ZAKINIU 2 - BAIBEL (BSI)

¹ Ninguno hotsughu susu asayeqhalo ilo, tiye Aqaba Azucheku laghi xesusu iloke, tiye AMPEU no ahza tsukeu toi shike eno ninguye Edom naghuto ghakhulo ado kushuwa itsu itsucheke.

² “Tile AMPEU no ivilo pikeuno

³ ninguye ado lukumkha shi naghuto tipaqolo itsu itsuvea eno ninguye ahuu kudau wulopike.

⁴ Pano ivilo akukutsu tsa hipaqo pesu nongu tsulo pike: ‘Nonguye Edom lo naghuto ghakhu kathasu wunikeu shi ani, nosholokumi putosuvekeu Esao polo kughukomi ghakhu vechenike. Panonguye nongu jumsave nani,

⁵ ikemu nonguye panoqo sasu aghukishi huthu kevilo kughengu niye panongu yeghi auka lakhi qhemi pinamu pesu nongu tsuni chemoke.

⁶ Nonguye panoqo launo achuqupu ngo azu qhulu nanike.’

⁷ “AMPEU nongu Lhou no nonguno mlakeu thwokhalo kishi nongu kumghatsu keno kumsuchilelulo. Nonguno asayeqha hipapahi vechesu itsusu wuchekelo pano nongu tucho hijuke. Paye hi ampe lhobidi nongu gholo aighiveake eno nonguye nonguno avehupu shikeu kumtsu ithuluke.

⁸ “Ikehu ninguno iqesu wuve eno Elat ngo Eziongeber taun lono Amti Zughilo wukeu la pheve eno ninguye kipela ahuu Muab kudau tsughusu wuve.

⁹ AMPEU no ivilo pike, ‘Muab lo akemiqo, Lot polo kughukomi puna kevilo momu panongu sasu aghu shi kevilo. Ino Ar phughi panoqo tsuve ake eno niye panoqo yeghi kiumu nongu tsumo nanike!’ ”

¹⁰ (Akughushu subosughi shiayeh Emim ipi kemiqono Ar lo acheke. Panonguye subosughi shiayeh kutami lakhi Anakim ipikeqo toi chuqhumghaike.

¹¹ Anakim kimihi lono panongu pesu Refaim ghi picheke; ikemu Muabmino panoqo pesu Emim kutsuke.

¹² Horimiye Edom lo acheke ikemu Esao polo kughukomino panoqo halepupove, panoqo shiayeh kutsaleve eno pano ampino tile acheuveke, tiye Israilmino hithiuno pano ghumiqo AMPEU no pano tsuve keu yeghi lono hapupove keu toike.)

¹³ “Tileno AMPEU no ningu vilo shilo piketoi ninguno Zered Ghoki katha.

¹⁴ Hiye ninguno Kades Barnea qhivekeu ampe shighi tache shiakeloke. Tipau tiqhelimi aghukishimi AMPEU no panonguye tishive nani pikeu toi kumtsu thikhave.

¹⁵ AMPEU no panoqo hachile ache tiye pano panoqo kumtsu kutsakhavemo ke kutolo.

¹⁶ “Panongu kumtsu thikhave kethiu,

¹⁷ AMPEU no ningu vilo pike,

¹⁸ ‘Ishino nonguye Ar laghi kudauno Muab ghakhu kathasu wulo.

¹⁹ Tishinikelo nonguye Amunmi Lot polo kughukomi yeghi kupununi ake. Panoqo puna kevilo momu panoqo sasu aghu shikevilo kughengu ino ayeghi panoqo lau tsuvekeu kiumu nongu tsuni chemoke.’ ”

²⁰ (Hipau ghakhuqha pesu Refaim yeghi ipikeu ghi picheni, tilehi achekemi jeke; Amunmino panoqo pesu Zamzumi ipi kucheke.

²¹ Panonguye Anakim toi chuqumghaike. Panongu kumzapu ake eno akughushu laghake. Ikemu AMPEU no panoqo kutsaleve tighenguno Amunmino panoqo yeghi luveno tile ngoluveke.

²² AMPEU no Edommi Esao polo kughukomi, Edom naghutoqhalo akemiqo ghenguno ghi titoi shivetsuke. Pano Horimi kutsaleveke tighenguno Edommino panoqo yeghi luvetsu eno tilehi ngoluve eno itehi ghi tilehi acheni.

²³ Mediteriya Zughi sukumxalo ayeghi akeqoye Kreto Zudo yeghi kudauno ighikemino ngoluveke. Panonguno inahuu tilehi kughuna achekemi Avimmi kutsaleve eno apeu Gaza phughi kutolo panoqo yeghi kumtsu luvetsuke.)

²⁴ “Ninguno Muab kathasu wuve kethiu AMPEU no ningu vilo pike, ‘Itehiye chethuvelo eno Arnon ghoki kathalo. Ino Heshbon lo Amarimi kukau Sihon pesu nongu ulo sutsu anike eno tipa gholono pa yeghi ghi tsu anike. Pa halelo eno pa yeghi qhasuluvelo.

²⁵ Ishi tsala nguno ino aqha kumtsulo timiqo pelo nongu msave penanike. Nongu je kukelo timi kumtsu akumsa launo khokhoshive nanike.’

Israilmino Sihon Toluve

²⁶ “Tile ino Kedemot sayeqha lono aghini kishimi Heshbon lo Akukau Sihon lau alakishi tsa hipau pesu puwuke:

²⁷ ‘Ningu pelo noghakhu kathasu wulupelo. Ninguye vejoi wuve nike eno alalo ngomoke.

²⁸ Ninguno achuqupu chukeu eno azu yekeu ame tsunike. Ninguye kutau kiumu shimono noghakhu kathasu wukeu likhi shinike,

²⁹ tiye ninguno Jordan kathasu AMPEU niLhou no nitsu akeu yeghilo ilomoke kutoloke. Edom lo Esao polo kughukomi akeqo eno Ar lo Muabmi akeqono pano ghakhu kathasu wupenikeu pulovetsuke.’

³⁰ “Ikemu Akukau Sihon ye ningu pelo pa ghakhu kathasu wupemoke. AMPEU nongu Lhou no pa pelo kuthovivepe eno hebidevepe ikehu ninguno pa leluve eno pa ghakhu lukepu shiveke, tipauye itehi kutolo ninguno qhasupe anike.

³¹ “Tile AMPEU no ivilo pike, ‘Julo, ino Akukau Sihon eno pa yeghi pelo nongu zulo avesave peke; pa yeghi lulo eno ngoluvelo,’

³² Sihon no pawu timiqono nisasu aghu shinike Jahaz taun kupunulo ipeghike,

³³ ikemu AMPEU niLhou no paye niulo suvetsu eno pa ghi panuli ghi eno pawu timi kumtsu pithiveke.

³⁴ Tipamtsa ninguno taun kumtsu khasupe leve eno kutsavetsu eno kiptimi, totimi eno atianuli kumtsu pithivetsu ke. Timi lakhimu ninguno puxumoke.

³⁵ Ninguno atsu-aqu luve eno taunqo xulepuwuveke.

³⁶ AMPEU ningu Lhou no ningu pelo Arnon khilaqa mukulo Aroer lono Gilead kutolo taunqo kumtsu khasulupeke. Taun putukeu lakhimu ningu ghenguye akumtoshi aghikeu kuhae.

³⁷ Ikemu ninguye Amunmi lughi kupunu wumoe momu Jabok ghoki muku kutolo wumoe momu naghutoqhalo wumoe AMPEU nilhou no nivilo wukevilo pi ahza tsukeuloye wumoke.”