ZAKINIU 16 - BAIBEL (BSI)

Hechekulu Ghulhu

¹ “Abib qhilo Hechekulu pinyi keu lono AMPEU nongu Lhou gihulo; tipaqhi putho lono pano Ijip lono nongu xapheluke.

² Akumlla-a lakhi lo wulo eno tilauno nomishi na bheri pinamu lakhi ghiqhilo, tiye Hechekulu Ghulhu ghenguno AMPEU nongu Lhou gihu keu shilo.

³ Nonguno tipau ghulhu chukelo kholaqhi sukeu sho chukevilo. Atsala tsuni dolo nonguye kholaqhi sumono asho shikeu chulo nonguno zuleno Ijip qhive kelo toi shilo. Asho tipau chulo, tiye aghichhe ghime sho ipi kunanike, tishianguno nonguno xu ake thaqhulo nonguno Ijip lono ipeghive keu tsala kumsulu nanike, tiye aghichhe ghime-a lakhike.

⁴ Atsala tsuni ghenguno noyeghilo timi lakhimu pano kilo kholaqhi qhikevilo; atughiu qhilo atsala atughiu kijiliuno lhoxu heqhikeu shi ye tipajino chukhave masake.

^5-6 Mllachekeu-a lakhilo huno Hechekululo peitha kepu lhoxuqo heqhilo eno AMPEU nongu Lhou no tsuakeu yeghilo a-a kutau lono khilemu heqhi kevilo. Tiye tsukinhe ilo che kelono shilo, nonguno Ijip qhive keu doghuloki lono shilo.

⁷ Ashi lholo eno mllachekeu-a lakhi lono tipau chulo; eno thanauye akilo idewovelo.

⁸ Tishiwo tsala tsugho dolo nonguye kholaqhi sumokeu sho chulo eno atsala akutsuniulo AMPEU nongu Lhou mllanike kumqolo eno tipa tsala loye akumla shikevilo.

Ghile Pinye

⁹ “Nonguno ghile huthuke ghuloki lono apinedo tsuni kihilo,

¹⁰ eno tishi puzu Ghile Pine ikhilulo, tiye AMPEU nongu Lhou gihukeu shi pano nongu kumghavetsu keu qhemi lono puloniqhiyi keu kumllagho pa lau sughilo.

¹¹ AMPEU gizulo notianuli, noqemi, Levi laghami, inaghami, mighimghami eno chimemi nowu taunlo akemiqo sasu alokivi shilo. Hipauye ti akumlla-a lakhi lono shilo.

¹² Ahza hipau penike pukaputsalo; nonguye Ijip lo aquaxemi shiache kepi kumsuma kevilo.

Apusho Pinye

¹³ “Nonguno athi ghopesu kumtsu qoleve kethiu eno nowu atsayithi kumtsu tsughuphe vekethiu, atsala tsuni Apusholo ngokeu Pinye ikhilulo.

¹⁴ Notianuli noqemi, Levi laghami,inaghami, mighimgha eno chimemi nowu taunlo akemiqo sasu alokivi shilo.

¹⁵ AMPEU nongu Lhou gihu keushi apinye hipau atsala tsuni ghenguno akumlla-a lakhi lono ikhilulo. Alokivi shilo kughengu AMPEU no nowu ghile ngo akumla kumghatsuke.”

¹⁶ “Noshiayelo kiptimi thaquye Akumlla-a lakhi lono ampe lakhilo ghuthu kuthu ighieno AMPEU mllalo; tiye Hechekulu Ghulhu lo ngo Ghile Pinye lo eno Apusholo ngokeu Pinyelo. Timi lakhikhino agho lakhi sughilo

¹⁷ tiye pano shilukeu qhemi, AMPEU no kukumgha pa tsu keu qhemi lono shilo.

Kuchou Xakutha

¹⁸ “AMPEU Alhou no nongu tsukeu taun kumtsulo kughakuthami ngo kijemi sukusu shipe qhilo. Timi tipaqoye agi jumono timiqo shou kughatha tsulo.

¹⁹ Panonguye kughatha keulo amikuchokumo momu agi kuju shikevilo; panonguye kulugho lukevilo kughengu aghotsu keuno alokutsumi eno amikuchomi nhethi ghi kighichevetsu cheni eno panoqo pelo akumou xakutha tsuve chenipeke.

²⁰ Pulhapuju akivi eno achipiu shilo tishianguno nonguye AMPEU Alhou no nongu tsu akeu yeghilo ngolu nanike eno tilehi xu achelu nanike.

Kutau lhou Kumlla

²¹ “Nonguno AMPEU Alhou ghenguno akiptia lakhi mla kelo tipau phivilo asuno Ashera lhouliu shikeu qhikevilo.

²² Asu-atu julho mllanike ghenguno atu tsukucho lakhimu shope qhikevilo; AMPEU ye tipaqo mithi chenike.”