ZAKINIU 21 - BAIBEL (BSI)

Ghiqhivekelo Xathamlakeu Vehu

¹ “AMPEU no nongu tsu akeu yeghilo timi lakhi heqhi pithipe aluzalo aghini eno khuno pa heqhive keno nonguye mthaveni.

² Tishi keulo nowu sakiphemi ngo kughakuthamino wupuzu akumo khile aghi keno tipa-a kupunulo taun akeqo dolo ado khitohi keno mighijulo.

³ Tileno akumo phulukeu kupunulo aghikeu taunlo sakiphemino khilemu akumlalo peitha mphikeu mishi alhothe lakhi kishelulo.

⁴ Panonguno tipau sasu aghokiti azu khilemu qhaive chemokeu kupunulo a-a lakhilo saiqilo eno ayeghi khipau khilemu holemphi momu kiumu shosu mphikeu-a lono panonguno tipau kuo hechheve tsulo.

⁵ Levi chinemi ghi tilau wumasa ke kughengu heqhi buqhive keu tsa kughakepu jeli kumtsulo panonguno xatha nanike. AMPEU nongu Lhou no paqe penike panoqo kishelu puanike eno pa je lono kukumgha jekubetsu peniyeke.

⁶ Tilano timi heqhi puaghi keu-a lono taun akupunuu shi aghikeulo sakiphemi kumtsuno amshi shouno panoqou mutsulo

⁷ eno ishi pilo. ‘Ninguye timi hipau heqhimoke eno khuuno hipau shikeno ninguye mthae.

⁸ AMPEU, owu timi Israilmiqo, nono Ijip lono xaphe saghi kemiqo kipimi peivetsulo. Ningu kipimi peivetsulo eno kiumu mthakemi lakhi heqhivekeu makho nishou xapipe kevilo.’

⁹ AMPEU no kiu shilopi keno tipau shikeu lono heqhivekeu makho nongu xapipe monanike.

Kughalukemi Totimi

¹⁰ “AMPEU nongu Lhou no aghukishi lo tokulu nongu tsu kelo eno nonguno akughumi kughalu kelo,

¹¹ tipaqo gholo totimi ajukivi nonguno ithuluvi eno nonguno tipau sasu kughuna nishive nanike.

¹² Li sasu nokilo wolo eno tilauno li pelo li kutsu miyeve, au mutsu yeve

¹³ eno aphimini kilive pelo. Liye okilo ngo puzu aqhi lakhi kutolo li puaza ghenguno mloqa pelo; tithiuno nonguno lisasu kughunalu nani.

¹⁴ Hithiazuu, nonguno li lunishimo napiaye nonguye li pelo li gho shiwuve pelo. Nonguno angukashi li pelo nosasu ashi aji kuqhapeke ghenguno nonguye aqemi lakhi toi li peithamlake eno li jekepu kumoe.

Anu Atughiu Mheghi

¹⁵ “Timi lakhino anipu kini akelo pama kinikujo anuli punu tsuni ikemu anu atughiuye pano qhuivulai chekeu nipuno punukeu nu shimono aghiluvi.

¹⁶ Timi tipauno pa tianuli gholo amheghi kijetsu ke ghulokilo paye pa nipu pano qhuivu chekeu nu lau agi juve puzu anu anoghiu saje pesu tipau tsukepu kumoe.

¹⁷ Paye pa mheghi saje kini pesu panu anoghiu tsumasake, anu tipauye pano qhuchekeu nipu nu shi aghimonamu. Timi lakhiye panu anoghiu gihu masake eno ayeh lo pano ithulu kepu shi akeu saje pa tsu masake.

Hekibide Nu

¹⁸ “Timi lakhino anu lakhi akelo tipauno kuthovi eno hebidekeu shi aghini eno apuazano pa ghimeqhi keghi panoqo gholumoni.

¹⁹ Tishiaye pa puazano taun khilehi pano xuacheni keno tipaulo sakiphemi gizulo sawu puzu pa shou xathakeu tsupelo.

²⁰ Apuazano sakiphemi vilo ishi pipelo, ‘Ninu hipauye kuthovilo ke eno hekibide ke eno nigholumo ke; paye akive tholo eno shokumzumi ke’.

²¹ Tileno taun tipaulo kuamino atu pesu pa veqhivelo eno tishi keu lono alhoksa hipau shipuhavelo.Israil lo akemi kumtsuno kiu shive keno chilu puzu musave nanike.

Mudomugho Yezah

²² “Heqhi buqhive keu ghenguno milakhi pithive aye eno pa kithi kumo atsukucholo tshuqhi aye

²³ tiye putho loghi tishi qhipuave kepu kumoke. Tipa tsalanino tipau qhove masake kughengu akithi kumo lakhi atsukucholo tshuqhi pe puave keu lono Alhou wu musuini kepu aghakhulo sughive chenike. Akithi kumo qhovelo tishianguno AMPEU nongu Lhou no ayeghi nongu tsuakeu shipixive monanike.”