ZAKINIU 22 - BAIBEL (BSI)

¹ “Akusami Israilmi mishi momu bheri lakhi akighi ijoveno pocheghi keu nono ithulu kelo, tipau palokutove kevilo; pa lau tipau saideghive tsulo.

² Ikemu tipau mpiuye alakushuwalo xuacheghi aye momu tipau mpiu khuu kela nono mtha aye okilo tipau sawuvelo. Kughou tipau mpiuno phususu ighini keno tipau pa tsulo.

³ Gadaha lakhi nono sholu kelo momu aphi mini lakhi ithulu momu nokusami Israilmi lakhino kiu kiumu puhave kelo, tipaphi lono shilo.

⁴ “Akusami Israilmi lakhi wu gadaha momu amshino veqhive aghi aye tipau palokutove kevilo, ikemu tipau sunheputhuni ke pa kuphulo.

⁵ “Totimiye kiptimi phimini pepu kevilo eno kiptimiye totimi phimini pepu kevilo; AMPEU nongu Lhou ye tikithipu shichekemi timiqo mithi chenike.

⁶ “Asubo lakhilo momu ayeghilo aghau pusu lakhilo azano ayikhu va aghikeu momu ati sasu aghikeu nono sholu aye nonguye aqu luve kevilo.

⁷ Nonguno aghauti luve luvi ikemu aqu pelo wuve pelo tishianguno nonguye axupushu eno kinikulu kuxu xulu nanike.

⁸ “Nonguno aki akithe shikelo aki kutsuqa mutsulo putukha keu showolo. Tishiaye khualano veqhiveno thive pinamu nonguye amakho pumo nanike.

⁹ “Nowu atsayililo atsayibo gholo axa jeli kini sukevilo; nonguno tishi aye atsayithi ghi eno axa kutau ipeghi keu ghi peithani keulo lakukha anike.

¹⁰ “Amshitsu ngo gadaha kuma tsugha kuqhano aluhole pekevilo.

¹¹ “Amhi ngo phepheyi keu yethi kuma pesu ghokeu phi ukevilo.

¹² “Nongu phimini ashe cheku bidilo tubolei yethi tsughuda pukulo.

Kipti-toti dolo Muqhamiqhi Yezah

¹³ “Timi lakhino ilimi lakhi luni kelo hithiu paye li sasu kughuna nishimoveni.

¹⁴ Ikehu pano li nguku kepushi akimki iqiphe puzu pama kughunakelo liye atathe shimove aghi kepi ngukuni.

¹⁵ Titoi shi aye ayiliu puazaye pa nonga ayiliuye atathe kepi pilu kepushi kulakupulo qhazukeu phi ahji medave keu pesu kughakutha-alo wupuzu taunlo sakiphemi piyelo.

¹⁶ Ayiliu papuno panoqo vilo ishi pilo, ‘Ino inga pesu timi hipau kilo puwoke lauye itehi paye li junishimovae.

¹⁷ Pano akimki iqiphe puzu li sasu kulakupu shikelo liye atathe kumove aghi kepi nguku anike. Ikemu michithai tsuakeu hipau anike ingaye atathe ke; kulakupulo qhazukeu philo ahji medave keu hi anike julo!’

¹⁸ Tileno taunlo sakiphemino akimi tipau sawo ghaqhilo.

¹⁹ Panonguno pa shou tsandiyi atachu 100 asuchulo eno tipau pesu atotiu papu tsulo, kughengu timi tipauno Israilmi totimi lakhi shou kuthakughapu sughike. Tinguno alauno, liye pa nipu shi ache nani eno pano xu ake thaqhulo khilemu li jumuvekeu shivemlake.

²⁰ “Ikemu nguku akeu huye kuchou shi aghiveni eno ayiliu huye atathe kepi michiluve kepu kuha aye,

²¹ panonguno li sasu papu no kikhala kulaghilo wulo eno tilano aphughi tipaulo kiptimiqono atu pesu li veqhi pithivelo. Lino kulau mphilo lipuno kilo ake lono kutami sasu ashi aji kuqhave aghi puzu akukujopu lakhi niu timiqo gholo shiveke. Hitoi shi puzu nonguno alhoksa hipau ikhivelo.

²² “Timi lakhino kutami nipu sazu aghi kelono kughalu aye pama kinikujo pithivelo. Hitoi shipuzu nonguno alhoksa hipau ikhivelo.

²³ “Timi lakhino taun lakhilo ilimi lakhi kutamino inive kemi sazu aghi kelono kughaluve aye

²⁴ nonguno pama sasu taun nguno khalau saipe puzu atu pesu pama veqhivelo. Ayiliuye thimasake kughengu liye taunlo akeghi hakhotsu penike ighamuku ighamoe, li sutsa chikulupu shi akeghi. Timi huye thimasake kughengu paye timino inivekeu sazuke. Hitoi shipuzu nonguno alhoksa hipau ikhivelo.

²⁵ “Timi lakhino aluza lono kutami lakhino inivekeu ilimi lakhi sazuve aye;

²⁶ akiptiu likhi pithivelo, ayiliu shou kiumu shikepu kumoke kughengu liye thive kuzupu xine shipuamoe. Hiye timi lakhino kutami lakhi hekuluqhive puzu pa heqhi pithive keu tsakughapu sasu aphiphike.

²⁷ Timi huno aluza lono kutamino inive keu ilimi sazuveke eno lino hakhotsu penike igha namu li kuphunikemi milakhimu kuhae.

²⁸ ‘Timi lakhino kutamino ini mphi keu ilimi lakhi sazu aghi kelono kughalu aye,

²⁹ paye kulaliu me tsaniyi atachu lhopungu pesu ayiliu pu lomoaye sake eno liye pa nipu shiluvemasa ke; kughengu pano anguka lono lipelo pa sasu ashiaji kuqhapeke. Pano xuake thaqhulo paye li sasu kughuxa mlake.’

³⁰ “Timi khumu papu nipu sasu ashi aji kuqha puzu papu shiputha kevilo.”