YETSAPIU 7 - BAIBEL (BSI)

Akuxu Ghili Kumsujukeu

¹ Ajuaje kiviye amekusho tsungqui keu teli nguno akiviu; okithi tsalaye opunu tsala nguno akiviuke.

² Kusakusho kilo wukeuno aghulhu shiakeu kilo wukeu nguno akiviuke, kughengu akithino ningu kumtsu ngokhe akeu tsa pesu kuxumi piputo tsu acheni.

³ Amlokusaye akunu nguno akiviu; tino ogi khum-muipe luvi, ikemu tipauno ow vethakulu chighiphe cheni.

⁴ Mbomzumi mloye pulhapuju alokivi likhi kumsu acheni ikemu alokutsumiye akithi kumsuju acheni.

⁵ Alokutsumino osakiyikeuye mbomzumino osheqhekeu nguno akiviuke.

⁶ Kughono mbomzumino nuni keno amilo asahuno pepe shi mpakeu toike. Tiye kiumu akiqipu kuhake.

⁷ Kughono alokutsumino kutami pishiqhini keno paye mbomzumi lakhi toi shianike. Nono kulugho luaye ow ghusho ghili shipusave ani.

⁸ Kiu kiumu ashekha launo abothu nguno akiviuke. Kutuukuluye aqhekuza nguno akiviuke.

⁹ Oxukighide ghasupe qhilo; kughengu axukighideye mbomzumi mlolo acheni.

¹⁰ Khilemu ishi pikevilo, “Kishi puzu khaghi ghuloki lono itodolo nguno akiviu kya?” Kughengu tiye alokutsu tsa lono iniju amoe.

¹¹ Xuakemi kumtsuno alotsu kepue; hiye amheghi iyighilu ake toi alokepu lakhike,

¹² pisano susholuke toi osusholu nikeu anike. Alokutsuno okuxu pukhalu chenipeke, hino akighithi akeulo ala shilu chekeuke.

¹³ Alhou no mlakeu kumsukutojulo. Alhou no ihoghulai shipe puakeu kishi puzu khuuno tipau sukumzuluni kya?

¹⁴ Nono kinikulu shilu ake tsalalo alovi alo eno shiluksa tsalalo hi kumsululo: Alhou no alokivi eno shiluksa ghi puwu cheni, tipau thiu kiu shi ighi nani keno timiye khilemu ithi chemoe.

¹⁵ Ikuxuye adouke, ikemu hipaulo niye thwokha kumtsu ithulue. Kivimi lakhiye thiveluvi eno kutamiye alhoksami shianamu xuaghiluvi.

¹⁶ Ikehu, ihulo akivipu shike vilo momu ihulo alotsu kevilo; noye kushiye olikhi okutsave anikya?

¹⁷ Ikemu alhoksa kutukeu ghi shikevilo momu anikha kutukeu ghi shikevilo; noye kushiepi odo tomphi lono thiani kya?

¹⁸ Noye hipau tsuqupelu keuno aloke eno hipau phevekepu kumoe. Nono Alhou sumsa aye kiukiu la lomu tokulupu shi nanike.

¹⁹ Alokutsuno timi lakhi pelo ayehkipemi chighino aphughi lakhi ghenguno mlalu akeu nguno akiviu shi mlalupe cheni.

²⁰ Ayeghilo timi khuumu ado kumtsulo achipiu shilu eno shipimi mokemi lakhimu kuhae.

²¹ Timino pikeu tsa kumtsulo amlo tsuqhiyi kevilo, nono tishiaye oqeuno othaigha aghikeu chiluvike,

²² olikhi nono oithi anike noye ghuthu kutomo kutami thaigha puaghi nanike.

²³ Ino alokutsu peitha puzu hipaqo kumtsu pejuveake. Niye alotsuni keulo imlotsuke ikemu tiye ilauno putosu auve.

²⁴ Khuuno kishi puzu akuxu kiqiye kiu keno phupheluni kya? Hiye nighenguno kuthokuzupuke, vethalunikeu shishe shoe.

²⁵ Ikemu akighithi ngo phujunikeulo ilikhi imlo suke; niye alokutsu phulunikeulo amlo tsuke eno ino iniju achekeu khokichile phucheke eno kixikila ngo anikhaye kiutoi kela ithinikeu pukaputsake.

²⁶ Ino akithi nguno kutau akukhu kimji lakhi phulue, tiye totimi. Lino kikimiye otsukeuye alichhe toi momu akhame lakhi toi omeluve nani; eno li-uno okhaluve keuye ayikichhe toi otshuluve nani. Timi khunono Alhou lopu shicheni keno poluve nani.

²⁷ Iye, ino khokichileqo phucheke lono kiti-tino hipau phupheluke, ipi Yetsapiuno pike.

²⁸ Ino khokichile kutauqo phuju cheke ikemu lakhimu phumlae. Timi 1,000 gholo milakhi likhimu ino gihu kuzumi animalaye phuju kelo lakhi likhi ithulue, ikemu totimi gholo ye lakhimu phumlae.

²⁹ Ino ithi keuye hilikhike: Alhou ye mutsumishei eno muzuchoi ningu lhophe ke ikemu ninguno nipesu kuptshu kupunaiveke.