutsuke.

⁸ Pa kuka kumgha kije pesu pano Ijipmi launo ningu xapheluke. Pano puchopungo kepu eno akumzapu kumla shike eno akichiqhi kepu shitsue.

⁹ Pano hilau ningu saghike eno kinikulu aghuma akeu yeghi hipau ningu tsue.

¹⁰ Tighenguno itehiye ino AMPEU lau pano itsuvekeu lono ghile hulukeu atughiu muqo pesu ighi anike.’ “Tipathiuno AMPEU gizulo ashoghi qhilo eno tilehino mllalo.

¹¹ AMPEU nongu Lhou no thwokha jeli aloke pesu nongu eno nokibolomi tsukeu ghenguno shikimthilo; Levimi ngo inaghami nongu gholo xuachekemi pelo nonguno alokivishi pinyi akeulo supelo.

¹² “Ampe akuthukulo nowu tuxa tini lono chighi saje lakhi pesu Levimi ngo inaghami ngo mighimgha eno chimemiqo tsulo, tishianguno aqoaho kumtsulo panonguno chukepu avehupu shi akeu ithulupelo. Nonguno hipau shive puzu

¹³ AMPEU vilo pilo, ‘Akimthepu chighi saje hu lakhimu ikilo qhimovae; nono ahza itsu keu toi ino tipau pesu Levimi ngo inaghami ngo mighimgha eno chimemiqo tsuvae. Niye chighi saje ghenguno nono ahza tsukeqo gholo lakhimu hebidevemo momu kumsumavemo ke.

¹⁴ Ino mloqa akelo niye tipau kiumu chupuamoe; ino achinepulo mithemono akelo tipau lono kiumu ikhi pesu iki lono halau ipemoke; eno tipau lono kiumu ikhi pesu kithimi ghenguno akumllagho tsupe puamoe. Niye aghokulu shike, O AMPEU; nono chighi saje ghenguno ahza tsukeu thwokha kumtsu ino shipuani ke.

¹⁵ Kungughalo okimthe-a lono jupiqi tsulo eno owu timi Israilmi kumghatsulo; nono nipuassu lau tushoqhiveke toi kinikulu eno aghuma yeghi ningu tsuve keu shou ghi kumghatsulo.’

AMPEU wu Timiqo

¹⁶ “Ishi tsalalo AMPEU nongu Lhou no ahza nongu tsu anike pa yezah kumtsu pelulo; tighenguno nongu mlo kuchopu amikucho shi pa gholulo.

¹⁷ Ishi tsalalo nonguno AMPEU noLhou kepi ithithai shiluvae; nonguye pa gholuni ke, pa yezah kumtsu peluni keu eno pano ahza tsukeu kumtsu shini keu nonguno tushoqhivae.

¹⁸ Ishi tsalalo AMPEU no pano tushoqhiveke toi pawu timiqo kepi nongu ikhiluvae; eno pa yezah kumtsu pelu lopi pano ahza nongu tsue.

¹⁹ Pano ashiayeh lhoqhi puakeqo kumtsu nguno nongu pesu akijeu shitsu nani eno nonguno akishe ngo agigihu pa jelo sughi nani. Pano tushoqhive ketoi nonguye pawu timiqo shi nanike.”