ZAKINIU 13 - BAIBEL (BSI)

¹ “Tungukupmi momu asamo kiqi pitsu kemi lakhino akumzapu kumla momu akichiqhi kepu lakhi shinikeu tushoqhi aghiluvi,

² tiye nongu msu sasu alhou kutau puzuu nonguno mlla chemokeu lhou qe eno mllauve peniye shi aghiluvi. Pano kiu tushoqhi keno tipauye kuchouno shikupuve namu,

³ pa lau amlo tsukevilo. AMPEU nongu Lhou no pa peithano nongu peju aghi luvike, tiye nongu mlo kuchopu pesu AMPEU qhuivu ani kemo keno juniyeke.

⁴ AMPEU pape chelo,pa sumsalo, pa gholulo eno pano ahza tsukeu pelulo; pa mllalo eno pa lau amikucho shilo.

⁵ Ikemu asamo kiqi pitsu kemi momu tungkupmi khuuno nongu vilo AMPEU hebidelo pini keno pa pithivelo. AMPEU no Ijip lo nonguno tilau aqemi shi ake lono nongu xapheluke. Timi tikithipuye alhoksa ke eno AMPEU no nongu vilo xuchelo pi ahza tsukeu kuxu lono nongu sabideveni ke pukaputsa nani. Alhoksa lono nonguno cheluveni ke ghenguno paye pithive masake.

⁶ “Othikuzuu, onu, onga momu nono kimiye chekeu nipu momu oshou kuchou namu tuqhouno ovilo kutau lhou mllanike ohakite aghiluvike, nongu eno nopuasuqono khilemu mlla chemo keu lhou mlla peniye shi aghiluvike.

⁷ Panoqo gholo khamino timi nophivilo akeqo lhou momu putou xuakemiqo lhou opelo mllape nike ohakite aghiluvike.

⁸ Ikemu pa pelo ozuiza pekevilo; pa tsa initsu kevilo. Pa lau kimiyeqhiyi keu momu kupu keu piye kevilo eno pa susho kevilo.

⁹ Pa heqhi pithivelo! Nono atu pesu vetughiu shilo eno kutami ghi atu pesu pa veqhi pelo.

¹⁰ Atu pesu pa veqhi pithivelo! Ijip lo nonguno aqemi shi ache kelono nongu xaphelu keu AMPEU Alhou launo pano nongu msu sawuveniye pukaputsake.

¹¹ Tileno Israilmi kumtsuno kiu shive keno chilu nani; panonguye msave nani eno khunomu alhoksa tikithipu itaghi shimo nanike.

¹² “AMPEU Alhou no nongu tsukeu taunqolo nonguno kughunaluve kelo,

¹³ noshiayehlo ame kuhamithe kemi khamino taun lo akemi musu sasu nonguno khilemu mlla chemokeu kutau lhou mllanike sawuve keu nonguno chiluvike.

¹⁴ Tikithipu uyeu sutsa chilu aye abo akeshi phujulo eno alhoksa tikithipu kuchouno shipuaghi aye,

¹⁵ tipau taunlo timi lhoxu eno atsu-aqu aghikeu kumtsu pithikhavelo. Tipau taun qhoi kutsalevelo.

¹⁶ Tilehi xuakemiqo nhemgha kumtsu pesu akumllagho lakhi AMPEU nongu Lhou mllalo. Tipau taunye alhokupujulo xalepe qhive masake eno khilemu itaghi shikithepuku kevilo.

¹⁷ Kutsalevenikeu shi ghushovekeu nhemgha kiumu nongu gholo qhilu kevilo eno AMPEU no pa loghu idemoveno nongu kimiyeqhiyi nanike. Pano kimiyeqhiyi keu nongu tsu nani eno nongu pesu timi kutomo shitsu nanike, nongu puasuqo lau tushoqhive ketoi,

¹⁸ tiye panonguno ishi tsalalo pano ahza tsukeu kumtsu ino nongu tsukeu nonguno papelu eno pano shilo pikeu shilu aye, tishi tsu nanike.”