ZAKINIU 20 - BAIBEL (BSI)

Aghukishi Vehu

¹ “Nonguno noghumi sasu aghu shiniye wukelo nonguno aghushikulu ngo khurshi eno ghushimi nowu akeu nguno alau kumzapu ithulu keulo nonguye tipaqo musa kevilo. AMPEU nongu Lhou, Ijip lono nongu xaphelu keu huno nongu gholo ananike.

² Nonguno aghu shimphi lono achinemi lakhi pelo azuu ighi pelo eno nowu ghushimi vilo pipelo,

³ ‘Israil lo timiqo, inilo! Ishi tsalalo nonguye aghu shini chenike noghumiqo jumsa kevilo momu amlo loti kevilo momu izuichoive kevilo.

⁴ AMPEU Alhou no nongu gholo wucheni eno pano tokulupu nongu tsu nanike.’

⁵ “Tileno kijemino timiqo lau asheshuno pilo, ‘Hilehi timi khuala aki lakhi shiqhi puani kemu tipau shikimthe mphi kesha? Tishi aghi aye paye akilo wolu nani. Tishimono aghukishi lono paye thiveni kelo kutamino paki shikimthe keu shini chenike.

⁶ Hilehi timi khuala atsayilu chipe qhipuani puzu tipau tsayithi xokutsu kepu dokivi shimlano ani kesha? Tishi aghi aye paye akilo wolu nani. Tishimono aghukishi lono paye thiveni kelo kutamino atsayi-ji chusholuveni ake.

⁷ Hilehi timi khuala kughupu kighini pesu ani kesha? Tishi aghiaye pa kilo wolu nani tishi mono aghu kishi lono paye thiveni kelo kutamino pano ini puakeu atotiu sasu kulauve nanike.’

⁸ “Kijemino timiqo vilo highi ishi pilo, ‘Hilehi timi khuala anhu thiveno musa ani kesha? Tishi aghi aye paye akilo wolu nani. Tishimoaye pano kutami mlolo anhu thivekeu shive tsu nanike.’

⁹ Kijemino ghushimi vilo pitave kethiu amqo lakhikhi ghenguno sakiphemi kishephelo.

¹⁰ “Nonguno aphughi lakhi leu kelo, atughushi tipaulo akemiqo pelo qhoi noulo phesuve penikeu dokivi tsulo.

¹¹ Panonguno khagho khaqhi puzu qhoi noulo phesuve aye panongu kumtsu noqemi shipelo eno tsuikhomo nongu qe apelo.

¹² Ikemu tipau phughilo akemi qhoi phesuvemono aghu shinikeu shive aye nowu ghushimi pelo tipau vehomxaluve pelo.

¹³ Kughou AMPEU Alhou no nongu pelo aphughi tipau khasupe leluveni keno tilehi kiptimi aghi keqo kumtsu pithikhavelo.

¹⁴ Tishimu, nolikhi nosala shi totimi ngo ititunuqo, atsu-aqu eno aphughilo aghi keu kumtsu luvelo. Noghumiqo wu thwokha kumtsu nonguno peithalu nanike. AMPEU no tipau nongu tsuve ake.

¹⁵ Tikithipu shi ghi nonguno ngoluve keu yeghi lono putosuu aphughi khijehi aghini keno tipaqo shou shipukulu nani.

¹⁶ “ikemu AMPEU no nongu tsu akeu yeghilo aphughi khijehi khasupe leluni keno thwokha kumtsu pithikhavelo.

¹⁷ Timi kumtsu qhoi pithi khavelo: Hatimi, Amarimi, Kananmi, Perizimi, Havimi eno Jebusimi, tiye AMPEU no ahza nongu tsuveke toi shilo.

¹⁸ Panoqo pithivelo, tishianguno panonguno nongu pelo AMPEU shou axine shipemo nike tiye panoqono pano lhouqo mllakeulo kuchhube kutsula jeli shikeu nongu shikapiyelu nosake.

¹⁹ “Nonguno aphughi lakhi lelu nike pukaputsa kelo ado kushuwa tipau khasupesu auve kepu shie pinamu tipaulo axathiboqo yeqhi kevilo. Axathi chulo ikemu axathibo shipsa kevilo; asuboye noghumi kumoke.

²⁰ Nonguno asubo kutauqo yeqhiluvi eno aphughi khasupe lelumoke kutolo akala shikepu shi tipaqo peithalo.”