ZAKINIU 17 - BAIBEL (BSI)

¹ “Amshi ngo bheri tukutiye akeu pesu AMPEU nongu Lhou lau aghashi heqhitsu kevilo; paye tishikeu mithi chenike.”

² Kumsujukelo taun lakhilo kiptimi momu totimi khamino AMPEU shou axine shive eno pawu puloshoqhi kubovekeu nonguno chilu aye,

³ ti kutau lhou mlla eno qeuve momu tsukinhe ngo aqhi momu ayepuqo mlla eno qeuvekeuke eno AMPEU no ahza tsukeu hebide anike.

⁴ Tipa tsa chilu kelo nonguno akivishi tipau phukide kudajulo. Kuchouno alhoksa hikithipu Israil lo shipuaghi aye,

⁵ tileno timi tipau sasu taun lono khalau ipelo eno atu pesu pa veqhi pithivelo.

⁶ Tishinamu thopimi mikini momu tinguno alauno ashepe shikelo likhino pa pithilu nani; thopi lakhi shepelo likhiye pa pithi kepu kumo.

⁷ Thopimi paghino atu pesu veqhini eno tithiuno kutamiqono atu pesu timi tipau veqhilo. Hipa ghola lono alhoksa hikithipu shipuhavelo.

⁸ “Atsa kugha kepu hamiye a-a lakhilo kughakuthami likhiye xatha mlakepu shive nani, tiye aki-alu mheghi tsa, aphimpilo ghuza pipeve keu, timi pithivekeu eno ghiqhivekeu dolo kututa shiakeu. Kughono hikithipu shiveni keno akumlla-a lakhi AMPEU nongu Lhou no kishetsukeu lo wulo

⁹ eno nowu kughakepu tsa pesu Levi laghami achineu eno tipa ghulokilo khuno kughakuthau shi hiyam peitha aghini keno tipaqo vilo pilo eno panoqo pelo xathatsu pelo.

¹⁰ Panonguno xathatsu nani eno nongu vilo panonguno kiu pini keno tipatho shilo.

¹¹ Panoqono kughathatsu keu lulo eno shilopikeu apasu shi papelo.

¹² Timi khunono kughakuthau momu achineu shi aghikeu ighumono hebideni keno pa pithivelo; hipa ghola lono nonguno alhoksa hipau Israil lono ikhivelo.

¹³ Tileno timi kumtsuno tipau chilu no msave nani eno khuu nomu tikithipu shikithemove nanike.

Akukau Lakhi Vehu

¹⁴ “AMPEU Alhou no tsu akeu yeghi nonguno amheghi shiluve kethiu eno tilehi ngoluve kelo nongu sumxape akemi shiayehqo toi nonguye akukau lakhi avehupu shi anike pi kughathaluve nani.

¹⁵ Nonguno timi khuu kishepe akukau shipeni keno tipauye AMPEU no kishetsukeu shimasa kepi tsaqiuno ithilo. Paye notimi lakhi shiaghi masa kethono inanushi lakhi pesu nokukau shipe kevilo.

¹⁶ Akukauye pawu ghushimi ghenguno khurshi kutomo qhikevilo eno khurshi qhupenike paye Ijip lo timi puwu kevilo, kughengu AMPEU no pive ake pawu timiqoye khilemu tilau idewo kepu kumoke.

¹⁷ Akukauye anipu kutomo qhikepu kumo kughengu tipau lono pa pelo AMPEU launo tsughusu wuvepe nanike; eno paye shuna tsandiyi pesu kinikulu shikepu kumoe.

¹⁸ Pano akukau shiluve kelo kaku Alhou yezah ngo akukutsu lakhi akepu tiye Levi laghami achinemiqono inahuuno qhipua chekeu kaku lono yelukeuke.

¹⁹ Paye kaku tipau pa phivilo qhipaulo eno pa kuxu tivilo tipau lono philo tishianguno paye AMPEU gihuni keu ithi nani eno tipaulo ahza tsupuakeu kumtsu amikucho shi pelu kepu ithilu nani.

²⁰ Hipauno paye pa kusami Israilmi nguno akiviu kepi kumsu pemo nani eno kiu lomu AMPEU no ahza tsukeu hebide pemonikeu shi ngolupe nanike. Tileno paye ampe kutomo ayehpelu nani eno pa polo kughukomi tiqheli kutomo kutolo Israil lo ayehpelu nani.”